AKP ឧត្ដរមានជ័យ ថ្ងៃទី០១ ខែសីហា ឆ្នាំ២០២៥ -- ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិបានលើកឡើងថា រាជរដ្ឋាភិបាលបានខិតខំក្នុងការចរចាឱ្យមានបទឈប់បាញ់ និងឱ្យមានអ្នកត្រួតពិនិត្យនូវបទឈប់បាញ់ដើម្បីកុំឱ្យមានអ្នកណារំលោភ ហើយមានអ្នកណាចោទប្រកាន់លើអ្នកណាចំពោះបទឈប់បាញ់នេះ។

ថ្លែងក្នុងឱកាសចុះសួរសុខទុក្ខ និងសំណេះសំណាលជាមួយបងប្អូនជនភៀសសឹក នារសៀលថ្ងៃទី០១ ខែសីហា ឆ្នាំ២០២៥ នៅវត្ដភ្នំកំបោ ស្ថិតក្នុងភូមិថ្មដូន ឃុំគោកមន ស្រុកបន្ទាយអំពិល ខេត្ដឧត្ដរមានជ័យ ឯកឧត្តមឧបនាយករដ្ឋមន្ត្រី ប្រាក់ សុខុន បានថ្លែងថា៖ «យើងខិតខំប្រឹងណាស់ រាជរដ្ឋាភិបាលខំប្រឹងណាស់ ក្នុងការចរចាគ្នាជាមួយភាគីថៃ ដើម្បីឱ្យមានបទឈប់បាញ់ ហើយឥឡូវនេះធ្វើយ៉ាងណាឱ្យមានគេត្រួតពិនិត្យបទឈប់បាញ់ កុំឱ្យមានអ្នកណារំលោភ ហើយមានអ្នកណាចោទប្រកាន់លើអ្នកណា»។ ឯកឧត្ដមឧបនាយករដ្ឋមន្រ្ដីលើកឡើងថា រាជរដ្ឋាភិបាលធានាសុខសុវត្ថិភាពជូនបងប្អូនជាមុនសិនដើម្បីធ្វើយ៉ាងណាឱ្យបងប្អូនសិនឆាប់បានត្រឡប់ទៅផ្ទះវិញ និងបានប្រកបមុខរបររកស៊ីរបស់ខ្លួន។ ឯកឧត្ដមឧបនាយករដ្ឋមន្រ្ដីបានបញ្ជាក់ថា បងប្អូនដែលភៀសសឹកទាំងអស់ សុទ្ធតែនឹកផ្ទះទាំងអស់គ្នាមែនទេ ហើយសុទ្ធតែនឹកផ្ទះ ចង់ទៅប្រកបមុខរបរកស៊ីរបស់ខ្លួនវិញ និងចង់ទៅមើលស្រែចម្ការរបស់ខ្លួនវិញ ហើយភាគច្រើនលើសលុបអត់មានអ្នកណានៅទេ។ ឯកឧត្ដម ឧបនាយករដ្ឋមន្រ្ដីបានថ្លែងបញ្ជាក់យ៉ាងដូច្នេះថា៖ «អីចឹងយើងធ្វើម៉េចឱ្យធានានូវសុខសុវត្ថិភាពឱ្យបងប្អូនសិន ដើម្បីឱ្យបងប្អូនឆាប់ត្រឡប់ទៅផ្ទះវិញ សុទ្ធតែនឹកផ្ទះទាំងអស់គ្នាមិនថាអីចឹង។ សុទ្ធតែនឹកផ្ទះ សុទ្ធតែចង់ត្រឡប់ទៅផ្ទះវិញ ទៅប្រកមុខរបររកស៊ីរបស់ខ្លួនវិញ ចង់ទៅមើលស្រែចម្ការរបស់យើងវិញ»។

ជាមួយគ្នានេះ ឯកឧត្ដម ឧបនាយករដ្ឋមន្រ្ដី ប្រាក់ សុខុន បានកត់សម្គាល់ឱ្យដឹងផងដែរ ពេលធ្វើដំណើរតាមផ្លូវឯកឧត្ដមក៏បានមើលឃើញផ្ទះច្រើនណាស់អត់មានមនុស្សនៅ ផ្ទះខ្លះក៏ចាក់សោរចោលទៅ អ្នកណាមានរបងក៏ចាក់ទៅ អ្នកណាអត់របងក៏ទុករបងចោលទៅ  ប៉ុន្តែភាគច្រើនលើសលុបអត់មានអ្នកនៅនោះទេ។ ឯកឧត្ដមឧបនាយករដ្ឋមន្រ្ដីបានសង្កត់ធ្ងន់ថា៖ «អីចឹងយើងចង់ឱ្យបងប្អូនយើងត្រឡប់ទៅវិញ»។ 

ឯកឧត្ដមឧបនាយករដ្ឋមន្រ្ដីក៏សូមសម្ដែងនូវការចូលរួមរំលែកមរណៈទុក្ខចំពោះយុទ្ធជនដ៏អង់អាចក្លាហានរបស់យើងដែលបានបូជាពលីជីវិត ដើម្បីការពារមាតុភូមិ ការពារទឹកដី ការពារសុវត្ថិភាពរបស់បងប្អូនយើងទាំងគ្នា ហើយក៏សូមជូនពរដល់យុទ្ធជនទាំងអស់ដែលបានរងរបួស នៅក្នុងឱកាសដែលពួកគាត់បានខិតខំការពារទឹកដីរបស់យើងក្នុងការប៉ះទង្គិចប្រដាប់អាវុធរវាងកម្ពុជា និងថៃ។
ក្នុងឱកាសនោះដែរ ឯកឧត្ដមឧបនាយករដ្ឋមន្រ្ដីក៏សូមអរគុណផងដែរ ដល់បងប្អូនទាំងអស់ ដែលភាគច្រើនសុទ្ធសឹងតែអ្នកមានគ្រួសារ និងសមាជិកគ្រួសារដែលធ្វើជាកងទ័ព ដើម្បីការពារទឹកដីរបស់យើង៕

ដោយ៖ មករា និងប៊ុនរិទ្ធ រូបថត៖ លន ហ្សាឌីណា