AKP ភ្នំពេញ ថ្ងៃទី១១ ខែកញ្ញា ឆ្នាំ២០២៥--

ក្រុមភ្ញៀវ ឡាយអ៊ិនឃីងខេត្តសៀមរាបបានយកឈ្នះក្រុមម្ចាស់ផ្ទះ ព្រះវិហារស៊ីធី ដោយលទ្ធផលបច្ចេកទេស ៩-០ បន្តក្តោបក្តាប់ដំណែងលើកំពូលតារាង ក្នុងពូល-ង នៅក្នុងការប្រកួតកាលពីល្ងាចថ្ងៃទី១០ ខែកញ្ញា ឆ្នាំ២០២៥ ពានរង្វាន់សម្តេចតេជោ ហ៊ុន សែន ថ្នាក់ខេត្ត រដូវកាល ២០២៥-២០២៦។

នៅក្នុងវគ្គទី១ ក្រុមឡាយអ៊ិនឃីងខេត្តសៀមរាបបានបើការនាំមុខលើក្រុមព្រះវិហារស៊ីធី ៥-០ ហើយនៅវគ្គទី២ ក្រុមឡាយអ៊ិនឃីងខេត្តសៀមរាប បន្តធ្វើសម្រេចបាន៤គ្រាប់បន្ថែម ដែលធ្វើឱ្យក្រុមខ្លាំងមួយនេះបន្តក្តាប់ក្តាប់លើកំពូលតារាង ក្នុងពូល-ង ប្រចាំសប្តាហ៍ទី៨។ ឆ្លងកាត់៣ប្រកួតដូចៗគ្នា ក្រុមឡាយអ៊ិនឃីងខេត្តសៀមរាប ឈ្នះទាំង៣ប្រកួត មាន៩ពិន្ទុ ឈរនៅលេខ១ ក្នុងពូល-ង ខណៈក្រុមក្រុមព្រះវិហារស៊ីធីចាញ់ទាំង៣ប្រកួត ឈរនៅបាតតារាង ក្នុងចំណោម៤ក្រុម។

ចំពោះ១ប្រកួតផ្សេងទៀត ក្នុងពូល-ង កាលពីល្ងាចថ្ងៃទី១០ ខែកញ្ញា ឆ្នាំ២០២៥ នេះដែរ គឺក្រុមខេត្តឧត្តរមានជ័យបានយកឈ្នះក្រុមអាចារ្យលាក់ខេត្តកំពង់ធំ ដោយលទ្ធផល ៣-១។ ឆ្លងកាត់៣ប្រកួតដូចៗគ្នា ក្រុមខេត្តឧត្តរមានជ័យ និងក្រុមអាចារ្យលាក់ខេត្តកំពង់ធំ ឈ្នះ១ ស្មើ១ និងឈ្នះ១ដូចៗគ្នា មាន៤ពិន្ទុដូចគ្នា។

គួរបញ្ជាក់ថា ការប្រកួតបាល់ទាត់ពានរង្វាន់សម្តេចតេជោ ថ្នាក់ខេត្ត ឆ្នាំ២០២៥-២០២៦ មានក្រុមតំណាងរាជធានីខេត្តសរុប ១៩ក្រុមចូលរួម ដោយចែកចេញជា៥ពូល ហើយដំណើរការប្រកួតវគ្គជម្រុះក្នុងពូលទាំង៥ ចាប់ពីថ្ងៃទី២២ ខែកក្កដា ដល់ថ្ងៃទី១៤ ខែធ្នូ ឆ្នាំ២០២៥។ ក្រុមទាំង១៩ ក្នុងពូលទាំង៥ ត្រូវប្រកួតសន្សំពិន្ទុវិលជុំក្នុងពូលរៀងៗខ្លួន ចំនួន២ជើង ក្នុងដី និងក្រៅដី ដើម្បីស្វែងរកចំណាត់ថ្នាក់លេខ១ និងលេខ២ ក្នុងពូលនីមួយៗឡើងជុំបន្ត នឹងបន្តប្រកួតទៅវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រ។ ក្រុមជ័យលាភីថ្នាក់ខេត្តនឹងត្រូវឡើងទៅប្រកួតជម្រុះបន្តជាមួយក្រុមនានាដែលកំពុងឈរជើងក្នុងក្របខណ្ឌលីគកំពូលកម្ពុជា ឬជម្រើសជើងឯកខេមបូឌានព្រីមៀរលីគ ១១ក្រុម ហៅថា ការប្រកួតពានរង្វាន់សម្តេចតេជោ ហ៊ុន សែន ថ្នាក់ជាតិ៕

ដោយ ហេង ណាលីន (រូបភាព៖ Hun Sen Cup)