AKP កំពង់ធំ ថ្ងៃទី១០ ខែកញ្ញា ឆ្នាំ២០២៥ -- បន្ទាប់ពីចុះសិក្សាស្វែងយល់អំពីការចិញ្ចឹមត្រីនិងការប្រមូលផលត្រីរ៉ស់នៅកសិដ្ឋានចិញ្ចឹមត្រីរបស់លោក តាន់ វណ្ណា រួចមកកាលពីថ្ងៃទី០៩ ខែកញ្ញា ឆ្នាំ២០២៥ នៅសាលប្រជុំសាលាស្រុកស្ទោង ឯកឧត្តមបណ្ឌិត សួង ណយ ប្រធានក្រុមការងារអភិវឌ្ឍន៍សេដ្ឋកិច្ចមូលដ្ឋាន និងទីផ្សារផលិតផលខ្មែរខេត្តកំពង់ធំ បានបន្តបេសកកម្មដឹកនាំកិច្ចជំនួបពិភាក្សាស្តីពីបច្ចេកទេសនៃការប្រើចំណី ភ្ញាស់ ចិញ្ចឹម ប្រមូលផល កែច្នៃ ទីផ្សារផលិតផលវារីវប្បកម្មនិងភ្ជាប់ជាមួយស្ថាប័នហិរញ្ញវត្ថុដើម្បីស្ថេរភាពអាជីវកម្ម ដែលកិច្ចជំនួបពិភាក្សានេះក្រោមការសម្របសម្រួលដោយរដ្ឋបាលស្រុកស្ទោងដែលសមាសភាពចូលរួមសរុបចំនួន១១៩រូបក្នុងនោះ ក្រុមការងារថ្នាក់ជាតិ៥រូប ថ្នាក់ខេត្ត៦រូបស្រុក៤រូបមន្រ្តីកសិកម្មឃុំ៦រូបតំណាងស្ថាប័នហិរញ្ញវត្ថុ៧រូប(KE ARDB SMEB)កសិដ្ឋានជំនាញវារីវប្បកម្ម៣រូប កសិករចិញ្ចឹមត្រី៥៧រូប សិប្បកម្មកែច្នៃត្រី៧រូប អាជីវករលក់ត្រី និងផលិតផលកែច្នៃ១២រូប ក្រុមហ៊ុនផលិតចំណីក្នុងស្រុក និងបរទេស១២រូប (New Hope, DeHeus, CJ, Tongwei)។

ឯកឧត្តមបណ្ឌិត សួង ណយ បានពាំនាំនូវការផ្តាំផ្ញើសួរសុខទុក្ខរបស់ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំជូនចំពោះប្រជាកសិករមន្ត្រីរាជការគ្រប់លំដាប់ថ្នាក់ក្នុងស្រុកស្ទោងទាំងអស់។ចក្ខុវិស័យរបស់ក្រុមការងារនិងអំពីផែនការវារីវប្បកម្មខេត្តកំពង់ធំ ដោយប្រទាក់ក្រឡាគ្នាពីការជ្រើសរើសមេពូជ ភ្ញាស់ ចិញ្ចឹម ប្រមូលទិញ កែច្នៃ ទីផ្សារ ភ្ជាប់នឹងស្ថាប័នហិរញ្ញវត្ថុ ដើម្បីពង្រីកអាជីវកម្ម ហើយជំរុញឱ្យក្រុមហ៊ុនផលិតចំណីត្រីឱ្យជួយទិញវត្ថុធាតុដើមពីខេត្តកំពង់ធំវិញ។

 
ជំនួបពិភាក្សាមានបទបង្ហាញរបស់អ្នកជំនាញចិញ្ចឹមត្រីរ៉ស់ លោក តាន់ វណ្ណា និងលោក ផុន សុវណ្ណ ម្ចាស់កសិដ្ឋានចិញ្ចឹមត្រី និងតំណាងក្រុមហ៊ុនផលិតចំណីបានធ្វើបទបង្ហាញអំពីការធ្វើស្រះ បច្ចេកទេសភ្ញាស់ ចិញ្ចឹម ប្រមូលទិញ កែច្នៃ ទីផ្សារនិងការប្រើចំណីត្រី។ ស្ថាប័នហិរញ្ញវត្ថុ ណែនាំឱ្យការរៀបចំឯកសារចំណូលចំណាយ ដើម្បីទទួលបានឥណទាន និងអំណោយ។ ស្ថាប័នហិរញ្ញវត្ថុទាំង៣បន្តពិភាក្សាលម្អិតជាមួយកសិករចិញ្ចឹមត្រី អ្នកកែច្នៃ និងអាជីវករផលនេសាទដោយចែកជា៣ក្រុមទៅតាមជម្រើសដែលពួកគាត់ចង់ស្វែងយល់បន្ថែមដើម្បីទទួលបានឥណទាន ឬជំនួយពីស្ថាប័នហិរញ្ញវត្ថុខាងលើ។

សូមជម្រាបផងដែរថាក្រុមការងារបន្តដំណើរចុះមើលកសិដ្ឋានចិញ្ចឹមត្រី ធ្វើស្រែ១៥០០ហិកតានៅស្រុកបារាយណ៍ និងកសិដ្ឋានភ្ញាស់ត្រី៦៨ហិកតា ស្រុកតាំងគោក ខេត្តកំពង់ធំ៕

ដោយ ស៊ុម វណ្ណា