AKP ភ្នំពេញ ថ្ងៃទី១១ ខែកញ្ញា ឆ្នាំ២០២៥-- ក្នុងឱកាសបុណ្យភ្ជុំបិណ្ឌឆ្នាំនេះ សមាជិកក្រុមប្រឹក្សារាជធានីភ្នំពេញ ស្នើឱ្យអាជ្ញាធររាជធានី និងកងកម្លាំងចំណុះឱ្យគណៈបញ្ជាការឯកភាពរាជធានីភ្នំពេញបន្តយកចិត្តទុកដាក់ បង្ការទប់ស្កាត់ ចោរលួចគាស់ផ្ទះ គ្រោះអគ្គិភ័យ ដោះស្រាយលំហូរចរាចរណ៍ ខណៈពលរដ្ឋត្រូវចាកចេញពីភ្នំពេញទៅលេងតាមបណ្តាខេត្ត។

ឯកឧត្ដម ម៉ប់ សារិន ប្រធានក្រុមប្រឹក្សារាជធានីភ្នំពេញ បានលើកឡើងក្នុងកិច្ចប្រជុំសាមញ្ញលើកទី១៦ របស់ក្រុមប្រឹក្សារាជធានីភ្នំពេញ ឆ្នាំទី២ អាណត្តិទី៤ នៅសាលារាជធានីភ្នំពេញ នាថ្ងៃទី១១ ខែកញ្ញា ឆ្នាំ២០២៥ ថា ការងារលើវិស័យអប់រំនៅរាជធានីភ្នំពេញធ្វើបានល្អប្រសើរ សិស្សានុសិស្សប្រឡងឌីប្លូមជាប់បានច្រើន ហើយចំពោះការរៀបចំសន្តិសុខ សណ្តាប់ធ្នាប់ក្នុងការប្រឡងបាក់ឌុបឆ្នាំនេះវិញឃើញថាមានលក្ខណៈល្អប្រសើរផងដែរ។ ដោយឡែកចំពោះការរក្សាសន្តិសុខ សណ្តាប់ធ្នាប់សាធារណៈទូទៅ មានភាពល្អប្រសើរ ពោលគឺបទល្មើសកើតឡើង កម្លាំងមានសមត្ថកិច្ចបង្ក្រាបបាន១០០%។ ចំពោះបញ្ហាគ្រឿងញៀន និងក្មេងទំនើង អាជ្ញាធរ និងកងកម្លាំងបានចាត់វិធានការ បង្ការ និងបង្ក្រាបបានជាបន្តបន្ទាប់ផងដែរ។

ឯកឧត្ដមក៏បានស្នើឱ្យអាជ្ញាធររាជធានី និងកងកម្លាំងចំណុះឱ្យគណៈបញ្ជាការឯកភាពរាជធានីភ្នំពេញទាំងអស់ ត្រូវប្រុងប្រយ័ត្នឱ្យបានខ្ពស់បន្ថែមទៀត ជុំវិញសកម្មភាពចោរលួចគាស់ផ្ទះ ខណៈពលរដ្ឋទុកផ្ទះចោល ហើយត្រូវចាកចេញទៅលេងស្រុកកំណើត។ សូមបន្តការដោះស្រាយបញ្ហាលំហូរចរាចរណ៍ ដោយពលរដ្ឋត្រូវសម្រុកចាកចេញពីភ្នំពេញ ទៅតាមខេត្ត។ សូមប្រុងប្រយ័ត្នលើការបង្ការ ទប់ស្កាត់គ្រោះអគ្គិភ័យ  និងបង្កើនការយកចិត្តទុកដាក់ចំពោះអនាម័យ បរិស្ថាន ពិសេសការប្រមូល និងទុកដាក់សំរាមឱ្យបានត្រឹមត្រូវនិងទាន់ពេលវេលា នាឱកាសនៃពិធីបុណ្យភ្ជុំបិណ្ឌនេះ។

ឯកឧត្ដម ម៉ប់ សារិន បានបញ្ជាក់ថា រយៈពេល១ខែកន្លងមកនេះ អាជ្ញាធររាជធានីភ្នំពេញ មន្ទីរពាក់ព័ន្ធ និងកងកម្លាំងចំណុះឱ្យគណៈបញ្ជាការឯកភាពរាជធានីភ្នំពេញអនុវត្តកាងារបានល្អប្រសើរ ទាំងការរក្សាសន្តិសុខ សុវត្ថិភាពជូនប្រជាពលរដ្ឋ និងកិច្ចការងារបម្រើសេវាកម្មផ្សេងៗទៀត ជូនប្រជាពលរដ្ឋ។ ប៉ុន្តែ ទោះបីជាយ៉ាងណាក្តី ឯកឧត្ដមប្រធានក្រុមប្រឹក្សាបានជំរុញឱ្យអាជ្ញាធររាជធានី បន្តអនុវត្តការងារឱ្យកាន់តែល្អប្រសើរថែមទៀត។

ជាមួយគ្នានេះដែរ ឯកឧត្ដម ឆាយ វីរៈ អភិបាលរងរាជធានីភ្នំពេញ បានបញ្ជាក់ដែរថា រដ្ឋបាលរាជធានីភ្នំពេញនឹងពុះពារបន្ថែមទៀត ដើម្បីធ្វើឱ្យរាជធានីភ្នំពេញមានសន្តិសុខ សុវត្ថិភាព កាន់តែល្អប្រសើរជាមួយនិងការអភិវឌ្ឍរីកចម្រើនមួយកម្រិតបន្ថែមទៀត។ ចំពោះការស្នើសុំរបស់សមាជិកក្រុមប្រឹក្សាឱ្យរដ្ឋបាលរាជធានី បង្ការទប់ស្កាត់ចោរលួចគាស់ផ្ទះ គ្រោះអគ្គិភ័យ ការដោះស្រាយលំហូរ ចរាចរណ៍ ក្នុងឱកាសបុណ្យភ្ជុំបិណ្ឌនោះ។ ឯកឧត្ដមបានបញ្ជាក់បន្ថែមថា ឯកឧត្ដម ឃួង ស្រេង អភិបាលរាជធានីភ្នំពេញ តែងតែណែនាំកងកម្លាំង និងអាជ្ញាធរខណ្ឌទាំង១៤ យកចិត្តទុកដាក់រក្សាសន្តិសុខ សណ្តាប់ធ្នាប់នៅតាមវត្តអារាម និងនៅកន្លែងសប្បាយនានានៅក្នុងរាជធានីភ្នំពេញ និងណែនាំឱ្យទប់ស្កាត់ ចោរលួចគាស់ផ្ទះប្រជាពលរដ្ឋ ខណៈពលរដ្ឋមិននៅ។ សូមជឿទុកចិត្តលើអាជ្ញាធររាជធានីភ្នំពេញ៕

ដោយ សួស សំរិត