AKP ភ្នំពេញ ថ្ងៃទី២១ ខែសីហា ឆ្នាំ២០២៥-- ឯកឧត្ដម សំ រិទ្ធី រដ្ឋលេខាធិការក្រសួងមុខងារសាធារណៈ និងជាប្រធានក្រុមការងាររៀបចំចងសម្ព័ន្ធមេត្រីភាព តំណាងដ៏ខ្ពង់ខ្ពស់ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ កាលពីថ្ងៃទី២០ ខែសីហា ឆ្នាំ២០២៥ បានអញ្ជើញចុះជួបសំណេះសំណាលសួរសុខទុក្ខកងកម្លាំងនៅបញ្ជាការដ្ឋានរថក្រោះ ខេត្តកំពង់ស្ពឺ ដោយមានការអញ្ជើញចូលរួមពីថ្នាក់ដឹកនាំ និងកងកម្លាំងនៃអង្គភាពចំណុះបញ្ជាការដ្ឋានរថក្រោះ និងក្រុមការងារក្រសួងមុខងារសាធារណៈប្រមាណ៥០នាក់។

ឯកឧត្តមរដ្ឋលេខាធិការបាននាំយកនូវប្រសាសន៍សួរសុខទុក្ខដ៏ខ្ពង់ខ្ពស់របស់ឯកឧត្តមឧបនាយករដ្ឋមន្ត្រីថា យើងទាំងអស់គ្នាជាខឿនការពារប្រជាជន ស្ថិតក្នុងសមរភូមិក្រោយ តែងតែខ្វល់ខ្វាយ និងគាំទ្រដល់សមរភូមិមុខជាប់ជានិច្ច ចំពោះស្មារតីលះបង់ និងឆន្ទៈខ្ពស់របស់វីរយុទ្ធជនយើងក្នុងការការពារបូរណភាពដែនដីពីការឈ្លានពានបូរណភាពទឹកដីខ្មែរ។

ទន្ទឹមនឹងនេះ ឯកឧត្តមរដ្ឋលេខាធិការ និងក្រុមការងារ ក៏បាននាំយកអំណោយរបស់ឯកឧត្តមឧបនាយករដ្ឋមន្ត្រី ជូនបញ្ជាការដ្ឋានកងរថក្រោះ រួមមានគ្រឿងឧបភោគបរិភោគ និងថវិកាមួយចំនួន ដើម្បីបន្តការសាងសង់ និងសម្រាប់បំពាក់គ្រឿងបរិក្ខាក្នុងអគារថ្មី។ ប្រតិភូក្រសួងមុខងារសាធារណៈ និងថ្នាក់ដឹកនាំកងកម្លាំងបញ្ជាការដ្ឋានកងរថក្រោះ បានចុះពិនិត្យការដ្ឋានសំណង់អគារការិយាល័យរដ្ឋបាល និងអគារប្រជុំ ដែលកំពុងសាង់សង់នៅទីនោះផងដែរ៕

ដោយ៖ ពេជ្រ សំអឿន (ប្រភព៖ ក្រសួងមុខងារសាធារណៈ)