AKP ភ្នំពេញ ថ្ងៃទី១១ ខែកញ្ញា ឆ្នាំ២០២៥ -- ក្នុងឆ្នាំ២០២៥នេះ ការដាក់ពន្ធគយបដិការ របស់សហរដ្ឋអាមេរិក និង ការផ្ទុះឡើង នូវជម្លោះព្រំដែនដែលបង្កឡើងដោយប្រទេសជិតខាងរបស់កម្ពុជា នាពេលថ្មីៗនេះ បានបន្ថែមសម្ពាធ មកលើសេដ្ឋកិច្ចកម្ពុជា ក្នុងបរិការណ៍នេះ, និយាយដោយឡែក, សហគ្រាសក្នុងស្រុក ធុនមីក្រូ, តូច, និង មធ្យម(SMEs) ត្រូវខិតខំម្ចាស់ការ និង ប្រឹងប្រែងក្ដាប់ឱ្យជាប់ នូវឱកាសដ៏មានតម្លៃនេះ, ដោយត្រូវឆ្លើយតប ឱ្យបានជាអតិបរមាទៅនឹងការរំពឹងទុករបស់ប្រជាពលរដ្ឋ, ទាំងក្នុងរយៈពេលខ្លី, មធ្យម និង វែង ខាងមុខ។ នេះជាការក្រើនរម្លឹករបស់ ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី, រដ្ឋមន្ត្រី ក្រសួងសេដ្ឋកិច្ច និង ហិរញ្ញវត្ថុ ថ្លែងក្នុងពិធីបើក «ការតាំងពិព័រណ៍ផលិតផលខ្មែរ ឆ្នាំ២០២៥ ក្រោមប្រធានបទ ៖ ពង្រឹង និង ពង្រីកសមត្ថភាពផលិតក្នុងស្រុក» នាព្រឹកថ្ងៃទី១១ ខែកញ្ញា ឆ្នាំ២០២៥ នៅសាលសន្និបាតកោះពេជ្រ។ 

ឯកឧត្តម អគ្គបណ្ឌិតសភាចារ្យ បានបន្ថែមថា រាជរដ្ឋាភិបាល នឹងបន្តពង្រឹងភាពប្រកួតប្រជែង, ភាពរឹងមាំ និង ភាពធន់ទៅនឹងវិបត្តិ តាមរយៈការកែលម្អបរិយាកាសធុរកិច្ច, ការបន្តធ្វើពិពិធកម្មសេដ្ឋកិច្ច, ការពង្រឹងលទ្ធភាពលើកកម្ពស់ខ្សែច្រវាក់ផ្គត់ផ្គង់ក្នុងស្រុក សំដៅជំរុញការតភ្ជាប់ ទៅនឹងខ្សែច្រវាក់ផ្គត់ផ្គង់ក្នុងតំបន់ និង សកល, ការចាប់យកសកម្មភាពផលិតកម្មដែលបង្កើតតម្លៃបន្ថែមខ្ពស់, ការបង្កើតការងារសម្រាប់កម្លាំងពលកម្មដែលមានជំនាញ, ការពង្រីកមូលដ្ឋានសេដ្ឋកិច្ចជាតិ ឱ្យកាន់តែទូលំទូលាយ ។ល។

បើតាម ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន រាជរដ្ឋាភិបាល,ទាំងក្នុងនីតិកាលមុនៗ និង សម្រាប់នីតិកាលទី៧នេះ នៃរដ្ឋសភា, ទទួលស្គាល់ថា សហគ្រាសក្នុងស្រុក, ទាំងធុនមីក្រូ, តូច, មធ្យម និង ធំ, គឺជាឆ្អឹងខ្នងដ៏រឹងមាំនៃសង្គម-សេដ្ឋកិច្ចជាតិ ដែលបាន និង កំពុង ចូលរួមចំណែកយ៉ាងសំខាន់ ក្នុងការបង្កើតការងារ និង មុខរបរ, ការបង្កើនប្រាក់ចំណូល, ការកាត់បន្ថយភាពក្រីក្រ, និង ការជំរុញការអភិវឌ្ឍ ប្រកបដោយចីរភាព, បរិយាបន្ន, និង ភាពធន់ ។ ហេតុនេះហើយ, ទើបរាជរដ្ឋាភិបាល តែងផ្តោតការយកចិត្តទុកដាក់ខ្ពស់ លើការអភិវឌ្ឍសហគ្រាសក្នុងស្រុកគ្រប់ប្រភេទ តាមរយៈការកសាងប្រព័ន្ធអេកូឡូស៊ីរស់រវើក និង គ្រប់ជ្រុងជ្រោយ ដើម្បីផ្តល់ការគាំទ្រលើទិដ្ឋភាពសំខាន់ៗដូចជា៖ 

