AKP កំពង់ចាម ថ្ងៃទី១០ ខែកញ្ញា ឆ្នាំ២០២៥ -- ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានស្នើដល់មន្ត្រីពាក់ព័ន្ធ និងអាជ្ញាធរមូលដ្ឋាន ត្រូវបន្តធ្វើការតាមដាន និងត្រៀមបង្ការជាស្រេចដើម្បីឆ្លើយតបនឹងគ្រោះមហន្តរាយទឹកជំនន់ ក្នុងភូមិសាស្ត្រខេត្តកំពង់ចាម ដោយក្នុងស្ថានភាពកម្ពស់ទឹកទន្លេមេគង្គ បានកំពុងឡើងជាបន្តបន្ទាប់នោះ ទោះបីជាទឹកឡើងមិនទាន់ដល់ចំណុចប្រកាសឱ្យប្រុងប្រយ័ត្ន ក្នុងចំណុច១៥,២០ម៉ែត្រក្តី តែតំបន់មួយចំនួនបានរងផលប៉ះពាល់ហើយ។ ដូច្នេះ មន្ត្រីពាក់ព័ន្ធ និងអាជ្ញាធរមូលដ្ឋាន ត្រូវបន្តធ្វើការតាមដាន និងត្រៀមបង្ការជាស្រេចដើម្បី ឆ្លើយតបទាន់ពេលពិសេស បណ្តាស្រុកតាមដងទន្លេ។ នេះជាការលើកឡើងរបស់ឯកឧត្តមអភិបាលខេត្ត ក្នុងកិច្ចប្រជុំសាមញ្ញលើកទី១៦ អាណត្តិទី៤ របស់ក្រុមប្រឹក្សាខេត្តកំពង់ចាម កាលពីថ្ងៃទី០៩ ខែកញ្ញា ឆ្នាំ២០២៥។

ឯកឧត្តម អ៊ុន ចាន់ដា អភិបាលខេត្តកំពង់ចាម ក៏បានណែនាំឱ្យត្រៀមលក្ខណៈគ្រប់បែបយ៉ាងទៅតាមជំនាញនីមួយៗ ក្នុងការប្រើប្រាស់កម្លាំង និងមធ្យោបាយ សម្រាប់ជួយអន្តរាគមន៍នៅពេលមានគ្រោះមហន្តរាយកើតឡើង ហើយត្រូវផ្សព្វផ្សាយដល់ប្រជាពលរដ្ឋឱ្យ មានការប្រុងប្រយ័ត្ន ចំពោះហេតុការណ៍ចៃដន្យណាមួយ ដែលបណ្តាលឱ្យប៉ះពាល់ដល់អាយុជីវិត ពិសេសត្រូវប្រុងប្រយ័ត្នខ្ពស់ចំពោះកុមារ ជនពិការ និងចាស់ជរាផងដែរ។

បើតាមការបញ្ជាក់របស់លោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តកំពង់ចាម បានឱ្យដឹងថា ទឹកទន្លេមេគង្គ នៅស្ថានីយជលសាស្ដ្រខេត្តកំពង់ចាម  នៅថ្ងៃទី១០ ខែកញ្ញា ឆ្នាំ២០២៥ គឺ ទឹកមានកម្ពស់១៣,៤៦ម៉ែត្រ ពោលគឺខ្ពស់ជាងម្សិលមិញតែ០,០៦ម៉ែត្រ។ ចំណុដែលត្រូវប្រកាសឱ្យមានការប្រុងប្រយ័ត្នគឺនៅចំណុចកម្ពស់ ១៥,២០ម៉ែត្រ។ រីឯស្ថានភាពអាកាសធាតុ ភ្លៀងបានធ្លាក់រាយប៉ាយស្ទើរគ្រប់ស្រុក៕

ដោយ ឆាយ ម៉ុត