AKP ខេត្តព្រះសីហនុ ថ្ងៃទី០៩ ខែកញ្ញា ឆ្នាំ២០២៥--    ព្រឹកថ្ងៃអង្គារទី០៩ ខែកញ្ញា ឆ្នាំ២០២៥  ឯកឧត្តម ម៉ាង ស៊ីណេត ប្រធានគណ:កម្មាធិការសាខាកាកបាទក្រហមកម្ពុជា ខេត្តព្រះសីហនុ ជាក្រុមការងារឥស្សរៈជនឆ្នើមថ្នាក់ខេត្ត ដោយមានការចូលរួមពីលោកអភិបាលរងខេត្ត មន្ត្រីរាជការ កងកម្លាំងប្រដាប់អាវុធ មន្ត្រីប្រតិបត្តិសាខា អនុសាខាក្រុងកោះរ៉ុង បាននាំយកអំណោយមនុស្សធម៌ចែកជូនដល់គ្រួសារ ស្ត្រីទើបសម្រាលកូនដែលមានជីវភាពខ្វះខាតចំនួន ០៦គ្រួសារ នៅរីសត យូ អេន មី ស្ថិតនៅភូមិដើមថ្កូវ សង្កាត់កោះរ៉ុង ក្រុងកោះរ៉ុង ខេត្តព្រះសីហនុ ដើម្បីគាំទ្រដល់សកម្មភាពការងារឥស្សរជនឆ្នើមថ្នាក់ជាតិ ដែលមានសម្តេចកិតិ្តព្រឹទ្ធិបណ្ឌិត ប៊ុន រ៉ានី ហ៊ុនសែន ជាប្រធាន  ។

  ក្នុងឪកាសនោះ ឯកឧត្តម ម៉ាង ស៊ីណេត ជាប្រធានគណ:កម្មាធិការសាខាកាកបាទក្រហមកម្ពុជា ខេត្តព្រះសីហនុ ជាក្រុមការងារឥស្សរៈជនឆ្នើមថ្នាក់ខេត្តព្រះសីហនុ បានពាំនាំប្រសាសន៍ផ្តាំផ្ញើសួរសុខទុក្ខ និងសេចក្តីនឹករលឹកពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងជាឥស្សរ: ជនឆ្នើមថ្នាក់ជាតិ និងលោកជំទាវបណ្ឌិត ពេជ្យ ចន្ទមុនី ហ៊ុន ម៉ាណែត ដែលបានធ្វើការណែនាំដល់សាខាកាកបាទក្រហមខេត្ត ត្រូវយកចិត្តទុកដាក់ជូនចំពោះស្ត្រីសម្រាលកូន និងកំពង់រង់ចាំសម្រាល និងសូមជូនពរឪ្យក្មួយទាំងអស់មានសុខភាពល្អ កាយសម្បទារឹងមាំកម្លាំងខ្លាំងក្លា ប្រាជ្ញាឈ្លៀសវៃ និងជោគជ័យគ្រប់ក្រុមគ្រួសារ ក្នុងនាមឪ្យរដ្ឋបាលខេត្ត ក៏សូមអបអរសាទរចំពោះក្មួយៗដែលទទួលបានសមាជិកថ្មី និងសូមឪ្យសមាជិកថ្មីទាំងនេះ ក្លាយជាធនធានមួយដ៏សំខាន់សម្រាប់ក្រុមគ្រួសារ ដែលជាយុវជនបន្តវេនពង្រឹងសេដ្ឋ កិច្ចគ្រួសារ ក៏ដូច ជាការចូលរួមអភិវឌ្ឍសេដ្ឋកិច្ចជាតិ ។

    ឯកឧត្តម ប្រធានសាខាកាកបាទក្រហមកម្ពុជា ខេត្តព្រះសីហនុ បានបញ្ជាក់ថា គោលគោលនយោបាយរបស់រាជរដ្ឋាភិបាល ទោះបីប្រជាពលរដ្ឋមានបណ្ណក្រីក្រ ឬមិនមានបណ្ណក្រីក្រ នៅពេលមានផ្ទៃពោះត្រូវទៅពិនិត្យសុខភាពឪ្យបាន ៤ដងមុនពេលសម្រាល ហើយការគិតគូពីសុខទុកកូនចៅរបស់យើង គឺដើម្បីឪ្យកុមារដែលកើតមកមានសុខភាពល្អ មានប្រាជ្ញាវៀងវៃ ដើម្បីចូលរួមអភិវឌ្ឍគ្រួសារ និងប្រទេសជាតិ យើងត្រូវបណ្តុះបណ្តាលកូនចៅរបស់យើងឪ្យមានចំណេះ ជំនាញ ដើម្បីចូលបំរើការងារទៅតាមសមត្ថភាពនៅតាមរោងចក្រ សហគ្រាស និងការដឹកជញ្ជូនភ្ញៀវទេសចរជាដើម ទន្ទឹមនោះ រាជរដ្ឋាភិបាលក៏បានគិតគូអំពីសុខភាពក្មួយដោយបានខិតខំពង្រឹងវិស័យសុខា ភិបាលឪ្យនៅកៀកនិងក្មួយ។ នៅពេលយើងមានការងារធ្វើ និងនៅពេលចាស់ទៅនិងទទួលបានអត្ថប្រយោជន៍ពីបណ្ណ ប.ស.ស ឬបណ្ណសមធម៌ផ្សេងៗទៀត ជាពិសេសនៅពេលយើងធ្វើការលែងកើត ឬហៅថា ចូលនិវត្តន៍ យើងនឹងទទួលបានប្រាក់សោធនិវត្តដូចមន្ត្រីរាជការ និងកងកម្លាំងប្រដាប់អាវុធ ។

    អំណោយដែលផ្តល់ជូនស្រីសម្រាលកូនចំនួន ០៦នាក់ ក្នុងម្នាក់ៗទទួលបាន អង្ករ ២៥គីឡូក្រាម ត្រីខ ១យួរ មី ១កេស ទឹកត្រី ១យួរ កន្ទេល១ ឃីតទារក១ ឃីតមនុស្សចាស់១ (មុង១ ភួយ១ ក្រមា១ សារុង១) និងថវិកាចំនួន ៥ម៉ឺនរៀល ៕

ដោយ ៖ ងូ សុមុនី