AKP ភ្នំពេញ ថ្ងៃទី៣០ ខែសីហា ឆ្នាំ២០២៥-- ឯកឧត្តម វ៉េង ហៀង អនុរដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី២៨ ខែសីហា ឆ្នាំ២០២៥ បានដឹកនាំក្រុមការងារសម្របសម្រួលផ្គូរផ្គងទីផ្សារការងារជូនពលករ នៅក្នុងក្រុមហ៊ុន ថាកូអាហ្រ្គី (THACO AGRI) ស្ថិតនៅនៅឃុំជ័យឧត្តម ស្រុកលំផាត់ ខេត្តរតនគិរី ដើម្បីសម្របសម្រួល តាមដានការទទួលយកបងប្អូនពលករខ្មែរដែលទើបវិលត្រឡប់មកពីប្រទេសថៃ។

ឯកឧត្តម វ៉េង ហៀង បានជួបប្រជុំជាមួយមន្រ្តីនៃមន្ទីរការងារ និងបណ្ដុះបណ្ដាលវិជ្ជាជីវៈខេត្តរតនគិរី និងតំណាងក្រុមហ៊ុន ថាកូអាហ្រ្គី (THACO AGRI) ដើម្បីពិភាក្សាពីការផ្ដល់កន្លែងស្នាក់នៅជូនបងប្អូនពលករខ្មែរដែលទើបវិលត្រឡប់មកពីប្រទេសថៃចំនួន៥៣នាក់ ដែលបានមកដល់ក្រុងបានលុង ហើយត្រូវចូលសម្ភាសការងារ នៅថ្ងៃទី២៩ ខែសីហា ឆ្នាំ២០២៥។

 
ទន្ទឹមគ្នានេះ ឯកឧត្តមបានបញ្ជាក់ថា នៅថ្ងៃទី២៨ ខែសីហា ឆ្នាំ២០២៥ មានពលករខ្មែរមកសម្ភាសការងារនៅក្នុងក្រុមហ៊ុនចំនួន ៧៨នាក់(ស្រី៣២នាក់) ហើយបានសម្ភាសជាប់ទាំងអស់គ្នា។ ដោយក្នុងនោះ ពួកគាត់ត្រូវធ្វើការផ្នែកសំណង់២នាក់ និងធ្វើការងារក្នុងចម្ការចេកចំនួន ៧៦នាក់។

ក្នុងឱកាសនោះ ឯកឧត្តមបានពន្យល់ណែនាំដល់ក្រុមហ៊ុនឱ្យទទួលយកបងប្អូនពលករខ្មែរដែលទើបត្រឡប់មកពីប្រទេសថៃ ដែលខ្វះអត្តសញ្ញាណប័ណ្ណឱ្យសម្ភាសចូលធ្វើការ និងសន្យាសហការជាមួយនឹងក្រុមការងារមន្ទីរ ក៏ដូចជា ទីភ្នាក់ងារជាតិមុខរបរ និងការងារ (NEA) ធ្វើការរួមគ្នាឱ្យមានភាពស្អិតរមួត ដើម្បីពន្លឿនប្រសិទ្ធភាពការសម្ភាសការងារតាមអនឡាញ និងទទួលយកបងប្អូនកម្មករនិយោជិតឱ្យចូលធ្វើការ។

ឯកឧត្ដមបានពាំនាំនូវការផ្តាំផ្ញើសួរសុខទុក្ខពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងពីសំណាក់ឯកឧត្តមរដ្ឋមន្រ្តី ហេង សួរ និងបានណែនាំដល់រដ្ឋបាលរោងចក្រឱ្យបន្តយកចិត្តទុកដាក់ដល់បងប្អូនពលករខ្មែរដែលត្រឡប់មកពីប្រទេសថៃ តាមរយៈការប្រើប្រាស់នូវពាក្យសំដីសមរម្យ ត្រឹមត្រូវ ទន់ភ្លន់ និងគ្មានការរើសអើងបងប្អូនពលករដែលមកពីប្រទេសថៃ៕

ដោយ ទេស ច័ន្ទសុធារី (ប្រភព៖ ក្រសួងការងារ)