AKP ភ្នំពេញ ថ្ងៃទី០១ ខែសីហា ឆ្នាំ២០២៥-- ចាប់ពីថ្ងៃទី៣០ ដល់ថ្ងៃទី៣១ ខែកក្កដា ឆ្នាំ២០២៥ កាកបាទក្រហមកម្ពុជា (CRC) ដោយមានការគាំទ្រពីគណៈកម្មាធិការអន្តរជាតិនៃកាកបាទក្រហម (ICRC) បានចុះអនុវត្តលើការវាយតម្លៃស្ថានភាពប្រជាពលរដ្ឋភៀសសឹកនៅក្នុងជំរំមួយចំនួនក្នុងខេត្តព្រះវិហារ ដោយមន្ត្រីនៃទីស្នាក់ការកណ្តាលទទួលបន្ទុកការងារស្តារទំនាក់ទំនងគ្រួសារ ថ្នាក់ដឹកនាំ និងមន្ត្រីសាខាកាកបាទក្រហមកម្ពុជាខេត្តព្រះវិហារ ព្រមទាំងភ្នាក់ងារស្រាវជ្រាវរកគ្រួសារ បានចូលរួមសហការយ៉ាងជិតស្និទ្ធជាមួយមន្រ្តី អាយ.ស៊ី.អរ.ស៊ី (ICRC)។

ក្នុងរយៈពេលពីរថ្ងៃនេះ ក្រុមការងារបានចូលទៅសិក្សាជំរំជនភៀសសឹក និងកន្លែងជ្រកកោននៅជិតៗ ដោយបានពិភាក្សាដោយផ្ទាល់ជាមួយសាខាកាកបាទក្រហមកម្ពុជាខេត្តព្រះវិហារ អ្នកស្ម័គ្រចិត្ត និងអាជ្ញាធរមូលដ្ឋាន ដើម្បីធ្វើការវាយតម្លៃបឋម។

ការវាយតម្លៃបានផ្ដោតលើបញ្ហាមនុស្សធម៌មួយចំនួនដូចជា៖ ការទទួលបានទឹកស្អាត និងអនាម័យ ភ្លើងអគ្គិសនី លក្ខខណ្ឌអនាម័យ និងសេវាសុខាភិបាល។ ហានិភ័យផ្នែកគាំពារ ដូចជាការបែកបាក់គ្រួសារ និងការកំណត់អត្តសញ្ញាណនៃបុគ្គលដែលមានតម្រូវការពិសេស។ ការផ្សព្វផ្សាយអប់រំអំពីសេវាស្តារទំនាក់ទំនងគ្រួសារ (RFL) ក៏ដូចជាហានិភ័យនៃអាវុធយុទ្ធភ័ណ្ឌមិនទាន់ផ្ទុះ (UXO) Mine/ERW and cluster boom ទៅឱ្យតំណាងឃុំ/សង្កាត់នៅក្នុងតំបន់ដែលរងផលប៉ះពាល់។

ការវាយតម្លៃរួមនេះបានរួមចំណែកក្នុងការស្វែងយល់កាន់តែទូលំទូលាយពីតម្រូវការជាបឋម និងបញ្ហាប្រឈមជាក់ស្តែងដែលប្រជាពលរដ្ឋត្រូវប្រឈមនាពេលជម្លៀស និងបង្ហាញពីការប្តេជ្ញារបស់កាកបាទក្រហមកម្ពុជា និង អាយ.ស៊ី.អរ.ស៊ី ក្នុងការផ្ដល់ជំនួយដល់ជនរងគ្រោះ ស្របតាមគោលការណ៍មនុស្សធម៌។ ក្រុមការងារនឹងបន្តអនុវត្តភារកិច្ចវាយតម្លៃនៅតំបន់ជនភៀសសឹកផ្សេងៗទៀតក្នុងខេត្តសៀមរាបនៅថ្ងៃបន្ទាប់៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)