AKP ភ្នំពេញ ថ្ងៃទី៣០ ខែសីហា ឆ្នាំ២០២៥-- ឯកឧត្តម ថេ ឈុនហាក់ អគ្គនាយកនៃអគ្គនាយកដ្ឋានសមភាពយេនឌ័រ និងអភិវឌ្ឍន៍សេដ្ឋកិច្ច និងតំណាងដ៏ខ្ពង់ខ្ពស់របស់លោកជំទាវកិត្តិបណ្ឌិតរដ្ឋមន្រ្តី ក្រសួងកិច្ចការនារី នាថ្ងៃទី២៩ ខែសីហា ឆ្នាំ២០២៤ បានទទួលជួបសំណេះសំណាលជាមួយនិស្សិតកម្ពុជា ដែលទទួលជ័យលាភីអាហារូបករណ៍របស់រដ្ឋាភិបាលសាធារណរដ្ឋឆែក ចំនួន១៣រូប (ស្រី៣រូប) សម្រាប់ឆ្នាំសិក្សា ២០២៥-២០២៦។

ឯកឧត្តមបានអបអរសាទរ និងសម្តែងនូវក្តីរីករាយយ៉ាងក្រៃលែង ដែលបានឃើញនិស្សិតកម្ពុជាកាន់តែច្រើនទទួលបានឱកាសទៅបន្តការសិក្សានៅបរទេស ដើម្បីពង្រីកចំណេះដឹងនិងជំនាញថ្មីៗ ជាពិសេសនៅលើមុខវិជ្ជាពាក់ព័ន្ធនឹងវិស្វកម្ម សំណង់ ស្ថាបត្យកម្ម វិទ្យាសាស្រ្តកុំព្យូទ័រ AI និង Robotics នាឱកាសនេះ។ ទាំងនេះគឺជាអាទិភាពរបស់រាជរដ្ឋាភិបាលកម្ពុជា ក្នុងការអភិវឌ្ឍមូលធនមនុស្ស ដូចមានកំណត់ក្នុងយុទ្ធសាស្ត្របញ្ចកោណ។ 

ឯកឧត្តមបានលើកទឹកចិត្តឱ្យនិស្សិតទាំងខំប្រឹងប្រែងប្រើប្រាស់ឱកាសនេះឱ្យអស់ពីលទ្ធភាព ដោយពង្រឹង ទាំងជំនាញរឹង (Hard Skills) ក្នុងមុខវិជ្ជាដែលខ្លួនសិក្សា និងជំនាញទន់ (Soft Skills) នៅក្នុងអំឡុងពេលសិក្សា និងការរស់នៅ ដូចជាការប្រាស្រ័យទំនាក់ទំនងល្អ ចេះសាមគ្គីគ្នា បណ្តុះភាពជាអ្នកដឹកនាំរបស់ខ្លួន របៀបការធ្វើការងារជាក្រុម ព្រមទាំងការប្រកាន់ខ្ជាប់នូវគុណធម៌ និងសីលធម៌ល្អនៅក្នុងការរស់នៅ និងសិក្សារៀនសូត្រ ប្អូនៗនិស្សិតទាំងអស់ត្រូវចាំថា (ម្នាក់ៗគឺជាទូតសុឆន្ទៈតំណាងឱ្យប្រទេសកម្ពុជា ត្រូវចេះផ្សព្វផ្សាយ នូវ វប្បធ៌ម  អរិយធ៌ម ប្រពៃណី ទំនៀមទម្លាប់។ល។ ជាមួយគ្នានោះ ឯកឧត្តមបានចែករំលែកអំពីតួនាទីទាំងអស់ និង ភាគលាភយេនឌ័រ ដែលបេសកកម្មរបស់ក្រសួងកិច្ចការនារី  សម្រាប់សង្គមជាតិ និងបានបញ្ជាក់ថា និស្សិតកំពុងសិក្សា និងពេលទៅបម្រើការងារតាមជំនាញរបស់ខ្លួន ក៏មានតួនាទីយ៉ាងសំខាន់ ក្នុងគុណតម្លៃទាំងនេះ តាមរយៈភាពជាគំរូ ការបណ្តុះសន្ទុះចិត្ត និងគាំទ្រដល់ក្មេងស្រីនិងស្រ្តីផ្សេងៗទៀតឱ្យអភិវឌ្ឍសមត្ថភាពតាមសក្តានុពលរបស់ខ្លួន និងតាមរយៈការយកជំនាញនិងសមត្ថភាពរបស់ខ្លួន ទៅបម្រើសង្គម និងតាមស្ថាប័នរបស់ខ្លួន ប្រកបដោយសមធម៌ និងគុណធម៌លើវិជ្ជាជីវៈ។ រាល់ជំហាននិងការខិតប្រឹងប្រែងរបស់ប្អូនៗ មិនមែនសម្រាប់តែប្អូនៗ ប៉ុន្តែសម្រាប់ទាំងគ្រួសារ និងសង្គមជាតិទាំងមូល៕

ដោយ៖ ពេជ្រ សំអឿន (ប្រភព៖ ក្រសួងកិច្ចការនារី)