AKP ឧត្តរមានជ័យ ថ្ងៃទី ០១ ខែ សីហា ឆ្នាំ ២០២៥--
ឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិបានដឹកនាំគណៈប្រតិភូបណ្ដាអង្គទូតបរទេសប្រចាំនៅកម្ពុជាចំនួន ២២ និងអង្គការអន្តរជាតិចំនួន៤ ផ្សេងទៀត អញ្ជើញចុះពិនិត្យមើលអំពីស្ថានភាពនៃការខូចខាតផ្ទះសម្បែងរបស់ប្រជាពលរដ្ឋ សាលារៀន វត្ដអារាមដែលទទួលរងគ្រោះដោយសារការវាយប្រហារដោយកងទ័ពថៃ ក្នុងជម្លោះព្រំដែនរវាងកងទ័ពកម្ពុជា-ថៃ ចាប់ពីថ្ងៃទី ២៤ ដល់យប់ថ្ងៃទី ២៨ ខែ កក្កដា ឆ្នាំ ២០២៥។ ក្នុងដំណើរចុះពិនិត្យនេះ ធ្វើឡើងនាព្រឹកថ្ងៃទី០១ ខែសីហា ឆ្នាំ២០២៥ ស្ថិតនៅភូមិថ្មដូន ឃុំគោកមន ស្រុកបន្ទាយអំពិល ខេត្តបន្ទាយមានជ័យ ក្នុងនោះប្រតិភូ ក៏បានអញ្ជើញទៅពិនិត្យមើលវត្ត ប្រាសាទតាមាន់សែនជ័យ ស្ថិតនៅ ឃុំគោកមន ស្រុកបន្ទាយអំពិល ដែលទទួលរងគ្រោះយ៉ាងធ្ងន់ធ្ងរ សាលាបឋមសិក្សា ប្រសាទតាមន្តសែនជ័យ ដែលទទួលរងការវាយប្រហារដោយយន្តហោះរបស់កងទ័ពថៃធ្វើឱ្យសាលារៀនមួយខ្នងខូចខាតខ្ទេចខ្ទី និងបានចុះត្រួតពិនិត្យជនភៀសសឹកនៅ វត្តរតនឧត្តម មុនីគិរីសែនជ័យ ហៅវត្តកំបោ ស្ថិតនៅភូមិដូនកែន សង្កាត់សំរោង ស្រុកសំរោង ខេត្តឧត្តរមានជ័យ។

បើតាមរបាយការណ៍របស់អភិបាលរងស្រុកសំរោង  ខេត្ដឧត្ដរមានជ័យ លោក ចន ផល្លីន បានឱ្យដឹងថា  គិតចាប់ពីថ្ងៃទី ២៤ ដល់ថ្ងៃទី ០១ ខែកក្កដា  ឆ្នាំ ២០២៥នេះ មានជនភៀសសឹកសរុប ៣៩០៥ គ្រួសារ ហើយក្នុងចំណោមជនភៀសសឹកទាំងនេះគឺពុំទាន់មានគ្រួសារច្រើនទេ វិលត្រឡប់ទៅផ្ទះសម្បែងវិញ ដោយសារស្ថានភាពមិនទាន់ល្អប្រសើរនៅឡើយ៕

ដោយ៖ មករា រូបថត៖ លន ហ្សាឌីណា