AKP ភ្នំពេញ ថ្ងៃទី០៦ ខែសីហា ឆ្នាំ២០២៥-- បន្ទាប់ពីបានទទួលព្រះរាជទានព្រះរាជទ្រព្យរបស់សម្តេចព្រះមហាក្សត្រី ព្រះវររាជមាតាជាតិខ្មែរ កាលពីពេលថ្មីៗនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានចុះសួរសុខទុក្ខ និងចែកអំណោយដែលជាព្រះរាជទ្រព្យរបស់សម្តេចព្រះមហាក្សត្រី ព្រះវររាជមាតាជាតិខ្មែរ ជនភៀសសឹកចំនួន ៥៥០គ្រួសារ ដែលមាន២ទីតាំង ដោយទីតាំងទី១ ចំនួន៣៣៤គ្រួសារ នៅក្នុងវត្តឆែប និងទីតាំងទី២ចំនួន២១៦គ្រួសារ នៅវត្តដងផ្លិត ស្រុកឆែប ខេត្តព្រះវិហារ នៅថ្ងៃទី០៥ ខែសីហា ឆ្នាំ២០២៥។

លោកជំទាវអគ្គលេខាធិការបាននាំយកនូវព្រះសវណីយ៍ផ្តាំផ្ញើសុខទុក្ខ និងក្តីនឹករលឹក អាណិតអាសូរ ពីសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលជានិច្ចកាល ព្រះអង្គតែងតែគិតគូរពីសុខទុក្ខរបស់បងប្អូនប្រជានុរាស្ត្រនៅគ្រប់ទីកន្លែងថ្វីបើព្រះអង្គមិនបានយាងមកជួបបងប្អូន កូនក្មួយដោយផ្ទាល់ក៏ដោយ។

លោកជំទាវបានបន្តថា “សូមបងប្អូនកូនក្មួយទាំងអស់ត្រូវយកចិត្តទុកដាក់ថែទាំសុខភាពឱ្យបានល្អ រស់នៅត្រូវមានអនាម័យ ពិសារទឹកដាំពុះ សម្អាតបរិស្ថានជុំវិញកន្លែងយើងរស់នៅ ត្រូវការពារខ្លួនពីជំងឺឆ្លង ជាពិសេសជំងឺគ្រុនឈាម ហើយជំងឺនេះពីមុនគឺកើតតែលើកុមារទេ ប៉ុន្តែបច្ចុប្បន្ននេះមនុស្សពេញវ័យក៏ឆ្លងបានដែរហើយពិបាកព្យាបាលខ្លាំនេះ។ ជំងឺមិនឆ្លងដែលកំពុងដែលបច្ចុប្បន្នកំពុងជាបញ្ហាប្រឈមមាន៤សំខាន់ៗគឺ ជំងឺទឹកនោមផ្អែម ជំងឺបេះដូងសសៃឈាម ជំងឺមហារីក និងជំងឺរលាកផ្លូវដង្ហើមរាំរ៉ៃជាដើម មិនបានត្រឹមត្រូវដូចជាផ្អែមពេក ប្រៃពេក ខ្លាញ់ពេក អាហារកំប៉ុងច្រើនពេក។ ចំពោះស្ត្រីមានផ្ទៃពោះ ត្រូវយកចិត្តទុកដាក់ទ្វេដង ព្រោះថា បងប្អូនងាយរងហានិភ័យ ដោយសារជំងឺផ្សេងៗដែលអាចកើតមានឡើងជាយថាហេតុ។

អំណោយដែលទទួលបានក្នុងគ្រួសារនីមួយៗមាន៖ មុង១ ភួយ១ សាប៊ូ៤មុខ (សាប៊ូដុំ សាប៊ូកក់សក់ សាប៊ូលាងដៃ និងសាប៊ូលាងចាន) កន្សែងសើម១ប្រអប់ ឃីតសង្គ្រោះបឋម១ប្រអប់ ឆៃប៉ូវផ្អែម ឬត្រសក់ចាវ១គីឡូក្រាម  និងថវិកា៥ម៉ឺនរៀល៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)