AKP ភ្នំពេញ ថ្ងៃទី០៦ ខែសីហា ឆ្នាំ២០២៥---
ក្រសួងព័ត៌មាន និងកាកបាទក្រហមកម្ពុជាបានបើកសិក្ខាសាលាស្តីពីប្រវត្តិចលនាអន្តរជាតិ គោលការណ៍គ្រឹះ ច្បាប់មនុស្សធម៌អន្តរជាតិក្នុងបរិការណ៍សាកលលោកបច្ចុប្បន្ន និងកាកបាទក្រហមកម្ពុជា ដើម្បីបញ្ជ្រាបចំណេះដឹងដល់អ្នកសារព័ត៌មាន និងមន្រ្ដីរាជការក្រសួងព័ត៌មាន។
ថ្លែងក្នុងបើកសិក្ខាសាលា នារសៀលថ្ងៃទី០៦ ខែសីហា ឆ្នាំ២០២៥ នៅទីស្តីការក្រសួងព័ត៌មាន ឯកឧត្តម ជុំ កុសល រដ្ឋលេខាធិកាក្រសួងព័ត៌មានបានបញ្ជាក់ថា សិក្ខាសាលានាពេលនេះពិតជាមានសារៈសំខាន់ណាស់ក្នុងការផ្សព្វផ្សាយពីគោលការណ៍ និងតួនាទីរបស់កាកបាទក្រហម។ ឯកឧត្តមបានថ្លែងបញ្ជាក់ថា៖ «សិក្ខាសាលាដែលរៀបចំឡើងនៅពេលនេះគឺស្របពេលនឹងស្ថានភាពរបស់កម្ពុជា ដែលបានកំពុងរងការឈ្លានពានពីសំណាក់ភាគីថៃជាជាអមិត្តបានធ្វើការឃ្លានពានលើដែនអធិបតេយ្យកម្ពុជា»។ ឯកឧត្តមរដ្ឋលេខាធិការបានលើកឡើងថា កាកបាទក្រហមគឺជាស្ថាប័នដ៏ធំមួយនៅក្នុងប្រទេសកម្ពុជា ក្នុងការជួយសង្គ្រោះប្រជាពលរដ្ឋដែលជួបទុក្ខភ័យដោយមិនប្រកាន់ជាតិសាសន៍ និងនិន្នាការនយោបាយឡើយ។ ក្រៅពីផ្តល់ជាសម្ភារ កាកបាទក្រហមក៏បានជួយផ្សព្វផ្សាយពាក់ព័ន្ធនឹងសុខភាពប្រជាពលរដ្ឋគ្រប់រូបក្នុងការរស់នៅប្រចាំថ្ងៃ។ 

ឯកឧត្ដមរដ្ឋលេខាធិការបានបន្ដថា កាកបាទក្រហម និងអឌ្ឍច័ន្ទក្រហមកម្ពុជា មានតួនាទីជាចម្បងក្នុងការផ្តល់ជំនួយ និងការការពារសិទ្ធិ ដល់ជនរងគ្រោះក្នុងស្ថានភាពសង្គ្រាម ដោយការពារជីវិតជនរងគ្រោះ ដោយធានាថាសេចក្តីថ្លៃថ្នូរ និងជីវិតមិនត្រូវបានរើសអើង  ឬបំពានទោះបីជាមានសង្គ្រាមកើតឡើងក៏ដោយ។ 

ជាមួយគ្នានេះ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជាបានឱ្យដឹងថាកាកបាទក្រហមកម្ពុជាបានរៀបចំសិក្ខាសាលានេះឡើងស្របស្ថានភាពកម្ពុជាដែលត្រូវបានថៃធ្វើការឃ្លានពាននៅតាមបណ្តោយព្រំដែនដែលជាដែនអធិបតេយ្យកម្ពុជា។
លោកជំទាវបន្ថែមថា សិក្ខាសាលានេះ ក៏នឹងចូលរួមលើកកម្ពស់ការយល់ដឹងបន្ថែមទៀតពីការការពារ និងគោរព ពីតួនាទីកាកបាទក្រហម និងយល់ដឹងពីច្បាប់មនុស្សធម៌អន្តរជាតិ ហើយយើងក៏បានយល់ដឹងពីតួនាទី ភារកិច្ចរបស់កាកបាទក្រហមកម្ពុជាតើមានអ្វីក្នុងការជួយនៅពេលបច្ចុប្បន្នផងដែរ៕

ដោយ៖ ប៊ុនរិទ្ធ រូបថត៖ ខឹម សុវណ្ណារ៉ា