AKP ភ្នំពេញ ថ្ងៃទី០៩ ខែកញ្ញា ឆ្នាំ២០២៥–សម្តេចកិត្តិសង្គហបណ្ឌិត ម៉ែន សំអន អនុប្រធាន គណបក្សប្រជាជនកម្ពុជា បានអញ្ជើញចូលរួមសូត្រមន្តវេនកាន់បិណ្ឌទី២ នៅវត្តបទុមវតី រាជធានីភ្នំពេញ ដើម្បីឧទ្ទិសកុសលជូនដល់ដួងវិញ្ញាណក្ខន្ធ អ្នកស្នេហាជាតិ ដោយមានការចូលរួមពីសំណាក់ ឯកឧត្តម លោកជំទាវ លោក លោក ស្រី នៃខុទ្ទកាល័យនៃគណៈកម្មការកណ្តាលគណបក្សប្រ ជាជនកម្ពុជា នៅថ្ងៃអង្គារ២រោច ខែភទ្របទ ឆ្នាំម្សាញ់សប្តស័កព.ស.២៥៦៩ ត្រូវនឹងថ្ងៃទី០៩ ខែកញ្ញា ឆ្នាំ២០២៥។

   សម្ដេចកិត្ដិសង្ហហបណ្ឌិត ម៉ែន សំអន បានបញ្ជាក់ថា៖ តាមទំនៀមទម្លាប់ពីដូនតាតរៀងមកប្រជាពលរដ្ឋនៅទូទាំងប្រទេសកម្ពុជាយើងទាំងមូល ដល់រដូវខែភ្ជុំបិណ្ឌ ភាគច្រើនបានយកម្ហូបអាហារ និងផ្លែឈើ នំចំណីទៅប្រគេនដល់ព្រះសង្ឃ ដែលគង់ចាំព្រះវស្សា នៅតាមវត្តអារាមចាប់ពីថ្ងៃ១រោច រហូតដល់ថ្ងៃ១៥រោច ខែភទ្របទ ដែលជាថ្ងៃឆ្លងបញ្ចប់ ឬគេហៅថា ថ្ងៃបុណ្យភ្ជុំបិណ្ឌ នៃពិធីបុណ្យភ្ជុំបិណ្ឌ ព្រោះព្រះសង្ឃគ្រប់អង្គមិនអាចនិមន្ដបិណ្ឌបាតបាននោះទេ ដោយហេតុផលជារដូវភ្លៀងធ្លាក់ជោគជាំរាល់ថ្ងៃ ។ 

   ក្នុងឱកាសបុណ្យនេះដែរសម្ដេចកិតិ្ដសង្ហហបណ្ឌិត បានបញ្ជាក់ថា៖ យើងពិតជាមានការសោកស្តាយយ៉ាងខ្លាំងចំពោះការបាត់បង់វីរកងទ័ព ពោរពេញដោយឆន្ទៈមនសិការ ស្មារតីក្លាហាន និងសេចក្តីស្មោះត្រង់ចំពោះជាតិ ដែលពួកគាត់បានសុខចិត្តយកទ្រូងពាំងគ្រាប់រំសេវនិងអាវុធគ្រប់ប្រភេទប្តូរយកសុខសន្តិភាពជូនប្រជាជនកម្ពុជាទាំងមូល ដែលយើងអាចសម្រាន្តលក់ ហូបឆ្ងាញ់ ប្រកបដោយស្នាមញញឹម និងភាពកក់ក្តៅជាមួយក្រុមគ្រួសារ។ 
     សូមបញ្ជាក់ថា វេនកាន់បិណ្ឌទី២នេះ ជាវេនរបស់ខុទ្ទកាល័យនៃគណៈកម្មការ កណ្តាល គណបក្សប្រជាជនកម្ពុជា ដែល បានរៀបចំឡើងជារៀងរាល់ឆ្នាំ។

តាមកម្មវិធីនៅរសៀលនេះ នឹងមានការជួបជុំពុទ្ធបរិស័ទ នមស្ការព្រះរតនត្រ័យសមាទានសីល និមន្តព្រះសង្ឃចម្រើនព្រះបរិត្ត និងសម្តែងធម៌ទេសនា។ លុះស្អែកឡើង នឹងមានពិធីរាប់បាត្រ បង្សុកូលឧទ្ទិសកុសលជូនដល់ដួងវិញ្ញាណក្ខន្ធអ្នកស្នេហាជាតិ បុព្វការីជន ញាតិមិត្តជិតឆ្ងាយ កម្មាភិបាល យុទ្ធជន យុទ្ធនារី ញាតកាទាំង ៧សន្ដាន ដែលបានពលីជីវិតដើម្បីបុព្វហេតុជាតិ មាតុភុមិ និងវេរភត្តហារ ប្រគេន ព្រះសង្ឃជាកិច្ចបង្ហើយបុណ្យ៕ 
ដោយ៖ សួស សំរិត