AKP បន្ទាយមានជ័យ ថ្ងៃទី១១ ខែកញ្ញា ឆ្នាំ២០២៥-- សាខាកាកបាទក្រហមកម្ពុជាខេត្តបន្ទាយមានជ័យ បាននាំយកអំណោយមនុស្សធម៌ទៅចែកជូនដល់គ្រួសារក្រីក្រ និងខ្វះខាតជីវភាពចំនួន២៤៦គ្រួសារ ដែលរស់នៅតាមបណ្ដោយព្រំដែនថៃ ក្នុងភូមិចំនួន៤នៃឃុំគោករមៀត ស្រុកថ្មពួក ដោយឯកឧត្តម អ៊ុ រាត្រី អភិបាលខេត្តបន្ទាយមានជ័យ និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត បានដឹកនាំក្រុមការងារ ចែកចាយអំណោយទាំងនោះនៅបរិវេណបឹងត្រកួន ឃុំគោករមៀត កាលពីរសៀលថ្ងៃពុធ ទី១០ ខែកញ្ញា ឆ្នាំ២០២៥នេះ។ 

ក្នុងឱកាសនោះ ឯកឧត្តម អ៊ុ រាត្រី បានពាំនាំនូវការផ្ដាំផ្ញើសួរសុខទុក្ខពីថ្នាក់ដឹកនាំកំពូលៗរបស់កម្ពុជា រួមមាន សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី, និង លោកជំទាវបណ្ឌិត ពេជ ចន្ទមុន្នី។ សារទាំងនេះបង្ហាញពីការគិតគូរ និងនឹករលឹកជានិច្ចដល់សុខទុក្ខរបស់ប្រជាពលរដ្ឋគ្រប់រូប។ 

ទន្ទឹមនឹងនេះ ឯកឧត្តមបានបញ្ជាក់ថា សាខាកាកបាទក្រហមកម្ពុជាខេត្តបន្ទាយមានជ័យ ជាពិសេសកាកបាទក្រហមកម្ពុជា ក្រោមការដឹកនាំរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជាមាតាមនុស្សធម៌ តែងតែយកចិត្តទុកដាក់គិតគូរពីសុខទុក្ខរបស់ប្រជាពលរដ្ឋនៅពេលជួបគ្រោះថ្នាក់ផ្សេងៗដោយគ្មានការរើសអើងអ្វីឡើយ ព្រមទាំងបានក្រើនរំលឹកដល់ពលរដ្ឋត្រូវចេះថែរក្សាសុខភាព រស់នៅឱ្យបានល្អប្រសើរក្នុងរដូវវស្សានេះ ដើម្បីជៀសវាងពីជំងឺរាតត្បាតផ្សេងៗ។

សូមជម្រាបជូនថា ភូមិទាំង៤ ដែលបានទទួលអំណោយគឺ ភូមិផ្លូវបំបែក ភូមិបន្ទាយមានឫទ្ធិ ភូមិត្រពាំងសំរោង និងភូមិសាមគ្គី។ អំណោយដែលបានផ្ដល់ជូនក្នុងមួយគ្រួសារ រួមមាន អង្ករ ២៥ គីឡូក្រាម មីខ្លាឃ្មុំ២៥កញ្ចប់ ទឹកស៊ីអ៊ីវ១យួរ មុង១ ភួយ១ ថវិកាមួយចំនួន៕

ដោយ ឈុន សារ៉ាត