AKP ព្រះវិហារ ថ្ងៃទី ០៦ ខែ សីហា ឆ្នាំ ២០២៥….

លោក មិន ស៊ីថា អភិបាលរង នៃ គណៈអភិបាលខេត្តព្រះវិហារបានបញ្ជាក់ឱ្យដឹងថា គិតមកដល់ពេលបច្ចុប្បន្នមានមណ្ឌលសុវត្ថិភាពជនភៀសសឹកសរុប១៩កន្លែង នៅក្នុងខេត្តព្រះវិហារ ហើយពលរដ្ឋដែលទទួលរងការវាយប្រហារខ្លាំងពីសំណាក់កងទ័ពថៃគឺប្រជាពលរដ្ឋរស់នៅក្នុងស្រុកជាំក្សាន្ត មានច្រើនជាងគេបានមកស្នាក់នៅក្នុងមណ្ឌលសុវត្ថិភាពជនភៀសសឹក។

ថ្លែងប្រាប់ក្រុមអ្នកសារព័ត៌មាន នាថ្ងៃទី០៥ ខែសីហា ឆ្នាំ២០២៥ លោក លោក មិន ស៊ីថា បានលើកឡើងថា បើគិតអំពីស្ថានភាពជនភៀសសឹកនៅមណ្ឌលសុវត្ថិភាព វត្តទួលអណ្ដែត ស្ថិតក្នុងភូមិថ្មី ឃុំថ្មី ស្រុកគូលែន ខេត្តព្រះវិហារ ត្រឹមថ្ងៃទី០៣ ខែសីហា ឆ្នាំ២០២៥ មានចំនួនប្រមាណ១ពាន់គ្រួសារ ឬប្រមាណជាង៤ពាន់នាក់។

លោកអភិបាលរងខេត្ដបានថ្លែងថា ស្រុកជាំក្សាន្តទាំងមូលបានទទួលរងនូវផលលំបាកដោយសារជម្លោះព្រំដែនរវាងកម្ពុជា-ថៃនាកន្លងមក ហើយក្នុងចំណោមជនភៀសសឹកទាំងនេះ គឺភាគច្រើនពួកគាត់មកពីស្រុកជាំក្សាន្តដែលក្នុងចំណោម៨ឃុំ ក្នុងស្រុកនេះគឺមានពលរដ្ឋស្ទើរទាំងអស់បាននាំគ្រួសារ ឬបងប្អូនធ្វើដំណើរគេចចេញដោយសារតែសង្រ្គាមឈ្លានពានពីសំណាក់ភាគីថៃ។ លោកអភិបាលរងខេត្ដបានអះអាងថា៖ «ពលរដ្ឋសម្រុកមករស់នៅតាមជំរុំភៀសខ្លួននេះចាប់តាំងតែពីថ្ងៃទី ២៤ ខែកក្កដា ឆ្នាំ ២០២៥មកម្ល៉េះ តែក្រោយបទឈប់បាញ់កាលពីថ្ងៃទី ២៨ ខែ កក្កដា ឆ្នាំ ២០២៥ ជនភៀសសឹកមានភាពស្ងប់ស្ងាត់បន្តិច។ ទោះបីយ៉ាងណាឈានដល់ថ្ងៃទី០៣ ខែសីហា ឆ្នាំ ២០២៥ សភាពការណ៍ផុយស្រួយឡើងវិញដោយមានការបញ្ជាក់ប្រាប់ពីសំណាក់ក្រសួងការពារជាតិកម្ពុជា។ ពលរដ្ឋមួយចំនួនដែលវិលត្រឡប់ទៅលំនៅឋានវិញក៏នាំគ្នាសម្រុកត្រឡប់មកទីមណ្ឌលសុវត្ថិភាពឡើងវិញផងដែរ ហើយយើងឃើញមានការកើនឡើងយ៉ាងគំហុកតាមជំរុំមួយចំនួនទៀត»។
ជាមួយគ្នានេះ លោកអភិបាលរងខេត្តព្រះវិហារបានឱ្យដឹងបន្ថែមថា ក្នុងចំណោមពលរដ្ឋដែលជាជនភៀសសឹកនៅក្នុងស្រុកជាំក្សាន្ត ដែលមានចំនួនប្រមាណ៣ម៉ឺន ទៅ៤ម៉ឺននាក់នេះគឺមកស្នាក់នៅតាមជំរុំទាំង១៩ ក្នុងខេត្តព្រះវិហារនេះគឺស្ទើរទាំងអស់។ លោកបានបញ្ជាក់ឱ្យដឹងផងដែរថា ដោយឡែក សម្រាប់ស្បៀងអាហាររបស់គាត់ត្រូវបានផ្គត់ផ្គង់គ្រប់គ្រាន់ តែមិនបរិបូណ៍ពេកដែរទេ ហើយបើស្ថានការណ៍នៅតែអូសបន្លាយបន្តទៀតស្បៀងទាំងនេះក៏មានតម្រូវការបន្ថែមទៀតដូចគ្នា។

