AKP ភ្នំពេញ ថ្ងៃទី៣០ ខែសីហា ឆ្នាំ២០២៥-- សាខាកាកបាទក្រហមកម្ពុជាខេត្តព្រះសីហនុបានបើកវគ្គបង្រៀនវិជ្ជាសង្គ្រោះបឋមដល់នាយនាវី នាយនាវីរង ពលនាវិក មូលដ្ឋានសមុទ្ររាម កងទ័ពជើងទឹក នៅមជ្ឈមណ្ឌលហ្វឹកហ្វឺនពហុសាសន៍ មូលដ្ឋានសមុទ្ររាម កាលពីថ្ងៃសុក្រ ទី២៩ ខែសីហា ឆ្នាំ២០២៥។ 

គោលបំណងក្នុងការបណ្តុះបណ្តាលគឺចង់ឱ្យនាយនាវី នាយនាវីរង ពលនាវិក ចេះប្រើម៉ាស៊ីនវាយតម្លៃដំណើរការបេះដូងឡើងវិញ (AED) Automated external defibrillator និងវិជ្ជាសង្គ្រោះបឋមមួយថ្មី ហើយមានប្រសិទ្ធភាពក្នុងការជួយដល់នាយនាវី នាយនាវីរង ពលនាវិក បម្រើការងារក្នុងអង្គភាព ពេលមានបញ្ហាគ្រោះថ្នាក់ដោយចៃដន្យក្នុងប្រការណាមួយទាំងក្នុងកន្លែងបំពេញការងារ  និងទាំងសហគមន៍ផងដែរ។

ឆ្លៀតក្នុងឱកាសនោះ លោក គាំ សុខុម នាយកសាខា ក៏បានផ្សព្វផ្សាយស្ដីពីប្រវត្តិចលនាកាកបាទក្រហមអឌ្ឍចន្ទក្រហម ច្បាប់មនុស្សធម៌អន្តរជាតិ គោលការណ៍គ្រឹះទាំង៧ បដិរូប និងសុខភាពជូនដល់សិក្ខាកាម ដើម្បីឱ្យយល់ដឹងកាន់តែច្បាស់អំពីសកម្មភាពរបស់កាកបាទក្រហមកម្ពុជា និងការថែទាំសុខភាពប្រចាំថ្ងៃ។

មេរៀនសំខាន់ៗរួមមាន៖ ១. ការយល់ដឹងពីកាកបាទក្រហម (ប្រវត្តិគំនិត១ សមាសភាគរបស់ចលនា បដិរូប និងសញ្ញាសម្គាល់ គោលការណ៍គ្រឹះរបស់ចលនា ប្រវត្តិ និងសកម្មភាពរបស់កាកបាទក្រហមកម្ពុជា ច្បាប់មនុស្សធម៌អន្តរជាតិ) និង២. វិជ្ជាសង្គ្រោះបឋម (តួនាទីអ្នកសង្រ្គោះ គោលការណ៍គ្រឹះ សភាពស្ហុក សន្លប់បាត់ស្មារតី ការដាក់ដំណេកសុវត្ថិភាព សន្លប់បាត់ដង្ហើម ការធ្វើCPR ស្លាក់ របួសស្រាល ធ្ងន់ ការហូរឈាម បាក់ឆ្អឹង និងការដឹកជញ្ជូនជនរងគ្រោះ)៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)