AKP ភ្នំពេញ ថ្ងៃទី០៧ ខែសីហា ឆ្នាំ២០២៥-- ឯកឧត្តម អុល រ៉ូ  រដ្ឋលេខាធិការ និងជាអនុប្រធានប្រចាំការ គណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការនៃក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី០៦ ខែសីហា ឆ្នាំ២០២៥ បានអញ្ជើញជាអធិបតីបើកវគ្គបណ្តុះបណ្តាលស្តីពីការអនុវត្តមុខងារនៃវិស័យសង្គមកិច្ច អតីតយុទ្ធជន និង យុវនីតិសម្បទា សម្រាប់មន្ត្រីទទួលបន្ទុកជាបុគ្គលិកសង្គមកិច្ច «អ្នកអាជីពសង្គមកិច្ចរង» ក្រុង ស្រុក ក្នុង ខេត្តព្រៃវែង។

ឯកឧត្តម អុល រ៉ូ បានលើកឡើងថា វគ្គបណ្តុះបណ្តាលនេះបានបញ្ជ្រាប និងពង្រឹងសមត្ថភាពមន្ត្រីពាក់ព័ន្ធដែលបានចូលរួម ពិសេសសម្រាប់មន្ត្រី ទទួលបន្ទុកជាបុគ្គលិកសង្គមកិច្ច ក្រុង ស្រុក ខណ្ឌ ដើម្បីអនុវត្តមុខងារប្រកបដោយប្រសិទ្ធភាព និងប្រសិទ្ធផល ស្របតាមឧបសម្ព័ន្ធទី១ និងឧបសម្ព័នទី៣ ចំណុច «ដ» វិស័យសង្គមកិច្ច អតីតយុទ្ធជន និងយុវនីតិសម្បទា នៃអនុក្រឹត្យលេខ ១៨២ ១៨៣ ១៨៤ មាត្រា៦នៃអនុក្រឹត្យលេខ ៣៤ និងសៀវភៅ ណែនាំស្តីពីការអនុវត្តមុខងារ និងក្របខ័ណ្ឌច្បាប់និងលិខិតបទដ្ឋានគតិយុត្ត។

ក្នុងវគ្គបណ្តុះបណ្តាលនេះ មានការអញ្ជើញចូលរួមពីឯកឧត្តមអនុរដ្ឋលេខាធិការ ឯកឧត្តមអគ្គនាយក ឯកឧត្តមនាយកវិទ្យាស្ថានជាតិសង្គមកិច្ច លោកជំទាវអភិបាលរងខេត្ត តំណាងអង្គភាពពាក់ព័ន្ធ លោកប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តព្រៃវែង លោក លោកស្រី តំណាង ការិយាល័យសង្គមកិច្ចនិងសុខុមាលភាពសង្គមទាំង ១៣ក្រុងស្រុក មណ្ឌលថែទាំកុមាររបស់រដ្ឋនិងអង្គការ និងដៃគូអភិវឌ្ឍន៍ ក្នុងខេត្តព្រៃវែងសរុបចំនួន៨២នាក់ ស្រី៣០នាក់៕

ដោយ ណយ នឿន (ប្រភព៖ ក្រសួងសង្គមកិច្ច)