បើតាមលោក មិន ស៊ីថា អភិបាលរងខេត្ដព្រះវិហារ ចំពោះស្ថានការណ៍វិលត្រឡប់ទៅផ្ទះសម្បែងរបស់ប្រជាពលរដ្ននៅពេលនេះនៅតែប្រឈមដោយសារតែថៃមិនព្រមបញ្ចប់សង្រ្គាមដោយគោរពតាមបទឈប់បាញ់។ ក្រៅពីនេះដោយសារការឈ្លានពានរបស់ភាគីថៃនាពេលថ្មីៗមកនេះ ដោយបានទម្លាក់គ្រាប់បែកពីយន្តហោះ ពិសេសបានបាញ់គ្រាប់បែកចង្កោមដែលអន្តរជាតិបានហាមឃាត់។

លោកបានលើកឡើងបន្ថែមផងដែរថា គ្រាប់បែកចង្កោមនេះមួយចំនួនបានផ្ទុះ ហើយមួយចំនួនទៀតបានបង្កប់ក្នុងដីដែលងាយគ្រោះថ្នាក់បំផុតសម្រាប់ពលរដ្ឋដែលជាអ្នកស្រែចម្ការ។ ក្រៅពីនេះ ថៃ ក៏បានបាញ់ផ្សែងពុលថែមទៀតដែលបង្កការប៉ះពាល់ដល់សុខភាពពលរដ្ឋធ្ងន់ធ្ងរ ហើយក៏បានបង្កការពុលដល់ទឹក ដល់ខ្យល់ បន្លែបង្ការ និងត្រីសាច់សម្រាប់ការហូបចុករបស់ពលរដ្ឋ ជាដើម។ លោកបានសង្កត់ធ្ងន់ថា៖ «បច្ចុបន្ននេះស្រុកជាំក្សាន្ត ត្រូវបានគ្រប់ដណ្ដប់ពោរពេញទៅដោយផ្សែងពុលដែលយើងមិនអាចចូលដល់ស្រុកបានទេ បើយើងទៅត្រូវពាក់ម៉ាស់ត្រឹមត្រូវ។ ក្រៅពីនេះផ្ទះសម្បែង វត្តអារាមមួយចំនួនទទួលរងខ្ទេចខ្ទាំដោយការវាយប្រហារពីសំណាក់កងទ័ពឈ្លានពានថៃ»។

ក្នុងឱកាសនោះ លោកអភិបាលរងខេត្ដបានជម្រាបជូនផងដែរថា ដើម្បីជួយទ្រទ្រង់ដល់ពលរដ្ឋជាជនភៀសសឹកនោះ គឺមានខាងកាកបាទក្រហមកម្ពុជា និងសម្បុរសជនបានជួយបន្តបន្ទាប់ ដើម្បីជួយសម្រាលដល់ភាពលំបាករបស់ប្រជាពលរដ្ឋជាជនភៀសសឹកក្នុងអំឡុងដែលកងទ័ពថៃឈ្លានពាននេះ៕

ដោយ៖ មករា រូបថត៖ សំ សាម៉ន