AKP ភ្នំពេញ ថ្ងៃទី០១ ខែសីហា ឆ្នាំ២០២៥-- ឯកឧត្តម ហេង សុធី អគ្គនាយកនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ កាលពីរសៀលថ្ងៃទី៣១ ខែកក្កដា ឆ្នាំ២០២៥ បានដឹកនាំកិច្ចប្រជុំពិនិត្យលើវឌ្ឍនភាពនៃការរៀបចំផែនការជាតិ ស្តីពីតំបន់អភិវឌ្ឍន៍កំពង់ផែក្នុងព្រះរាជាណាចក្រកម្ពុជា ក្រោមគម្រោងធ្វើឱ្យប្រសើរឡើងសមត្ថភាពរដ្ឋបាលកំពង់ផែនៃព្រះរាជាណាចក្រកម្ពុជា ដោយមានការចូលរួមពីសំណាក់អគ្គនាយករង ប្រធាននាយកដ្ឋាន ព្រមទាំងក្រុមការងារជំនាញការបច្ចេកទេសនៃទីភ្នាក់ងារ JICA និងមន្ត្រីពាក់ព័ន្ធនៅទីស្ដីការក្រសួង។ 

កិច្ចប្រជុំបានពិនិត្យពិភាក្សាយ៉ាងយកចិត្តទុកដាក់លើលទ្ធផលសិក្សាព្យាករណ៍ទិន្នន័យដឹកជញ្ជូនសំខាន់ៗពីសំណាក់ក្រុមការងារជំនាញការបច្ចេកទេសនៃទីភ្នាក់ងារ JICA បន្ទាប់ពីទទួលបានពីអង្គភាព និងស្ថាប័នពាក់ព័ន្ធ។ 

ឯកឧត្តមអគ្គនាយកបានកោតសរសើរដល់ក្រុមការងារជំនាញការ JICA លើកិច្ចខិតខំប្រឹងប្រែងរៀបចំឯកសារដ៏មានសារៈសំខាន់ខាងលើ។ អង្គប្រជុំក៏បានកែសម្រួល និងផ្តល់ព័ត៌មានជាធាតុចូលសំខាន់ៗមួយចំនួនសម្រាប់ជាមូលដ្ឋានក្នុងការកែលម្អលទ្ធផលសិក្សាទិន្នន័យខាងលើកាន់តែមានភាពប្រសើរឡើង។

បន្ទាប់ពីកិច្ចប្រជុំនេះ ក្រុមការងារជំនាញរបស់អគ្គនាយកដ្ឋាននឹងបន្តពិនិត្យលទ្ធផលនៃការសិក្សានេះដើម្បីផ្តល់ការកែលម្អបន្ថែម ហើយក្រុមការងារជំនាញការ JICA នឹងបន្តសិក្សាពីផែនការលម្អិតបឋមលើគោលដៅអភិវឌ្ឍន៍ ដែលមានកំណត់ដោយឯកសារផែនការជាតិ ស្តីពីតំបន់អភិវឌ្ឍន៍កំពង់ផែខាងលើ៕

ដោយ៖ ពេជ្រ សំអឿន (ប្រភព៖ ក្រសួងសាធារណការ និងដឹកជញ្ជូន)