AKP បន្ទាយមានជ័យ ថ្ងៃទី១០ ខែកញ្ញា ឆ្នាំ២០២៥ -- គណៈកម្មការទី១ (គណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងអធិការកិច្ច) នៃរដ្ឋសភា ដែលដឹកនាំដោយ ឯកឧត្តម សរ ចំរុង ប្រធានគណៈកម្មការ បានអញ្ជើញចុះទៅជួបសំណេះសំណាល និងនាំយកអំណោយជូនដល់ប្រជាពលរដ្ឋរងគ្រោះដោយទាហានថៃដាក់បន្លាលួសព័ទ្ធយកលំនៅឋាន ស្ថិតនៅភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីថ្ងៃទី០៩ ខែកញ្ញា ឆ្នាំ២០២៥នេះ។

ក្នុងជំនួបនោះ ឯកឧត្តម សរ ចំរុង បានជួបសំណេះសំណាលជាមួយអាជ្ញាធរខេត្ត រួមមាន ឯកឧត្តម ប្លែក វ៉ារី ប្រធានក្រុមប្រឹក្សាខេត្ត និង ឯកឧត្តម អ៊ុ រាត្រី អភិបាលខេត្តបន្ទាយមានជ័យ។

ក្នុងនាមជាអាជ្ញាធរដែនដី ឯកឧត្តម អ៊ុ រាត្រី បានធ្វើសេចក្ដីរាយការណ៍យ៉ាងលម្អិតជូនគណៈប្រតិភូជ្រាបអំពីស្ថានភាពជាក់ស្ដែងនៅតំបន់កើតហេតុ។ ឯកឧត្តមបានបញ្ជាក់ថា កាលពីថ្ងៃទី១២ ខែសីហា កន្លងទៅ យោធាថៃបានដេញប្រជាពលរដ្ឋខ្មែរចេញពីផ្ទះសម្បែងរបស់ពួកគាត់ ហើយបានដាក់បន្លាលួសបិទផ្លូវមិនឱ្យពលរដ្ឋវិលត្រឡប់ចូលផ្ទះវិញបានឡើយ។ ឯកឧត្តមបានលើកឡើងថា ក្នុងចំណោមប្រជាពលរដ្ឋរងគ្រោះទាំងនោះ ក៏មានជនពិការ ៤នាក់ ស្ត្រីមានផ្ទៃពោះ ២នាក់ និងកុមារ ៦នាក់ផងដែរ។

ឯកឧត្តម អ៊ុ រាត្រី បានចាត់ទុកសកម្មភាពរបស់កងទ័ពថៃថា ជាការរំលោភបំពានម្ដងហើយម្ដងទៀតមកលើទឹកដីអធិបតេយ្យរបស់កម្ពុជា ព្រោះកងទ័ពទាំងនោះថែមទាំងបានសង់ទីស្នាក់ការរបស់ខ្លួននៅលើដីកម្ពុជាថែមទៀតផង។ ឯកឧត្តមក៏បានជំរុញឱ្យភាគីថៃរើចេញជាបន្ទាន់នូវបន្លាលួស និងសម្ភារផ្សេងៗដែលបានដាក់ខុសច្បាប់នៅលើទឹកដីកម្ពុជា ហើយទាមទារឱ្យភាគីថៃ ប្រគល់មកវិញនូវទ្រព្យសម្បត្តិ និងដីស្រែចម្ការដែលបានកាន់កាប់ខុសច្បាប់។ ជាមួយគ្នានេះ ឯកឧត្តមក៏បានអំពាវនាវឱ្យភាគីថៃបញ្ឈប់ការលុកលុយការកាន់កាប់ដោយខុសច្បាប់ និងដករាល់កម្លាំងយោធារបស់ខ្លួនទៅទីតាំងដែលកំណត់ដោយច្បាប់។

បន្ទាប់ពីបានស្ដាប់របាយការណ៍របស់ឯកឧត្តមអភិបាលខេត្តរួចមក ឯកឧត្តម សរ ចំរុង បានថ្លែងអំណរគុណ និងកោតសរសើរចំពោះកិច្ចខិតខំប្រឹងប្រែងរបស់រដ្ឋបាលខេត្ត ដែលបានយកចិត្តទុកដាក់ដោះស្រាយបញ្ហា និងផ្ដល់សេវាជូនប្រជាពលរដ្ឋយ៉ាងល្អប្រសើរ។ ឯកឧត្តមប្រធានគណៈកម្មការ បាននាំយកការផ្ដាំផ្ញើសាកសួរសុខទុក្ខពីសម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា ដែលសម្ដេចតែងតែនឹករលឹក និងគិតគូរដល់សុខទុក្ខរបស់ប្រជាពលរដ្ឋគ្រប់ពេលវេលា។ ដើម្បីសម្រាលការលំបាករបស់ពលរដ្ឋដែលរងគ្រោះ ឯកឧត្តម សរ ចំរុង បានប្រគល់អំណោយដល់ប្រជាពលរដ្ឋដោយក្នុងមួយគ្រួសារទទួលបាន ភួយ១, ក្រមា១, ត្រីងៀត និងសាច់ក្រក ព្រមទាំងថវិកា ២០០,០០០ រៀល។

សូមបញ្ជាក់ថា ការចុះជួបសំណេះសំណាល និងផ្ដល់អំណោយនេះ មិនត្រឹមតែជាការបង្ហាញពីការយកចិត្តទុកដាក់របស់ស្ថាប័ននីតិប្បញ្ញត្តិ និងអាជ្ញាធរដែនដីចំពោះសុខទុក្ខរបស់ប្រជាពលរដ្ឋប៉ុណ្ណោះទេ តែក៏ជាសញ្ញាមួយបញ្ជាក់ពីការប្ដេជ្ញាចិត្តរបស់កម្ពុជាក្នុងការការពារអធិបតេយ្យភាពជាតិ និងសិទ្ធិស្របច្បាប់របស់ប្រជាពលរដ្ឋនៅលើទឹកដីរបស់ខ្លួនផងដែរ៕

ដោយ ឈុន សារ៉ាត