AKP កំពង់ឆ្នាំង ថ្ងៃទី៣០ ខែសីហា ឆ្នាំ២០២៥-- ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានផ្ដាំផ្ញើដល់ក្មួយៗសិស្សានុសិស្សឱ្យបន្ដគោរពបទប្បញ្ញត្តិនៃការប្រឡងឱ្យបានល្អខ្ជាប់ខ្ជួនសម្រាប់ការប្រឡងនារសៀលថ្ងៃចុងក្រោយនេះ ថ្ងៃទី២៩ ខែសីហា ឆ្នាំ២០២៥ នៅសាលាវិទ្យាល័យក្រុងកំពង់ឆ្នាំង ខេត្តកំពង់ឆ្នាំង ដោយមានការអញ្ជើញចូលរួមពីឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ប្រធានមន្ទីរអប់រំខេត្ត លោកគ្រូ អ្នកគ្រូ និងមន្ត្រីអមដំណើរជាច្រើននាក់ផងដែរ។ 

ក្នុងឱកាសនោះ ឯកឧត្តមបណ្ឌិតសភាចារ្យ ហង់ជួន ណារ៉ុន បានកោតសរសើរចំពោះបេក្ខជនប្រឡងទុតិយភូមិទាំងអស់ នៅខេត្តកំពង់ឆ្នាំងដែលនៅតែរក្សាបាននូវស្មារតីនឹងនរ និងរបៀបរៀបរយល្អក្នុងពេលប្រឡងសញ្ញាបត្រមធ្យមសិក្សាទុតិយភូមិ។ ការបង្ហាញហឹបវិញ្ញាសារជូនដល់បេក្ខជនប្រឡង ពិនិត្យភាពបិទជិត មានបិទស្កុត និងត្រាស្រោមប្រធានវិញ្ញាសា នៅចំពោះមុខបេក្ខជន ដើម្បីធានាបានថា ការប្រឡងប្រព្រឹត្តទៅដោយគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។ 

ទន្ទឹមនឹងនេះឯកឧត្តមបណ្ឌិតសភាចារ្យបានបន្តទៀតថា ដោយមានការសហការពីគណៈមេប្រយោគ និងគណៈកម្មការ ដែលបានបំពេញភារកិច្ចប្រកបដោយស្មារតីទទួលខុសត្រូវខ្ពស់។ សិស្សានុសិស្សទាំងអស់ដែលបានខិតខំប្រឹងប្រែងរៀនសូត្រនឹងទទួលបានជោគជ័យនៅក្នុងការប្រឡង។ ប៉ុន្តែក្រសួងមិនលើកទឹកចិត្តឱ្យសិស្សតវ៉ានោះទេ ដោយសារតែក្រសួងបានរៀបចំដំណើរការប្រឡងបានល្អប្រសើរហើយ ទាំងការរៀបចំវិញ្ញាសា កំណែ និងបច្ចេកទេសផ្សេងៗជាដើម ដែលធានាបាននូវតម្លាភាព និងសុក្រឹតភាព។

ឯកឧត្តមបណ្ឌិតសភាចារ្យឧបនាយករដ្ឋមន្ត្រីបានបញ្ជាក់ទៀតថា ការប្រឡងនារសៀលថ្ងៃចុងក្រោយនេះក្មួយៗ បេក្ខជនប្រឡងទាំងអស់ ខិតខំយកចិត្តទុកដាក់ពង្រឹងស្មារតី យកអស់កម្លាំងកាយចិត្តបញ្ចេញបញ្ញាវាងវៃ ដើម្បីដណ្ដើមយកជោគជ័យឱ្យទល់តែបាន៕

ដោយ បៃ ស៊ីថុន