AKP សៀមរាប ថ្ងៃទី២៥ ខែសីហា ឆ្នាំ២០២៥-- ឯកឧត្តម ហឿន សំនៀង អ្នកនាំពាក្យក្រុមប្រឹក្សាអភិវឌ្ឍន៍កម្ពុជា និងព្រះមន្រ្តីសង្ឃខេត្តសៀមរាប កាលពីថ្ងៃទី២៤ ខែសីហា ឆ្នាំ២០២៥ បាននាំយកស្បៀងអាហារទៅចែកជូនដល់ពលករដែលត្រឡប់មកពីប្រទេសថៃ ប្រជាពលរដ្ឋភៀសសឹក និងប្រជាពលរដ្ឋមានជីវភាពខ្វះខាតចំនួន១០០គ្រួសារស្ថិតនៅឃុំរោង ស្រុកសូទ្រនិគម ខេត្តសៀមរាប ក្នុងគោលបំណងជួយគ្នាក្នុងគ្រាលំបាក។

ឯកឧត្តម ហឿន សំនៀង បានថ្លែងថា ស្បៀងអាហារទាំងនេះទោះបីវាមិនច្រើន តែជាទឹកចិត្តមនុស្សធម៌ជួយគ្នាក្នុងគ្រាលំបាកដោយចេញពីចិត្តរបស់យើងទាំងអស់គ្នា។ ឯកឧត្តមបន្តថា ក្នុងដំណាក់កាសនេះប្រទេសជាតិយើងជួបបញ្ហាដោយមានការឈ្លានពានពីយោធាប្រទេសថៃ ដូចនេះទាំងរាជរដ្ឋាភិបាល ព្រះសង្ឃ ក៏ដូចជាប្រជាពលរដ្ឋទូទាំងប្រទេសកំពុងតែខ្វល់ខ្វាយ និងកំពុងតែ រួបរួម សាមគ្គីគ្នា ក្នុងការការពារទឹកដីរបស់យើង ហើយការឈ្លានពានរបស់ប្រទេសថៃមកលើទឹកដីកម្ពុជានេះ គឺជាទង្វើដ៏ព្រៃផ្សៃបំផុត ហើយនៅក្នុងសង្គ្រោមនៅព្រំដែនកម្ពុជា-ថៃ រយៈពេល៥ថ្ងៃកន្លងមកនេះ បានបង្ហាញថា សៀមគ្មានទឹកចិត្តគ្មានមនុស្សធម៌មកលើខ្មែរយើងទេ គេមានបំណងបំផ្លាញប្រទេសយើង។

ឯកឧត្តមបានបន្តថា បើយើងមានអ្នកជិតខាងល្អដូចមានមាស តែបើមានអ្នកជិតខាងអាក្រក់ដូចមានគ្រាប់បែក ក្នុងន័យនេះឯកឧត្តមសូមឱ្យបងប្អូនត្រូវតែរួបរួមសាមគ្គី ដើម្បីធ្វើឱ្យប្រទេសយើងខ្លាំងទើបពុំមានអ្នកណាហានធ្វើបាបយើង។ ហើយដើម្បីរួមចំណែកធ្វើឱ្យប្រទេសយើងខ្លាំងបាននៅពេលអនាគត់ប្រជាពលរដ្ឋ ត្រូវឱ្យកូនទៅរៀនឱ្យបានច្រើនមានចំណេះដឹងខ្ពង់ខ្ពស់ មកចូលអភិវឌ្ឍន៍ប្រទេសយើង ខ្មែរសាមគ្គីខ្មែរខ្លាំង។

សូមបញ្ជាក់ថា ការផ្ដល់ជូនស្បៀងអាហារនៅពេលនេះ មិនមែនដោយសាររាជរដ្ឋាភិបាលខ្វះខាតនោះទេ តែជាការចូលរួមជួយឧបត្ថម្ភបន្ថែមក្នុងស្មារតីខ្មែររួបរួមសាមគ្គីគ្នា ជួយគ្នាក្នុងគ្រាលំបាក។ ឯកឧត្តមក៏បានសូមថ្លែងអំណរគុណដល់សប្បុរសជនទាំងអស់ទាំងក្នុងប្រទេស និងក្រៅប្រទេស ដែលមានស្មារតីស្រឡាញ់ជាតិ ដោយបានចូលរួមឧបត្ថម្ភគ្រឿងឧបភោគបរិភោគ និងថវិកាដើម្បីគាំទ្រដល់សមរភូមិជួរមុខ ដោយទឹកចិត្តស្មោះសរក្នុងការរួបរួមជាតិខ្មែរជាធ្លុងមួយដោយស្មារតីខ្មែរជួយខ្មែរក្នុងគ្រាលំបាក៕

ដោយ ឃុត សៅ