ទី១. ក្នុងនីតិកាលទី ៧ នេះ នៃរដ្ឋសភា, ជាផ្នែកមួយនៃ យុទ្ធសាស្ត្របញ្ចកោណ-ដំណាក់កាលទី ១, រាជរដ្ឋាភិបាល បានរៀបចំ «យុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ច ក្រៅប្រព័ន្ធ ឆ្នាំ ២០២៣-២០២៨», ជា កម្មវិធីគោលនយោបាយអាទិភាព ១ ក្នុងចំណោម កម្មវិធីគោលនយោបាយអាទិភាព ចំនួន ៦, ដែលត្រូវបានដាក់ឱ្យអនុវត្ត ចាប់តាំងពីដើមនីតិកាលមក ។ យុទ្ធសាស្ត្រជាតិ នេះ មានចក្ខុវិស័យ អភិវឌ្ឍសេដ្ឋកិច្ចក្រៅប្រព័ន្ធ ឱ្យរីកធំធាត់ និង មានលទ្ធភាពឈានចូលសេដ្ឋកិច្ចក្នុងប្រព័ន្ធ ហើយអាចក្លាយជាកម្លាំងចលករដ៏សំខាន់ ក្នុងការសម្រេចបាននូវការអភិវឌ្ឍ ប្រកបដោយចីរភាព, បរិយាបន្ន, និង ភាពធន់ទៅនឹងវិបត្តិ ។

ទី២. ការលើកកម្ពស់ការទទួលហិរញ្ញប្បទាន និង ឥណទាន តាមរយៈការបង្កើត ធនាគារសហគ្រាសធុនតូច និង មធ្យមកម្ពុជា (SME Bank), ធនាគារអភិវឌ្ឍន៍ជនបទ និង កសិកម្ម (ARDB), និង សាជីវកម្មធានាឥណទានកម្ពុជា (CGCC) ។ ដើម្បីគោលដៅនេះ, ក្នុងពេលកន្លងទៅ, រាជរដ្ឋាភិបាល បានប្រឹងប្រែងបង្កើនថវិកា ជូន ធនាគារសហគ្រាសធុនតូច និង មធ្យមកម្ពុជា និង ធនាគារអភិវឌ្ឍន៍ជនបទ និង កសិកម្ម ជាបន្តបន្ទាប់, ហើយតទៅមុខ នឹងបន្តពិនិត្យលទ្ធភាព វិភាជកញ្ចប់ថវិកាជូនធនាគារទាំងពីរនេះ បន្ថែមទៀត ដើម្បីបង្កលក្ខណៈងាយស្រួល ដល់សហគ្រាសក្នុងស្រុក ក្នុងការទទួលបានកម្ចី ក្នុងទំហំសមស្រប និង សម្រាប់រយៈពេលវែងជាងមុន។ 

ទី៣. ការជំរុញ និង ការលើកកម្ពស់សហគ្រិនភាព និង ការចាប់យកបច្ចេកវិទ្យាឌីជីថល តាមរយៈ ការបង្កើត មជ្ឈមណ្ឌលបណ្តុះធុរកិច្ចថ្មី «តេជោ», មូលនិធិអភិវឌ្ឍន៍សហគ្រិនភាព, និង សហគ្រិនខ្មែរ ។ ទីភ្នាក់ងារទាំងនេះ បាន និង កំពុង ដើរតួនាទីយ៉ាងសំខាន់ ក្នុងការកសាងប្រព័ន្ធអេកូឡូស៊ីសហគ្រិនភាពនៅកម្ពុជា តាមរយៈការផ្តល់នូវការគាំទ្រផ្នែកហិរញ្ញវត្ថុ និង មិនមែនហិរញ្ញវត្ថុ ដល់ធុរកិច្ចថ្មី និង សហគ្រាសធុនតូច និង មធ្យម ដែលមានសក្តានុពល ខ្ពស់; ការបង្កើនផលិតភាព; ការបង្កើតសេវា ឬ ផលិតផលថ្មី; និង ការផ្គូផ្គងអាជីវកម្ម។

