AKP ភ្នំពេញ ថ្ងៃទី០៦ ខែសីហា ឆ្នាំ២០២៥--លោកជំទាវឧត្ដមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិកម្ពុជាបានលើកឡើងថា កងកម្លាំងប្រដាប់អាវុធរបស់កម្ពុជា នៅប្រចាំការតំបន់អានសេះ កំពុងឃ្លាំមើលយ៉ាងយកចិត្តទុកដាក់បំផុតនៅក្នុងតំបន់នេះ ក្រោយពីមានការរុះរើបន្លាលួសចេញកាលពីព្រលប់ថ្ងៃ០៥ ខែសីហា ឆ្នាំ២០២៥រួចមក ។

ថ្លែងក្នុងសេចក្តីសង្ខេបព័ត៌មាន ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នាព្រឹកថ្ងៃទី០៦ ខែសីហា ឆ្នាំ២០២៥ លោកជំទាវឧត្ដមសេនីយ៍ឯក ម៉ាលី សុជាតា បានបញ្ជាក់ឱ្យដឹងថា ស្ថានការណ៍នៅតំបន់ជួរមុខ តាមបន្ទាត់ព្រំដែនក្នុងទិសខេត្តព្រះវិហារ និងឧត្តរមានជ័យ មានសភាពស្ងប់ស្ងាត់ ខណៈតំបន់អានសេះក៏មិនទាន់មានបញ្ហាអ្វីកើតឡើងដែរ បន្ទាប់ពីបន្លាលួសដែលកងទ័ពថៃបានរាយនៅតំបន់អានសេះ កាលពីថ្ងៃទី០៤ ខែសីហា ឆ្នាំ២០២៥នោះ ត្រូវបានរុះរើ និងគ្រឿងចក្រថៃ ក៏ត្រូវបានផ្អាកការធ្វើសកម្មភាពផងដែរ។ លោកជំទាវឧត្ដមសេនីយ៍ឯក អ្នកនាំពាក្យបន្តថា ការរុះរើបន្លាលួសចេញពីតំបន់អានសេះ ក្រោយពីភាគីកម្ពុជា និងភាគីថៃប្រចាំការនៅតំបន់អានសេះ បានជួបពិភាក្សា និងចរចាគ្នា។

ជាមួយគ្នានេះ លោកជំទាវឧត្ដមសេនីយ៍ឯក ម៉ាលី សុជាតា បានបញ្ជាក់បន្ថែមថា៖ «នៅតំបន់អានសេះ កំពុងស្ថិតនៅក្រោមការឃ្លាំមើលដោយប្រុងប្រយ័ត្នខ្ពស់បំផុតរបស់កងកម្លាំងកម្ពុជា ដើម្បីពង្រឹងការអនុវត្តតាមស្មារតីបទឈប់បាញ់ ដែលកម្ពុជាគោរពយ៉ាងម៉ឹងម៉ាត់បំផុត លើការអនុវត្តបទឈប់បាញ់ដែលបានឯកភាពគ្នានៅប្រទេសម៉ាឡេស៊ី»៕

ដោយ៖ ប៊ុនរិទ្ធ