AKP ឧត្តរមានជ័យ ថ្ងៃទី០៧ ខែសីហា ឆ្នាំ២០២៥--ឯកឧត្ដម មាន ចាន់យ៉ាដា អភិបាលខេត្តឧត្តរមានជ័យ បានឱ្យដឹងថា ចិនជួយជួសជុលផ្ទះប្រជាពលរដ្ឋពលរដ្ឋ និងផ្ទះយោធា ដែលរងការបំផ្លិចបំផ្លាញដោយទាហានឈ្លានពានថៃ និងជួយស្ដារហេដ្ឋារចនាម្ព័ន្ធចាំបាច់មួយចំនួនទៀត ដើម្បីសម្រាលបន្ទុកប្រជាពលរដ្ឋដែលរស់នៅតំបន់រងគ្រោះដោយសារសង្រ្គាម។

ប្រាប់អ្នកសារព័ត៌មាន នៅជំរំជនភៀសសឹក ក្នុងខេត្តឧត្តរមានជ័យ កាលពីថ្ងៃទី០៦សីហាម្សិលមិញ ឯកឧត្ដម អភិបាលខេត្តឧត្តរមានជ័យ បានបញ្ជាក់ថា ជំនួយរបស់ចិននេះ សម្រាប់ជួសជុលផ្ទះប្រជាពលរដ្ឋ៣០ផ្ទះ និងផ្ទះយោធាចំនួន៦៦ផ្ទះ។ ក្រៅពីនោះជួយជុលវត្តតាមាន់សែនជ័យ ដែលរងការបំផ្លិចបំផ្លាញទាំងស្រុង និងជួយពង្រឹងហេដ្ឋារចនាសម្ព័ន្ធទឹកស្អាត និងប្រព័ន្ធអគ្គិសនី។

ផេករដ្ឋបាលខេត្តឧត្តរមានជ័យ បានឱ្យដឹងបន្ថែមថា តំណាងទូតចិន យកថវិកា១០ម៉ឺនដុល្លារ ជូនដល់រដ្ឋបាលខេត្តឧត្តរមានជ័យ សម្រាប់ជួសជុលផ្ទះពលរដ្ឋ និងហេដ្ឋារចនាសម្ព័ន្ធមួយចំនួនដែលរងការបំផ្លាញ ដោយគ្រាប់ផ្លោងរបស់ទាហានថៃ។ ថវិកាទាំងនោះ នឹងប្រើប្រាស់សម្រាប់យកទៅរៀបចំមណ្ឌលសុវត្ថិភាពជនភៀសសឹក និងជួសជុលផ្ទះប្រជាពលរដ្ឋ និងវត្តអារាមដែលរងផលប៉ះពាល់ពីសង្គ្រាមឈ្លានពានរបស់កងទ័ពថៃលើកម្ពុជា។

សូមរម្លឹកជូនថា នៅថ្ងៃទី០៦ខែសីហា ឆ្នាំ២០២៥ម្សិលមិញ តំណាងស្ថានបេសកកម្មការទូត និងទីភ្នាក់ងារUN ក៏បានទៅដល់ជំរំជនភៀសសឹកកម្ពុជាចំនួន៣ទីតាំងផ្សេងគ្នា ដែលក្នុងនោះមានជំរំជនភៀសសឹកនៅភូមិពោធិ៍ចាស់ ស្រុកបន្ទាយអំពិល ខេត្តឧត្តរមានជ័យ , ជំរំជនភៀសសឹកនៅភូមិបាត់ថ្កៅ ឃុំចុងកាល់ ស្រុកចុងកាល់ ខេត្តឧត្តរមានជ័យ, និងជំរុំជនភៀសសឹក (ស្រីស្នំ) ដែលស្ថិតនៅក្នុងស្រុកស្រីស្នំ ខេត្តសៀមរាប។

ចំណែកឯ តំណាងស្ថានទូត និងទីភ្នាក់ងាររបស់អង្គការសហប្រជាជាតិ (UN) រួមទាំងអង្គការសុខភាពពិភពលោក (WHO) និងអង្គការពាក់ព័ន្ធផ្សេងទៀត បានអញ្ជើញចុះត្រួតពិនិត្យដល់ទីតាំងផ្ទាល់ របស់ប្រជាពលរដ្ឋកម្ពុជា ដែលបានភៀសសឹក ដោយគ្រាប់ផ្លោងរបស់យោធាថៃ ដែលបានបាញ់មកលើកម្ពុជាតាំងពីថ្ងៃទី២៤ ខែកក្កដា ឆ្នាំ២០២៥៕

ដោយ៖ គង់ សិរីរ័ត្ន, រូបថត៖ សំ សាម៉ន