AKP ឧត្តរមានជ័យ ថ្ងៃទី០១ ខែសីហា ឆ្នាំ២០២៥--ឯកឧត្តម គង់ វិមាន អគ្គលេខាធិការក្រុមប្រឹក្សាអភិវឌ្ឍន៍កម្ពុជា តំណាងឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី៣១ ខែកក្កដា ឆ្នាំ២០២៥ បានដឹកនាំក្រុមការងារ នាំយកថវិកាប្រគល់ជូនដល់កម្លាំងកងទ័ពដែលប្រចាំការទិសប្រាសាទតាមាន់ និងប្រាសាទតាក្របី ដែលរងរបួសនៅក្នុង សង្គ្រាមប្រយុទ្ធគ្នាជាមួយកងទ័ពឈ្លានពានថៃ កំពុងព្យាបាលនៅមន្ទីរពេទ្យក្នុងខេត្តឧត្តរមានជ័យ និងខេត្តសៀមរាប។

ឯកឧត្តម គង់ វិមាន បានមានប្រសាសន៍នាំនូវការផ្តាំផ្ញើការសាកសួរសុខទុក្ខពីឯកឧត្តម ស៊ុន ចាន់ថុល ឧបនាយករដ្ឋមន្ត្រី ជូនដល់វីរកងទ័ពការពារបូរណភាពទឹកដី បូជាសាច់ស្រស់ឈាមស្រស់ ព្រមទាំងបានកោតសរសើរពីភាពអង់អាចក្លាហានតស៊ូប្រយុទ្ធជាមួយទាហានថៃ យ៉ាងអង់អាចក្លាហាន និងមិនចាញ់សត្រូវជាដាច់ខាត។

លោកឧត្តមសេនីយ៍ត្រី នាក់ វង្ស បានមានប្រសាសន៍អរគុណសម្តេចតេជោ ហ៊ុន សែន ប្រធានព្រឹទ្ធសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលបានយកចិត្តទុកដាក់ក្នុងការណែនាំជាប្រចាំ និងបានឧបត្ថម្ភទាំងសម្ភារ និងគ្រឿងឧបភោគបរិភោគជាស្បៀងអាហារដល់កងកម្លាំងមិនឱ្យមានការខ្វះខាតនោះឡើយ និងអំណរគុណឯកឧត្តមឧបនាយករដ្ឋមន្រ្តី ស៊ុន ចាន់ថុល ដែលបានគិតគូរ និងបាននាំយកថវិកាតាមរយៈឯកឧត្តម គង់ វិមាន ជូនកម្លាំងយោធាប្រចាំការឈរជើងការពារទឹកដី និងប្រាសាទតាមាន់យើងនេះ។

សូមបញ្ជាក់ថា ដោយសារសង្គ្រាម បានធ្វើឱ្យផ្លូវក្នុងខេត្តឧត្តរមានជ័យ មានការរងការខូចខាតចំនួន៣ខ្សែ ផ្លូវជាតិលេខ៥៨  ផ្លូវជាតិលេខ៦៨  ផ្លូវខេត្តលេខ២៥៦៧៕

ដោយ ទិត ស្រ៊