AKP ក្វាងស៊ី ថ្ងៃទី២៥ ខែសីហា ឆ្នាំ២០២៥--កម្មវិធីខេត្តក្វាងស៊ីកកមុងក្រសែភ្នែក៤បស់ប្រព័ន្ធផ្សព្វផ្សាយអន្តរជាតិឆ្នាំ២០២៥ ក្រោមប្រធានបទ «ការចែករំលែកឱកាសថ្មីនៃយុគសម័យបញ្គាសិប្បនិម្មិត និងធ្វើការរួមគ្នាទៅអនាគត» ត្រូវបានសម្ពោធជាផ្លូវការនៅទីក្រុងឆុងហ្សូ ខេត្តក្វាងស៊ី របស់ប្រទេសចិន ដោយមានអ្នកសារព័ត៌មានកម្ពុជា និងអ្នកសារព័ត៌មានមកពីបណ្តាប្រទេសផ្សេងទៀតនៅអាស៊ានចូលរួមសរុបចំនួន ២៧នាក់ដែលសុទ្ធតែអ្នកមកពីបណ្តាញផ្សព្វផ្សាយសំខាន់ៗ និងមានឥទ្ធិពលលើប្រព័ន្ធ។

ក្វាងស៊ី ជាខេត្តតែមួយគត់របស់ប្រទេសចិន ដែលមានព្រំប្រទល់ដែនគោក និងដែនសមុទ្រជាមួយអាស៊ាន បម្រើជាច្រកព្រំដែន និងជាច្រកសម្រាប់កិច្ចសហប្រតិបត្តិការ និងការផ្លាស់ប្តូររវាងចិន និងអាស៊ាន។  ដោយប្រើប្រាស់អត្ថប្រយោជន៍ភូមិសាស្រ្តរបស់ខ្លួន ធនធានដ៏សម្បូរបែប និងសក្ដានុពលនៃការអភិវឌ្ឍ ខេត្តក្វាងស៊ីកំពុងបង្កើតយ៉ាងសកម្មនូវប្រព័ន្ធអេកូឧស្សាហកម្មបញ្ញាសិប្បនិម្មិត (AI) នៃការស្រាវជ្រាវ និងអភិវឌ្ឍន៍នៅក្នុងទីក្រុងប៉េកាំង សៀងហៃ និងក្វាងចូវ + សមាហរណកម្មក្នុងកម្មវិធីក្វាងស៊ី + ក្នុងអាស៊ាន។

កម្មវិធីដែលមានរយៈពេលប្រាំពីរថ្ងៃនេះ ត្រូវបានរៀបចំឡើងដោយការិយាល័យព័ត៌មានរបស់រដ្ឋាភិបាលប្រជាជននៃតំបន់ស្វយ័តក្វាងស៊ី ហ្ស័ង សហការជាមួយសេវាកម្មព័ត៌មានចិនសាខាខេត្តក្វាងស៊ី។

អ្នកសារព័ត៌មានកម្ពុជា រួមជាមួយអ្នកសារព័ត៌មានដទៃទៀតមកពីអាស៊ាន ដែលរួមមានវៀតណាម ឡាវ ថៃ មីយ៉ាន់ម៉ា ម៉ាឡេស៊ី និងសិង្ហបុរី បាននិងកំពុងទស្សនកិច្ចខេត្តក្វាងស៊ី ដើម្បីទទួលយកបទពិសោធន៍នៃការអភិវឌ្ឍដោយផ្ទាល់ និងឃើញអំពីសមិទ្ធិផលផ្លែផ្កានៃកិច្ចសហប្រតិបត្តិការចិន-អាស៊ានក្នុងយុគសម័យ AI ៕

ដោយ: យា ចិន្តាខន្តី