AkP សៀមរាប ថ្ងៃទី០៩ ខែកញ្ញា ឆ្នាំ២០២៥--

ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានណែនាំដល់កម្លាំងនគរបាលទាំងអស់ ពិសេសនៅក្នុងខេត្តសៀមរាប ត្រូវបន្តយកចិត្តទុកដាក់ខ្ពស់លើការងារគ្រប់គ្រង សន្តិសុខ និង សណ្ដាប់ធ្នាប់សាធារណៈ ដើម្បីផ្ដល់ភាពកក់ក្ដៅជូនប្រជាពលរដ្ឋ ភ្ញៀវទេសចរ ក៏ដូចជាជួយជំរុញដល់ការអភិវឌ្ឍសេដ្ឋកិច្ច និងសង្គមជាតិ។

ថ្លែងនៅក្នុងពិធីប្រកាសដាក់ឱ្យប្រើប្រាស់អគារអធិការដ្ឋាននគរបាល និងសមិទ្ធផលនានានៅក្នុងក្រុងរុនតាឯកតេជោសែន ខេត្តសៀមរាប នាថ្ងៃទី៩ ខែកញ្ញា ឆ្នាំ២០២៥ ឯកឧត្តម ស សុខា ក៏បានជំរុញឱ្យកងកម្លាំងនគរបាលខេត្ត ក្រុង ស្រុក បង្កើនកិច្ចសហការតាមរយៈការពង្រឹងវិធានការជំនាញ និងជំរុញការចូលរួមពីសំណាក់កម្លាំង ប្រជាការពារ និង ប្រជាពលរដ្ឋ ក្នុងការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព។ 

ជាមួយគ្នានោះ ឯកឧត្តមក៏បានក្រើនរំឭកដល់អធិការនគរបាលក្រុង-ស្រុក និងមេប៉ុស្តិ៍នគរបាលរដ្ឋបាលឃុំ-សង្កាត់ទាំងអស់ ឱ្យខិតខំយកចិត្តទុកដាក់បម្រើសេវាសាធារណៈជូនប្រជាពលរដ្ឋក្នុងមូលដ្ឋានរបស់ខ្លួនឱ្យកាន់តែល្អប្រសើរ ជាពិសេសការធ្វើសៀវភៅស្នាក់នៅ សៀវភៅគ្រួសារ និងអត្តសញ្ញាណប័ណ្ណ ដើម្បីបំពេញតម្រូវការចាំបាច់ផ្សេងៗរបស់ប្រជាពលរដ្ឋ។

ឯកឧត្តមបានលើកឡើងថា សមិទ្ធផលអគារអធិការដ្ឋាននគរបាលក្រុងរុនតាឯកនេះ គឺជាគំរូអគារថ្មីមួយដែលមិនទាន់មាននៅតាមបណ្ដាខេត្ត-ក្រុងផ្សេងទៀត ហើយវាបានបង្ហាញពីការវិវត្តថ្មីមួយក្នុងការរៀបចំកន្លែងធ្វើការដែលមានស្តង់ដារខ្ពស់ ស្របតាមទិសដៅនៃ រដ្ឋបាលឌីជីថល។

 ឯកឧត្តមបញ្ជាក់ថា សមិទ្ធផលទាំងនេះគឺសម្រាប់បម្រើប្រជាពលរដ្ឋ ដើម្បីកសាងស្ថាប័នមួយប្រកបដោយប្រសិទ្ធភាព និងបម្រើជាតិឱ្យចំគោលដៅ ស្របតាមតម្រូវការ និងសំណូមពររបស់ប្រជាពលរដ្ឋក្នុងមូលដ្ឋាន។

សូមបញ្ជាក់ថា សមិទ្ធផលដែលត្រូវបានប្រកាសដាក់ឱ្យប្រើប្រាស់នាពេលនេះ រួមមាន៖ អគារអធិការដ្ឋាន១ខ្នង កម្ពស់២ជាន់, អគារស្នាក់នៅ១ខ្នង កម្ពស់២ជាន់, ផ្ទះបាយ១ខ្នង, អគារឃុំឃាំងបណ្ដោះអាសន្ន១ខ្នង, រោងចំណតរថយន្តពន្លត់អគ្គិភ័យ, បន្ទប់ទឹក, ខ្លោងទ្វារ និងរបងព័ទ្ធជុំវិញ កម្ពស់ ២.៥ម៉ែត្រ។ ការសាងសង់នេះត្រូវបានរៀបចំឡើងយ៉ាងត្រឹមត្រូវតាមស្តង់ដាររបស់ក្រសួងមហាផ្ទៃ៕
ដោយ៖ ឃុត សៅ