AKPបន្ទាយមានជ័យ ថ្ងៃទី០២ ខែសីហា ឆ្នាំ២០២៥--

    លោក កែ សួន សុភាព អភិបាលរងខេត្តបន្ទាយមានជ័យ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកថ្មពួកជាតំណាងដ៏ខ្ពង់ខ្ពស់របស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ កែ សួន សុភី សសុខា បាននាំយកអំណោយជាស្បៀងអាហារ គ្រឿងឧបភោគ-បរិភោគ និងសម្ភារប្រើប្រាស់ចាំបាច់ ទៅប្រគេនជូនព្រះគ្រូខេមញាណ រ៉េន សុីណាត ព្រះគ្រូចៅអធិការវត្តគិរីរុក្ខារាមថ្មរមៀល ក្នុងស្រុកថ្មពួកកាលពី រសៀលថ្ងៃទី១ ខែសីហា ឆ្នាំ២០២៥ នេះ។ 

អំណោយដ៏សប្បុរសទាំងនេះ នឹងត្រូវព្រះចៅអធិការវត្តបន្តចាត់ចែងចែកជូនដល់កងទ័ពជួរមុខ ដែលកំពុងឈរជើងការពារបូរណភាពទឹកដីតាមបណ្តោយព្រំដែនកម្ពុជា-ថៃ ប្រកបដោយកិច្ចការយ៉ាងសកម្ម និងស្វាហាប់។
     ក្នុងឱកាសនោះលោក កែ សួន សុភាព បានលើកឡើងថា ការនាំយកអំណោយដ៏ថ្លៃថ្លានេះ គឺដើម្បីបង្ហាញពីការគិតគូរ ការយកចិត្តទុកដាក់ និងទឹកចិត្តកតញ្ញូដ៏ខ្ពង់ខ្ពស់របស់ឯកឧត្តមអភិសន្តិបណ្ឌិត ស សុខា និងលោកជំទាវ ចំពោះកងកម្លាំងជួរមុខទាំងអស់ ដែលជាកម្លាំងដ៏រឹងមាំក្នុងការការពារសន្តិសុខ សុវត្ថិភាព និងអធិបតេយ្យជាតិ។ 

លោកក៏បានថ្លែងអំណរគុណយ៉ាងជ្រាលជ្រៅដល់វីរកងទ័ពទាំងអស់ ដែលបានលះបង់កម្លាំងកាយ កម្លាំងចិត្ត ពេលវេលា និងសេចក្ដីសុខផ្ទាល់ខ្លួន ដើម្បីបំពេញភារកិច្ចដ៏ឧត្តុង្គឧត្តមមួយនេះ។ ជាមួយគ្នានោះ លោកក៏បានថ្លែងអំណរគុណដល់ព្រះចៅអធិការវត្ត ដែលបានជួយសម្របសម្រួល និងទទួលរៀបចំចាត់ចែងអំណោយទាំងនេះ ដើម្បីធានាថានឹងទៅដល់ដៃកងទ័ពជួរមុខប្រកបដោយតម្លាភាព និងប្រសិទ្ធភាពខ្ពស់។
     ព្រះគ្រូខេមញាណ រ៉េន សុីណាត ព្រះគ្រូចៅអធិការវត្តគិរីរុក្ខារាមថ្មរមៀល បានមាន សង្ឃដីកា យ៉ាងកក់ក្ដៅថា ព្រះអង្គមានសេចក្តីសោមនស្សរីករាយជាអនេក ដែលបានទទួលអំណោយដ៏សប្បុរសពីសំណាក់ឯកឧត្តមឧបនាយករដ្ឋមន្ត្រី និងលោកជំទាវ។ ព្រះអង្គបានថ្លែងអំណរគុណយ៉ាងជ្រាលជ្រៅចំពោះទឹកចិត្តជ្រះថ្លានេះ ហើយបានប្តេជ្ញាថានឹងចាត់ចែងចែកចាយអំណោយទាំងនេះទៅដល់កងទ័ពដែលឈរជើងតាមព្រំដែនឱ្យបានទាន់ពេលវេលា និងគ្រប់ៗគ្នា ស្របតាមបំណងប្រាថ្នារបស់សប្បុរសជន។ ព្រះអង្គក៏បានឧទ្ទិសបួងសួងសូមឱ្យឯកឧត្តម និងលោកជំទាវ ព្រមទាំងក្រុមគ្រួសារទាំងមូល ទទួលបាននូវសេចក្តីសុខ សេចក្តីចម្រើនគ្រប់ប្រការ ព្រមទាំងសូមឱ្យកងទ័ពទាំងអស់ជួបតែសិរីសួស្តី ជ័យមង្គល និងមានកម្លាំងខ្លាំងក្លាដើម្បីបន្តបេសកកម្មបម្រើជាតិ។

   សូមបញ្ជាក់ថាអំណោយដែលបានប្រគល់ជូនរួមមាន ទឹកសុទ្ធ ចំនួន៣០០កេស, អង្រឹង ចំនួន១៥០, កន្ទេល ចំនួន២០០, តង់ ចំនួន១៥០, ភួយ ចំនួន៣០០,ខ្នើយ ចំនួន៣០០,សូឡា ចំនួន៤០ឈុត, ឆៃប៉ូវ ចំនួន៧០គីឡូក្រាម, គោងៀត ចំនួន៥០គីឡូក្រាម
,សាច់ក្រកឆ្អិន ចំនួន១៣៧កញ្ចប់ (៥០គីឡូក្រាម)
,ត្រីងៀតឆ្អិន ចំនួន១៦៩កញ្ចប់ (៥០គីឡូក្រាម)
,មុាំល្ហុង ចំនួន៤០គីឡូក្រាម, សាច់ផាត់ ចំនួន២០គីឡូក្រាម,អំបុកលីង ចំនួន១០០កញ្ចប់
, កាហ្វេ ចំនួន១កេស (១២កញ្ចប់), នំទាហាន ចំនួន៦កេស (២៤០កញ្ចប់)។

  ពិធីប្រគល់-ទទួលអំណោយនៅវត្តគិរីរុក្ខារាមថ្មរមៀលនេះ គឺជាការបង្ហាញយ៉ាងច្បាស់អំពីស្មារតីសាមគ្គីភាព និងការចូលរួមចំណែកពីគ្រប់មជ្ឈដ្ឋានក្នុងសង្គម ដើម្បីគាំទ្រដល់កងកម្លាំងប្រដាប់អាវុធរបស់យើង។ នេះមិនមែនត្រឹមតែជាការឧបត្ថម្ភផ្នែកសម្ភារប៉ុណ្ណោះទេ តែជាការផ្តល់នូវកម្លាំងចិត្តដ៏ធំធេងដល់វីរៈកងទ័ពជួរមុខ ឱ្យមានកម្លាំងចិត្តបន្តបេសកកម្មដ៏ឧត្តុង្គឧត្តមនេះដោយមោទនភាពបំផុត៕
ដោយ ៖ ឈុនសារ៉ាត