AKP បន្ទាយមានជ័យ ថ្ងៃទី៣០ ខែសីហា ឆ្នាំ២០២៥-- ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានប្រកាសយ៉ាងច្បាស់ៗថា ប្រជាពលរដ្ឋខ្មែរដែលរស់នៅភូមិព្រៃចាន់ និងភូមិជោគជ័យ ក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ មិនអាចរើផ្ទះសម្បែងរបស់ពួកគេចេញបាននោះទេ តាមការទាមទាររបស់ភាគីថៃ។ ឯកឧត្តមបានសង្កត់ធ្ងន់ថា ផ្ទះ និងដីទាំងនោះជាកម្មសិទ្ធិស្របច្បាប់របស់ប្រជាពលរដ្ឋកម្ពុជា ហើយអាជ្ញាធរខេត្ត និងកងកម្លាំងមានសមត្ថកិច្ចនឹងនៅតែបន្តការពារបូរណភាពទឹកដី និងសិទ្ធិរស់នៅរបស់ពលរដ្ឋខ្មែរ។

ការបញ្ជាក់ជំហរបែបនេះបានធ្វើឡើងកាលពីរសៀលថ្ងៃទី២៩ ខែសីហា ឆ្នាំ២០២៥នេះ ក្នុងឱកាសដែលឯកឧត្តមអភិបាលខេត្តបានធ្វើបទបង្ហាញពីស្ថានភាពព្រំដែននៅតំបន់ជម្លោះនេះជូនដល់ក្រុមអ្នកសារព័ត៌មានអន្តរជាតិមកពីប្រទេសចិន សិង្ហបុរី ឥណ្ឌូនេស៊ី ម៉ាឡេស៊ី វៀតណាម និងអ្នកសារព័ត៌មានក្នុងស្រុកជាច្រើនរូប។ នេះកើតឡើងបន្ទាប់ពីកងទ័ពថៃបានចូលឈ្លានពានរំលោភបំពានយ៉ាងគឃ្លើនរាយបន្លាលួសព័ទ្ធយកដី និងផ្ទះសម្បែងរបស់ប្រជាពលរដ្ឋខ្មែរនៅតំបន់នោះ។

ឯកឧត្តម អ៊ុ រាត្រី បានថ្លែងយ៉ាងម៉ឺងម៉ាត់ថា «ឱ្យរើរបៀបម៉េចបើដីផ្ទះជារបស់ប្រជាពលរដ្ឋខ្មែរ? ប្រជាពលរដ្ឋខ្មែរមិនអាចរើចេញនោះទេ អាជ្ញាធរនឹងនៅការពារពួកគាត់ កងកម្លាំងនឹងការពារពួកគាត់ ពីព្រោះជាដីរបស់ពួកគាត់។»    ឯកឧត្តមបានបន្ថែមថា គ្មានបុគ្គល ឬភាគីណាមួយមានសិទ្ធិទាមទារឱ្យប្រជាពលរដ្ឋខ្មែររើចេញពីលំនៅឋានដែលជាកម្មសិទ្ធិស្របច្បាប់របស់ពួកគាត់នោះទេ។ ទន្ទឹមនឹងនេះ ឯកឧត្តមក៏បានបង្ហាញនូវការសោកស្ដាយចំពោះកិច្ចខិតខំប្រឹងប្រែងរបស់កម្ពុជាក្នុងការដោះស្រាយបញ្ហាតាមរយៈការចរចា ដោយភាគីថៃពុំដែលបានផ្ដល់ការឆ្លើយតបទៅនឹងលិខិតផ្លូវការជាច្រើនដែលកម្ពុជាបានផ្ញើទៅនោះឡើយ។

បញ្ហានេះបានបង្កការលំបាកយ៉ាងខ្លាំងក្នុងការស្វែងរកដំណោះស្រាយដោយសន្តិវិធី និងការចរចាប្រកបដោយផលប្រយោជន៍ទៅវិញទៅមក។ ការមិនមានការឆ្លើយតបរបស់ភាគីថៃ គឺជាឧបសគ្គដ៏ធំមួយដែលធ្វើឱ្យកិច្ចសហប្រតិបត្តិការដោះស្រាយបញ្ហាព្រំដែននៅទ្រឹង។ អាជ្ញាធរកម្ពុជានឹងបន្តរក្សាជំហររឹងមាំក្នុងការការពារប្រជាពលរដ្ឋ និងបូរណភាពទឹកដីរបស់ខ្លួន ទោះជាយ៉ាងណាក្តី។

ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានធ្វើការបញ្ជាក់បន្ថែមថាកងទ័ពថៃបានចូលឈ្លានពានរំលោភបំពានយ៉ាងគឃ្លើនរាយបន្លាលួសព័ទ្ធយកដី និងផ្ទះសម្បែងរបស់ប្រជាពលរដ្ឋខ្មែរភូមិព្រៃចាន់ និងភូមិជោគជ័យ ក្នុងឃុំអូរបីជាន់ ស្រុកអូរជ្រៅ មានប្រជាពលរដ្ឋសរុប ១២គ្រួសារ ស្មើនឹង៥៩នាក់ ដែលបានរងផលប៉ះពាល់ពីការឈ្លានពាននេះ។ ក្នុងចំណោមអ្នករងគ្រោះទាំងអស់នោះ មានជនពិការចំនួន ៤នាក់ និងស្ត្រីមានផ្ទៃពោះចំនួន ២នាក់ ផងដែរ។

ឯកឧត្តមអភិបាលខេត្ត និងមន្រ្តីពាក់ព័ន្ធបានរួមគ្នាជួយដោះស្រាយជាបណ្តោះអាសន្ននូវកន្លែងស្នាក់នៅ និងម្ហូបអាហារសម្រាប់ជនរងគ្រោះទាំងអស់ ដើម្បីធានាបាននូវសុវត្ថិភាព និងជីវភាពរស់នៅប្រចាំថ្ងៃរបស់ពួកគាត់។ កិច្ចការនេះបានបង្ហាញពីការយកចិត្តទុកដាក់ខ្ពស់របស់អាជ្ញាធរខេត្ត ក៏ដូចជារាជរដ្ឋាភិបាលចំពោះសុខទុក្ខរបស់ប្រជាពលរដ្ឋដែលកំពុងជួបការលំបាក៕

ដោយ ឈុន សារ៉ាត