ទី៤. ការគាំទ្រដល់ការអភិវឌ្ឍជំនាញ តាមរយៈការបណ្ដុះបណ្ដាលផ្ទាល់ និង សហ-ហិរញ្ញប្បទាន ។ កាលពីដើមឆ្នាំ ២០២៤, ក្រសួងសេដ្ឋកិច្ច និង ហិរញ្ញវត្ថុ បានសម្ពោធជាផ្លូវការ នូវ មូលនិធិអភិវឌ្ឍន៍ជំនាញ (SDF) ដែលមានបេសកកម្ម ជំរុញភាពជាដៃគូជិតស្និទ្ធ រវាង វិស័យឯកជន និង គ្រឹះស្ថានបណ្តុះបណ្តាល តាមរយៈការផ្តល់ហិរញ្ញប្បទាន ដល់ការបណ្តុះ- បណ្តាលជំនាញ សម្រាប់ការត្រៀមចូលទីផ្សារការងារ, ការលើកកម្ពស់ជំនាញ និង ការ-ផ្លាស់ប្តូរជំនាញ ដើម្បីឆ្លើយតបទៅនឹងតម្រូវការរបស់វិស័យឯកជន រួមទាំងសហគ្រាសក្នុងស្រុក ធុនមីក្រូ, តូច, និង មធ្យម ផងដែរ ។

ទី៥. ការលើកកម្ពស់ស្តង់ដាផលិតផល តាមរយៈការកសាងហេដ្ឋារចនាសម្ព័ន្ធគុណភាព ជាតិ ដើម្បីលើកកម្ពស់សមត្ថភាពជាតិ ក្នុងការផ្តល់សេវានៃការធ្វើតេស្តពិសោធន៍, ការធ្វើ-ស្តង់ដានីយកម្ម, ការវាយតម្លៃភាពអនុលោមមាត្រាសាស្រ្ត, និង ការវាយតម្លៃទទួលស្គាល់, ក្នុងគោលបំណងអភិវឌ្ឍវិស័យឧស្សាហកម្ម និង សហគ្រាសគ្រប់ប្រភេទ, ទាំងមីក្រូ, តូច, មធ្យម, និង ធំ; កាត់បន្ថយនូវរបាំងបច្ចេកទេស; និង ជំរុញការធ្វើពាណិជ្ជកម្ម របស់វិស័យឯកជន។

និងទី៦. ការកែលម្អបរិយាកាសធុរកិច្ច តាមរយៈការដាក់ចេញជាបន្តបន្ទាប់នូវវិធានការកែទម្រង់មុតស្រួច និង ចំទិសដៅ ដើម្បីដោះស្រាយបញ្ហាជារចនាសម្ព័ន្ធ និង បង្កើតបរិយាកាសអំណោយផល, ជាពិសេស កាត់បន្ថយបន្ទុកចំណាយ របស់សហគ្រាសក្នុងស្រុក ធុនមីក្រូ, តូច, និង មធ្យម ។ ជាក់ស្តែង, រាជរដ្ឋាភិបាល បានផ្តល់ការលើកទឹកចិត្តផ្នែកពន្ធដារ, បានបង្កើតយន្តការធ្វើអធិការកិច្ចរួម, និង បានរៀបចំប្រព័ន្ធបច្ចេកវិទ្យាព័ត៌មានសម្រាប់ការចុះបញ្ជីអាជីវកម្ម និង ការស្នើសុំអាជ្ញាបណ្ណ/លិខិតអនុញ្ញាតប្រកបអាជីវកម្ម តាមថ្នាលផ្លាស់ប្តូរទិន្នន័យកម្ពុជា ដែលហៅកាត់ជាភាសាអង់គ្លេសថា CamDX ។ល។

សូមជម្រាបជូនថា «ការតាំងពិព័រណ៌ផលិតផលខ្មែរ ឆ្នាំ ២០២៥» រៀបចំឡើង រយៈពេល៣ថ្ងៃចាប់ពីថ្ងៃទី១១ដល់ថ្ងៃទី១៣ ខែកញ្ញា ឆ្នាំ២០២៥ ដោយមានការចូលរួមយ៉ាងច្រើនកុះករ ពីសំណាក់សហគ្រាស ក្នុងស្រុក សរុបចំនួនប្រមាណ ៣០០, និង ការតាំងបង្ហាញផលិតផលក្នុងស្រុក សរុបជាង ១០០ ប្រភេទ, មកពីតាមរាជធានី-ខេត្ត ទាំង ២៥ នៅទូទាំងប្រទេស៕

ដោយ៖ គង់ សិរីរ័ត្ន, រូបថត៖ សួស សាវី