AKP កំពង់ធំ ថ្ងៃទី២០ ខែសីហា ឆ្នាំ២០២៥-- ត្រីសាម៉ុន គ្រឿងក្នុងសត្វមាន់ និងទំនិញមួយចំនួនទៀតសរុបជាង៥តោន ជាទំនិញមិនមានលិខិតស្នាមបញ្ជាក់ ព្រមទាំងការដឹកជញ្ជូនពុំត្រឹមត្រូវតាមបច្ចេកទេស ត្រូវបានកម្លាំងសមត្ថកិច្ចជំនាញពាក់ព័ន្ធខេត្តកំពង់ធំបង្ក្រាប បាន និងដុតបំផ្លាញចោលនៅព្រឹកថ្ងៃទី២០ ខែសីហា ឆ្នាំ២០២៥។

លោក ឧត្តមសេនីយ៍ត្រី វ៉ា ចាន់ កុសល ស្នងការរងនៃស្នងការដ្ឋាននគរបាលខេត្តកំពង់ធំ ទទួលផែនប្រឆាំងបទល្មើសសេដ្ឋកិច្ច បានគូសបញ្ជាក់ថា ដោយមានការចង្អុលបង្ហាញពីលោកឧត្តមសេនីយ៍ទោ ហេង សុផល ស្នងការនៃស្នងការដ្ឋាននគរបាលខេត្តកំពង់ធំ បានចាត់បញ្ជាឱ្យលោកដឹកនាំកម្លាំងការិយាល័យនគរបាលប្រឆាំងបទល្មើសសេដ្ឋកិច្ច សហការជាមួយមន្រ្តីជំនាញ អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) និងខណ្ឌរដ្ឋបាលជលផល និងមានសម្របសម្រួលនិតិវិធីច្បាប់ដោយលោក សាយ វាសនា ព្រះរាជអាជ្ញារងអយ្យការអមសាលាដំបូងខេត្តកំពង់ធំ បានចុះធ្វើការបង្ក្រាបរថយន្តក្រុង ម៉ាក ហ៊ីយិនដាយ ពណ៌ខៀវ មួយគ្រឿង ពាក់ស្លាកលេខ (ភ្នំពេញ 3D-3941) ដឹកជញ្ជូននាំចូលផលិតផលជលផល គ្រឿងក្នុងសត្វមាន់ ទឹកស៊ីអ៊ីវ និងវ៉ាសាបី មិនមានលិខិតស្នាមអ្វីបញ្ជាក់ វេចខ្ចប់មិនត្រឹមត្រូវតាមបច្ចេកទេស ខូចគុណភាពខុសច្បាប់។

សម្ភារវត្ថុតាងទាំងអស់រួមមាន៖ ១. ត្រីសាមុន១៤០កេស ស្មើនឹង៣០១០គីឡូក្រាម។ ២. គ្រឿងក្នុងសត្វមាន់២១០កេសស្មើនឹង២៥២០គីឡូក្រាម។ ៣. ទឹកស៊ីអ៊ីវ១០០កានស្មើនឹង៤០០លីត្រ។ ៤. វ៉ាសាបី២កេសស្មើនឹង១០០គីឡូក្រាម។ ការដុតកម្ទេចចោលទំនិញនេះធ្វើឡើងយោងតាមស្មារតីអង្គប្រជុំចុះថ្ងៃទី១៩ ខែសីហាឆ្នាំ២០២៥ របស់ក្រុមការងារចម្រុះ ដែលសម្របសម្រួលដោយស្ថាប័នអយ្យការអមសាលាដំបូងខេត្តកំពង់ធំ ស្តីពីការត្រួតពិនិត្យវាយតម្លៃគុណភាពលើទំនិញនាំចូលគ្រប់ប្រភេទបានសម្រេចដុតកម្ទេចចោលចំពោះទំនិញខូចគុណភាព និងខុសច្បាប់ ហើយកសាងនិតិវិធីតាមជំនាញរៀងៗខ្លួន។

លោក ហេង ភារម្យ ប្រធានសាខាក.ប.ប បានបញ្ជាក់ថា ការបង្ក្រាបបទល្មើសខាងលើនេះធ្វើឡើងកាលពីថ្ងៃទី១៨ ខែសីហា ឆ្នាំ២០២៥ វេលាម៉ោង១៣ និង៤០នាទី ត្រង់ចំណុចស្ពានស័កបីអ៊ុ ភូមិវល្លិ៍យាវ ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ។ ការសម្រេចដុតកម្ទេសចោលទំនិញខាងលើនេះគឺអនុវត្តតាមបទបញ្ជារបស់រាជរដ្ឋាភិបាល ក៏ដូចជាអគ្គនាយកដ្ឋានគយ និងរដ្ឋាករ មានវិធានការទប់ស្កាត់មិនឱ្យនាំចូលទំនិញមួយចំនួនខុសច្បាប់ដឹកចេញពីព្រំដែននៃព្រះរាជាណាចក្រកម្ពុជា៕

ដោយ ស៊ុម វណ្ណា (ប្រភព៖ សាលាដំបូងខេត្តកំពង់ធំ)