AKP បន្ទាយមានជ័យ ថ្ងៃទី០១ ខែសីហា ឆ្នាំ២០២៥--

ឯកឧត្តម យូ ឡាណា អគ្គលេខាធិការរងទី២ នៃកាកបាទក្រហមកម្ពុជា នាព្រឹកថ្ងៃសុក្រ ទី០១ ខែសីហា ឆ្នាំ២០២៥ នេះបានដឹកនាំគណៈប្រតិភូទៅចូលរួមរំលែកមរណទុក្ខយ៉ាងក្រៀមក្រំជាមួយក្រុមគ្រួសារសពលោក ឧត្តមសេនីយ៍ត្រី រៀម តុងសៀន ដែលបានពលីជីវិតក្នុងសមរភូមិជួរមុខការពារបូរណភាពទឹកដី ដោយពិធីនេះប្រព្រឹត្តទៅនៅភូមិត្រពាំងថ្មត្បូង ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ។

លោកឧត្តមសេនីយ៍ត្រី រៀម តុងសៀន អាយុ៥៩ឆ្នាំ បម្រើការនៅការិយាល័យទី៥ កងពលតូចអន្តរាគមន៍លេខ៧ បានបាត់បង់ជីវិតក្នុងពេលបំពេញបេសកកម្មដ៏អង់អាចក្លាហានក្នុងការប្រយុទ្ធជាមួយកងទ័ពថៃតាមបណ្តោយព្រំដែន។ ការពលីជីវិតរបស់លោក គឺជាការបាត់បង់ដ៏ធំធេងសម្រាប់ជាតិមាតុភូមិកម្ពុជា ក៏ដូចជាក្រុមគ្រួសារទាំងមូល។

ក្នុងឱកាសនោះ ឯកឧត្តម យូ ឡាណា បានពាំនាំនូវប្រសាសន៍ផ្ដាំផ្ញើ និងការចូលរួមរំលែកទុក្ខដ៏សែនក្រៀមក្រំរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះក្រុមគ្រួសារនៃសព។ សម្តេចបានសម្តែងនូវក្តីអាណិតអាសូរយ៉ាងខ្លាំងចំពោះការបាត់បង់ប្តី ឪពុក និងជីតាជាទីស្រឡាញ់។

ក្នុងនាមគណៈប្រតិភូកាកបាទក្រហមកម្ពុជា ឯកឧត្តម យូ ឡាណា ក៏បានសម្តែងការគោរព និងកោតសរសើរចំពោះវីរភាពដ៏ឧត្តុង្គឧត្តមរបស់លោកឧត្តមសេនីយ៍ត្រី រៀម តុងសៀន ដែលបានលះបង់ជីវិតដើម្បីការពារបូរណភាពទឹកដីពីការឈ្លានពានរបស់កងទ័ពថៃ។ គុណបំណាច់ដ៏ធំធេងរបស់លោកនឹងស្ថិតនៅក្នុងការចងចាំជានិច្ចរបស់ប្រជាជនកម្ពុជាគ្រប់ៗរូប។

ក្នុងឱកាសដ៏សោកសៅនេះ គណៈប្រតិភូកាកបាទក្រហមកម្ពុជា ក៏បាននាំយកអំណោយមួយចំនួនដើម្បីជួយសម្រួលដល់ការលំបាករបស់ក្រុមគ្រួសារសព រួមមាន  អង្ករ ១៥០ គីឡូក្រាម,មីជាតិ ៧ កេសតូច ត្រីខ៥យួរ ទឹកក្រូច៥កេស និងថវិកាមួយចំនួន។

អំណោយទាំងអស់នេះ គឺជាកាយវិការមនុស្សធម៌ដ៏ប្រពៃរបស់កាកបាទក្រហមកម្ពុជា ដែលតែងតែនៅក្បែរប្រជាពលរដ្ឋគ្រប់កាលៈទេសៈ ជាពិសេសក្នុងគ្រាលំបាកដូចពេលនេះ។ ការគាំទ្រនេះមិនត្រឹមតែជាការលើកទឹកចិត្តប៉ុណ្ណោះទេ ថែមទាំងជាសញ្ញានៃការចងចាំនូវវីរភាពដ៏អង់អាចក្លាហានរបស់យុទ្ធជនពលីជាតិផងដែរ៕

ដោយ ឈុន សារ៉ាត