AKP ភ្នំពេញ ថ្ងៃទី០១ ខែសីហា ឆ្នាំ២០២៥--ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានស្នើឱ្យបងប្អូនជនរួមជាតិកម្ពុជា មានការប្រុងប្រយ័ត្នខ្ពស់ ចំពោះព័ត៌មានក្លែងក្លាយ ព្រោះវាធ្វើឱ្យប្រជាពលរដ្ឋធ្លាក់ក្នុងអន្ទាក់របស់គេ និងនាំឱ្យប៉ះពាល់ដល់ផលប្រយោជន៍ជាតិ។
សារស្នើដាស់តឿននេះធ្វើឡើង ក្នុងសន្និសីទសារព័ត៌មាន នាល្ងាចថ្ងៃទី០១ សីហានេះ នៅទីស្ដីការគណៈរដ្ឋមន្ត្រី ដោយ ឯកឧត្តម ប្រធានអង្គភាពអ្នកនាំពាក្យរាជរដ្ឋាភិបាល បានថ្លែងថា បងប្អូនត្រូវប្រយ័ត្នឱ្យមែនទែនពាក់ព័ន្ធព័ត៌មានក្លែងក្លាយ ដែលលេចឡើង និងផុសឡើងច្រើនណាស់ ទាំងលើបណ្ដាញសារព័ត៌មានផ្លូវការ ទាំងនៅលើបណ្ដាញសង្គម ហើយព័ត៌មានមួយចំនួនមានគោលបំណងចង់បំពុលសតិអារម្មណ៍របស់យើង ព័ត៌មានខ្លះមានគោលបំណងបំបែកបំបាក់កម្លាំងមហាសាមគ្គីជាតិដ៏រឹងមាំរបស់យើង ហើយជាពិសេសបងប្អូនយើងប្រយ័ត្នព័ត៌មានមកពីប្រទេសថៃដែលនិយាយពីកម្ពុជា។

ឯកឧត្តម ប៉ែន បូណា ថ្លែងបញ្ជាក់ថា«អ៊ីចឹងបងប្អូនយើងដឹងហើយថា គេនិយាយស្អី ចឹងកុំជឿព័ត៌មានទាំងនោះឱ្យសោះ មួយទៀតក៏មានបងប្អូនយើងខាង MMO មួយចំនួនចង់បាន View ចង់បាន Like និងចង់បាន Share ក៏បានផ្សាយព័ត៌មានខ្លះដែលមានប្រភពមិនច្បាស់លាស់ ហើយព័ត៌មានមួយចំនួនចម្លងយកពីគេមក ដឹងហើយថា គេមានចេតនាអី រួចហើយយើងមកបញ្ចូលអារម្មណ៍ផ្សេងៗផ្ទាល់ខ្លួនធ្វើឱ្យគេមានការចាប់អារម្មណ៍ចែកចាយហើយភ្លេចគិតថា វាប៉ះពាល់ទៅដល់សតិអារម្មណ៍បងប្អូនប្រជាពលរដ្ឋយើង ប៉ះពាល់ខ្លះដល់ផលប្រយោជន៍ជាតិទៀតផង  អ៊ីចឹងបងប្អូនយើងប្រុងប្រយ័ត្នអំពីបញ្ហានេះ ធ្វើម៉េចឱ្យយើងធ្លាក់ក្នុងអន្ទាក់របស់គេ ធ្វើឱ្យពុលសតិអារម្មណ៍ ហើយធ្វើឱ្យយើងចែកចាយព័ត៌មានទាំងនោះដោយមិនដឹងខ្លួនបាទ នេះជាអ្វីដែលយើងត្រូវរួមចំណែកទាំងអស់គ្នាដើម្បី ធ្វើម៉េចយើងកុំឱ្យព័ត៌មានក្លែងក្លាយទាំងនោះមកបំពុលបរិយាកាស មកបំពុលសតិអារម្មណ៍របស់យើង ហើយធ្វើឱ្យប៉ះពាល់ដល់ផលប្រយោជន៍ជាតិយើងបាទ»៕
ដោយ៖ គង់ សិរីរ័ត្ន