‎AKP កំពង់ស្ពឺ ថ្ងៃទី០៥ ខែសីហា ឆ្នាំ២០២៥-- ក្រោមការចាត់តាំងរបស់ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ ឯកឧត្តមបណ្ឌិត តូច ប៉ូលីវ៉ា និងឯកឧត្តម ជាវ វិជ្ជាក់ អភិបាលរងខេត្តកំពង់ស្ពឺ ព្រមទាំងប្រតិភូអមដំណើរ នាថ្ងៃទី០៥ ខែសីហា ឆ្នាំ២០២៥ បាននាំយកអំណោយសម្ភារ ស្បៀង គ្រឿងឧបភោគបរិភោគ និងថវិកា ដែលជាអំណោយរបស់សប្បុរសជនក្នុងខេត្តកំពង់ស្ពឺ និងក្រុមហ៊ុនសហគ្រាស មន្រ្តីរាជការ កងកម្លាំងប្រដាប់អាវុធខេត្ត ប្រគល់ជូនរដ្ឋបាលខេត្តព្រះវិហារ និងខេត្តឧត្តរមានជ័យ ដើម្បីយកទៅចាក់ចែងសម្រាប់ផ្តល់ជូនដល់វីរកងទ័ពជួរមុខ ដែលកំពុងការពារទឹកដី និងបងប្អូនភៀសសឹកនៅទីទួលសុវត្ថិភាព។

ឆ្លៀតក្នុងឱកាសនោះដែរ ឯកឧត្តម តូច ប៉ូលីវ៉ា អភិបាលរងខេត្ត បានពាំនាំប្រសាសន៍ផ្តាំផ្ញើសួរសុខទុក្ខរបស់ឯកឧត្តមបណ្ឌិតអភិបាលខេត្ត និងបងប្អូននៅខេត្តកំពង់ស្ពឺ ដែលតែងតែគិតគូរដល់បងប្អូនដែលជាកងកម្លាំងការពារទឹកដីសមរភូមិជួរមុខដែលកំពុងតែប្រយុទ្ធជាមួយកងទ័ពឈ្លានពានទឹកដីកម្ពុជា ព្រមទាំងលើកទឹកចិត្តដល់កងកម្លាំងទាំងអស់ត្រូវខិតខំការពារទឹកដីកម្ពុជា មិនឱ្យជនណាមកឈ្លានពានទឹកដីកម្ពុជាសូម្បីតែ១មីល្លីម៉ែត្រ។

សូមជម្រាបជូនថា ‎សម្ភារដែលគណៈប្រតិភូខេត្តកំពង់ស្ពឺនាំយកទៅផ្តល់ជូនរដ្ឋខេត្តព្រះវិហាររួមមាន៖ អង្ករ១០០០បេ ទឹកសុទ្ធ២០០០យួរ មី១០០០កេស ទឹកត្រី១០០០ដប ទឹកស៊ីអីវ១០០០ដប និងថវិកាសម្រាប់ខេត្ត៣០,០០០,០០០ រៀល។ សម្រាប់ខេត្តឧត្តមានជ័យរួមមាន៖ ឃីដ ៣៨០០ឃីដ អង្ករ៣៨០០បេ ទឹកសុទ្ធ៧៨០០យួរ មី៣៨០០កេស និងថវិកាសម្រាប់ខេត្ត ៣០,០០០,០០០ រៀល។

‎នាឱកាសនោះ រដ្ឋបាលខេត្តឧត្តរមានជ័យ និងរដ្ឋបាលខេត្តព្រះវិហារបានថ្លែងអំណរគុណដល់រដ្ឋបាលខេត្តកំពង់ស្ពឺ មន្ត្រីរាជការ និងបងប្អូនប្រជាពលរដ្ឋខេត្តកំពង់ស្ពឺ ពិសេសក្រោមការដឹកនាំរបស់ឯកឧត្តមបណ្ឌិត ជាម ច័ន្ទសោភ័ណ ដែលបានផ្ដល់ជាសម្ភារ គ្រឿងឧបភោគ បរិភោគ និងថវិកា សម្រាប់ប្រគល់ជូនតាមរយៈរដ្ឋបាលខេត្តទាំងពីរ ដើម្បីយកទៅចែកជូនដល់កងទ័ពដែលកំពុងបំពេញភារកិច្ចការពារទឹកដីរបស់យើងមិនឱ្យជនណាម្នាក់មកឈ្លានពានបានឡើយ និងបងប្អូនភៀសសឹកដែលកំពុងស្នាក់នៅទីទួលសុវត្ថិភាព៕

ដោយ លឹម សាន្ត