AKP កំពង់ធំ ថ្ងៃទី២៩ ខែសីហា ឆ្នាំ២០២៥-- ឯកឧត្តម នួន ផារ័ត្ន អភិបាលខេត្តកំពង់ធំ បានមានប្រសាសន៍ថា យើងត្រូវតែរួមគ្នាថែរក្សា ការពារព្រៃឈើ សត្វព្រៃ និងដាំដើមឈើឱ្យបានគ្រប់ៗគ្នា ក្នុងឱកាសដែលឯកឧត្តមនិងលោកជំទាវ អញ្ជើញចូលរួមក្នុងពិធីរុក្ខទិវាថ្នាក់ខេត្ត នៅតំបន់៤៤ ក្នុងភូមិសាស្ត្រឃុំក្រយា ស្រុកសន្ទុក ខេត្តកំពង់ធំ នាព្រឹកថ្ងៃទី២៩ ខែសីហា ឆ្នាំ ២០២៥។

ឯកឧត្តម នួន ផារ័ត្ន ថ្លែងថា ការដាំដើមឈើនាពេលនេះគឺជាការបន្តនូវវប្បធម៌ ប្រពៃណីដ៏ល្អ ដែលមានតាំងពីយូរលង់ណាស់មកហើយ ដើម្បីអភិវឌ្ឍ និងថែរក្សាព្រៃឈើ ដែលជាសម្បត្តិធម្មជាតិដ៏មានតម្លៃរបស់ជាតិ និងមនុស្សជាតិទូទៅ។ ព្រៃឈើជាសរសៃឈាមក្នុងវិស័យកសិកម្ម ជាអាយុជីវិតរបស់ប្រជាកសិករ និងជាប្រភពនៃកំណើនសេដ្ឋកិច្ចជាតិដូច្នេះ"យើងត្រូវតែរួមគ្នាថែរក្សា ការពារព្រៃឈើ សត្វព្រៃ និងដាំដើមឈើឱ្យបានគ្រប់ៗគ្នា”។

ទន្ទឹមនឹងនេះ ឯកឧត្តម នួន ផារ័ត្ន បានបំផុសស្មារតីដល់ប្រជាពលរដ្ឋ មន្ត្រីរាជការ កងកម្លាំង ប្រដាប់អាវុធគ្រប់ប្រភេទ និងអាជ្ញាធរដែនដីគ្រប់លំដាប់ថ្នាក់ ចូលរួមដាំដើមឈើគ្រប់ប្រភេទឱ្យបានច្រើនជាអតិបរិមា នៅតាមវត្តអារាម តាមភូមិឋាន តាមទីសាធារណៈ តាមប្រព័ន្ធទំនប់ប្រឡាយ តាមដងផ្លូវនានា ហើយខិតខំថែរក្សារុក្ខជាតិទាំងអស់នេះឱ្យដុះ លូតលាស់ឡើង ជាផលប្រយោជន៍ដល់ខ្លួនឯងផ្ទាល់ ក៏ដូចមនុស្សជាតិ លើពិភពលោក រាប់ជំនាន់ក្រោយៗទៀត។ងវិញទៀតដើម្បីរួមចំណែកបង្កើនគម្របព្រៃឈើបានជាអេកូទេសចរណ៍ ដែលបង្កើតការងារ និងជាប្រភពចំណូលដ៏សំខាន់របស់សហគមន៍មូលដ្ឋាន តាមរយៈការទាក់ទាញភ្ញៀវទេសចរណ៍ជាតិ និងអន្តរជាតិ។ ព្រៃឈើក៏បានដើរតួនាទីក្នុងការថែរក្សានូវមរតវប្បធម៌ សិល្បៈ ជំនឿ សាសនា និងចំណេះ ដឹងអន្តោគ្រាមន៍របស់ជនជាតិដើមពីជំនាន់មួយទៅជំនាន់មួយ មានដូចជា ការផលិតឱសថបូរាណ ព្រៃអារក្ស អ្នកតា ជាដើម។

យោងតាមរបាយការណ៍របស់លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ បានឱ្យដឹងថា កូនឈើដែលបានដាំនៅថ្ងៃនេះមានចំនួន៦ប្រភេទ រួមមាន ធ្នង់ គ្រញូង នាងនួន ម៉ៃសាក់ ឈើទាល ស្លៀក សរុបចំនួន៣ ០០០ដើម លើផ្ទៃដីទំហំ៦ហិកតា៕

ដោយ ស៊ុម វណ្ណា