AKP ស្វាយរៀង ថ្ងៃទី០៦ ខែសីហា ឆ្នាំ២០២៥-- ឯកឧត្តម ប៉េង ពោធិ៍សា អភិបាលនៃគណៈអភិបាលខេត្តស្វាយរៀង បានថ្លែងថា ជាការពិតណាស់ការងារអត្តសញ្ញាណកម្មគឺជាការងារដ៏មានសារៈសំខាន់ និងជាកិច្ចការអាទិភាពមួយក្នុងការចូលរួមចំណែកអភិវឌ្ឍន៍ប្រទេសជាតិលើគ្រប់វិស័យ ក្នុងនោះការចុះបញ្ជីអត្រានុកូលដ្ឋាននឹងផ្តល់សារៈសំខាន់ធំៗចំនួនពីរគឺ៖ ទី១. កំណត់អត្តសញ្ញាណតាមផ្លូវច្បាប់អំពីព្រឹត្តិការណ៍ជីវិតរបស់បុគ្គលគ្រប់រូប ដែលជាការគាំទ្រដល់ការបង្កើតឯកសារ អត្តសញ្ញាណជាតិ និងទី២. បង្កើតបាននូវប្រភពទិន្នន័យតាមតម្រូវការសម្រាប់ប្រើប្រាស់ក្នុងការវិភាគទាំងឡាយ ទាំងនៅថ្នាក់ជាតិ និងថ្នាក់ក្រោមជាតិ ព្រមទាំងបង្កើតបាននូវស្ថិតិអត្រានុកូលដ្ឋានផងដែរ។

ការថ្លែងរបស់អភិបាលខេត្តស្វាយរៀងដូច្នេះធ្វើឡើងក្នុងសិក្ខាសាលាផ្សព្វផ្សាយខ្លឹមសារអនុក្រឹត្យលេខ ៤៧អនក្រ.បក ស្តីពីអត្តសញ្ញាណប័ណ្ណសញ្ជាតិខ្មែរ និងប្រកាសលេខ ៤២២១ប្រក ស្តីពីបែបបទ និងនីតិវិធីនៃការស្នើសុំចុះបញ្ជី ការផ្តល់ ការកែតម្រូវទិន្នន័យ ការលុបបញ្ជី ការធ្វើមោឃភាព និងការដកហូតអត្តសញ្ញាណប័ណ្ណសញ្ជាតិខ្មែរ ព្រមទាំងបណ្តឹងមិនសុខចិត្ត នាព្រឹកថ្ងៃទី០៦ ខែសីហា ឆ្នាំ២០២៥។

ឯកឧត្តមបានបន្តថា កន្លងមករាជរដ្ឋាភិបាលកម្ពុជា ដោយមានក្រសួងមហាផ្ទៃជាសេនាធិការបានយកចិត្តទុកដាក់យ៉ាងខ្លាំងក្នុងការជំរុញ និងពង្រឹងការផ្តល់សេវាអត្រានុកូលដ្ឋាន និងអត្តសញ្ញាណកម្មជូនប្រជាពលរដ្ឋ តាមរយៈការដាក់ចេញនូវផែនការយុទ្ធសាស្ត្រ ច្បាប់ និងលិខិតបទដ្ឋានគតិយុត្តនានាជាបន្តបន្ទាប់តួយ៉ាងផែនការយុទ្ធសាស្ត្រជាតិស្តីពីអត្តសញ្ញាណកម្ម ឆ្នាំ២០១៧-២០២៦ ក៏ដូចជាច្បាប់ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្មជាដើម  ហើយចំពោះការងារអត្តសញ្ញាណកម្មគឺជាការងារដែលផ្តោតលើកិច្ចការចម្បងពីរគឺ ការគ្រប់គ្រងអត្តសញ្ញាណប្រជាពលរដ្ឋ និងការផ្តល់សេវារដ្ឋបាលជូនប្រជាពលរដ្ឋ។ ដូច្នេះការងារគ្រប់គ្រងប្រជាពលរដ្ឋគឺជាឆ្អឹងខ្នងនៃការគ្រប់គ្រងរដ្ឋបាលដែនដី ថែរក្សាសន្តិសុខសណ្តាប់ធ្នាប់សាធារណៈ ធានានូវសិទ្ធិ និងផលប្រយោជន៍ស្របច្បាប់ជាមូលដ្ឋានរបស់បុគ្គល និងជំរុញការអភិវឌ្ឍសេដ្ឋកិច្ចជាតិ។ រីឯការផ្តល់សេវារដ្ឋបាលជូនប្រជាពលរដ្ឋគឺសំដៅដល់ការប្រើប្រាស់ទិន្នន័យអត្តសញ្ញាណបុគ្គល ដើម្បីផ្តល់សេវានានាជូនប្រជាពលរដ្ឋដូចជាការផ្តល់សំបុត្រកំណើត អត្តសញ្ញាណប័ណ្ណ សៀវភៅស្នាក់នៅ សៀវភៅគ្រួសារ លិខិតឆ្លងដែនជាដើម។

ក្នុងឱកាសនេះ ឯកឧត្តម ប៉េង ពោធិ៍សា បានផ្តាំផ្ញើដល់អាជ្ញាមូលដ្ឋាន កងកម្លាំង និងមន្ត្រីពាក់ព័ន្ធទាំងអស់ត្រូវបន្តការយកចិត្តទុកដាក់នៅក្នុងការអនុវត្តតួនាទីភារកិច្ចរបស់ខ្លួនឱ្យបានល្អ ជាពិសេសការធានានិរន្តរភាពនៃការផ្តល់សេវាសាធារណៈជូនប្រជាពលរដ្ឋក៏ដូចជាសេវាអត្រានុកូលដ្ឋាន និងសេវាអត្តសញ្ញាណកម្មនេះឱ្យបានត្រឹមត្រូវ ចៀសវាងការបង្កើតឱ្យមាននូវកំហុសឆ្គងនានាអាចបង្កឱ្យមាននូវផលវិបាកផ្សេងៗដល់ប្រជាពលរដ្ឋនៅពេលក្រោយ ហើយចំពោះករណីស្នើសុំនានាពីសំណាក់ជនបរទេស ត្រូវមានការប្រុងប្រយ័ត្នខ្ពស់ ព្រោះដោយហេតុថាការផ្តល់ឯកសារមិនប្រក្រតីទាំង៥ដល់ជនបរទេសស្មើនឹងការផ្តល់សញ្ជាតិដល់ជនបរទេសដោយខុសច្បាប់ ដែលឯកសារទាំងនោះមានដូចជា សំបុត្រកំណើត សំបុត្របញ្ជាក់កំណើត អត្តសញ្ញាណប័ណ្ណសញ្ជាតិខ្មែរ សៀវភៅស្នាក់នៅ និងលិខិតឆ្លងដែន ដូច្នេះសូមឱ្យច្បាស់លាស់លើការងារនេះ៕

ដោយ៖ ចាន់ សុភឿន (ប្រភព ៖ រដ្ឋបាលខេត្តស្វាយរៀង)