AKP ភ្នំពេញ ថ្ងៃទី៣០ ខែសីហា ឆ្នាំ២០២៥-- ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានដឹកនាំក្រុមការងារអញ្ជើញចុះសិក្សាស្វែងយល់ពីប្រព័ន្ធធារាសាស្ត្រព្រែកគ្រួសចារ និងប្រព័ន្ធធារាសាស្ត្រតាស៊ូងនៃកម្មវិធីខ្សែសង្វាក់តម្លៃផលិតកម្មកសិកម្មកម្ពុជា-អូស្ត្រាលី (កាវ៉ាក់) ក្រោមជំនួយពីរដ្ឋាភិបាលអូស្ត្រាលី ស្ថិតក្នុងភូមិសាស្ត្រខេត្តតាកែវ និងខេត្តកណ្តាល កាលពីព្រឹកថ្ងៃសុក្រ ទី២៩ ខែសីហា ឆ្នាំ២០២៥ ដោយមានវត្តមានចូលរួមពីឯកឧត្តម Derek Yip ឯកអគ្គរាជទូតអូស្រ្តាលីប្រចាំនៅកម្ពុជា ព្រមទាំងអាជ្ញាធរមូលដ្ឋានជាច្រើនរូប។

ប្រព័ន្ធធារាសាស្ត្រព្រែកគ្រួសចារដែលទទួលប្រភពទឹកពីស្ទឹងព្រែកអំបិល ស្រុកស្អាង ខេត្តកណ្តាល បានកសាងឡើងក្នុងឆ្នាំ២០១៨ មានទីតាំងស្ថិតក្នុងឃុំចារ ស្រុកព្រៃកប្បាស ខេត្តតាកែវ និងឃុំព្រែកអំបិល ស្រុកស្អាង ខេត្តកណ្តាល។ ដោយឡែក ប្រព័ន្ធធារាសាស្រ្តតាស៊ូង បានកសាងឡើងក្នុងឆ្នាំ ២០១៧ មានទីតាំងស្ថិតនៅភូមិព្រៃតាពង  ឃុំបានកាម  ស្រុកព្រៃកប្បាស ខេត្តតាកែវ  មានចម្ងាយប្រមាណ ៦៥គីឡូម៉ែត្រ ពីទីរួមខេត្តតាកែវ។

ឯកឧត្តមរដ្ឋមន្ត្រី និងគណៈប្រតិភូ ក៏បានអញ្ជើញជួបសំណេះសំណាលជាមួយសហគមន៍កសិករប្រើប្រាស់ទឹកនៃប្រព័ន្ធប្រធារាសាស្ត្រព្រែកគ្រួសចារ និងប្រព័ន្ធធារាសាស្ត្រតាស៊ូង ផងដែរ។

សូមបញ្ជាក់ថា សហគមន៍កសិករប្រើប្រាស់ទឹកព្រែកគ្រួសចារ បានបង្កើតឡើងនៅថ្ងៃទី១៦ ខែឧសភា ឆ្នាំ២០១៩  ដែលមានសមាជិកចំនួន ៣៨៨១គ្រួសារ ផ្ទៃដីស្រោចស្រព ៣០២១ហិកតា ក្នុងនោះផ្ទៃដីបង្កបង្កើនផលបាន២ដងចំនួន១៥២១ហិកតា និងបាន៣ដងចំនួន១៥០០ហិកតា គ្របដណ្តប់លើភូមិចំនួន២៧ ឃុំចំនួន៦ នៃស្រុកព្រៃកប្បាស ស្រុកបាទី ខេត្តតាកែវ និងស្រុកស្អាង ខេត្តកណ្តាល។

ចំណែក សហគមន៍កសិករប្រើប្រាស់ទឹកតាស៊ូងបានបង្កើតឡើងនៅថ្ងៃទី៣០ ខែមីនា ឆ្នាំ២០១៨ ដែលមានសមាជិកចំនួន២២១៨គ្រួសារ ផ្ទៃដីស្រោចស្រព ២៣៥២ហិកតា គ្របដណ្ដប់លើភូមិចំនួន១៦ ឃុំចំនួន នៃស្រុកព្រៃកប្បាស ខេត្តតាកែវ៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)