AKP កណ្ដាល ថ្ងៃទី០១ ខែសីហា ឆ្នាំ២០២៥-- អាជ្ញាធរបានចុះហាមឃាត់ និងណែនាំប្រជាពលរដ្ឋ ឱ្យរុះរើ រោងខុសច្បាប់នានា ដែលបានលបលួចធ្វើបែបអនាធិបតេយ្យ និងហាមឃាត់សកម្មភាពគ្រោងធ្វើរោងថ្មីខុសច្បាប់ លើដីចំណីផ្លូវ តាមបណ្តោយខ្នងទំនប់ចុងសារ៉ាយស្ថិតនៅភូមិដងគោម ភូមិព្រែកតាមែ និងភូមិព្រែកក្តាម ក្នុងឃុំកំពង់អុស ស្រុកពញាឮ កាលពីថ្ងៃទី៣១ ខែកក្កដា ឆ្នាំ២០២៥។

ក្នុងការចុះអនុវត្ត ការហាមឃាត់ធ្វើរោងខុសច្បាប់លើដីចំណីផ្លូវរបស់រដ្ឋ លោក ថន សុវណ្ណា អភិបាលស្រុកពញាឮ បានធ្វើការពន្យល់ណែនាំទៅដល់ប្រជាពលរដ្ឋ កុំឱ្យជឿតាមមេខ្យល់ ដែលនាំបងប្អូន មកប្រព្រឹត្តអំពើខុសច្បាប់ តាមរយៈមកលបលួចចាប់ដីចំណីផ្លូវសាធារណៈលើខ្នងទំនប់នេះ ធ្វើជាកម្មសិទ្ធិផ្ទាល់ខ្លួនសម្រាប់ធ្វើ រោងជាដើម ដែលទង្វើនេះ ខុសច្បាប់ទាំងស្រុង ហើយមិនអាចអត់ឱនឱ្យបានដាច់ខាត។ ដូច្នេះ នាពេលនេះអាជ្ញាធរស្នើសុំដល់បងប្អូន ដែលបានលួចធ្វើ រោងខុសច្បាប់នេះ សុំឱ្យរុះរើចេញជាបន្ទាន់ ពីលើដីចំណីផ្លូវរដ្ឋ និងហាមដាច់ខាតលបលួចធ្វើរោងថ្មីខុសច្បាប់បន្តទៀត បើពុំនោះទេ អជ្ញាធរនឹងចាត់វិធានការតាមផ្លូវច្បាប់ ចំពោះបុគ្គលណាដែលហ៊ានប្រព្រឹត្តដោយមិនលើកលែងដាច់ខាត។

រោងខុសច្បាប់ បែបអនាធិបតេយ្យនេះ សរុបមានចំនួន១២៣  ដែលបានធ្វើលើដីចំណីផ្លូវសាធារណៈ តាមបណ្តោយខ្នងទំនប់ចុងសារ៉ាយ ស្ថិតនៅក្នុងភូមិចំនួន៣ រួមមាន ភូមិដងគោម ភូមិព្រែកតាមែ និងភូមិព្រែកក្តាម ក្នុងឃុំកំពង់អុស ហើយក្នុងនោះ ក៏មានប្រជាពលរដ្ឋ១៣រោង បានរុះរើចេញតាមការណែនាំរបស់អជ្ញាធរ។

លោកអភិបាលស្រុកបានបញ្ជាក់ឱ្យដឹងផងដែរថា កាលពីឆ្នាំ២០២៣ រដ្ឋបាលស្រុកពញាឮ បានចុះមកធ្វើការផ្សព្វផ្សាយ ដល់ប្រជាពលរដ្ឋទូទៅអំពីការទប់ស្កាត់ហាមឃាត់ការបោះបង្គោលព្រំដីទំនាស់ ឬការឈូសឆាយផ្លាស់ប្តូរ សណ្ឋានដីទំនាស់ ព្រមទាំងហាមឃាត់ការសាងសង់សំណង់នានានៅក្នុងតំបន់នេះរួចហើយដែរ។ តែបើទោះបីមានការហាមឃាត់ជាច្រើនលើកច្រើនសារយ៉ាងណាក៏ដោយ ក៏នៅតែមានមេខ្យល់ និងប្រជាពលរដ្ឋខិលខូចមួយចំនួន នៅក្នុងឃុំកំពង់អុស និងមកពីបណ្តា ស្រុក ខេត្ត មួយចំនួនទៀត បានមកលបលួចធ្វើ រោង តូបខុសច្បាប់ នៅពេលយប់ជាបន្តបន្ទាប់លើដីចំណីផ្លូវខ្នងទំនប់ចុងសារ៉ាយនេះ៕

ដោយ ណយ នឿន (ប្រភព៖ រដ្ឋបាលខេត្តកណ្តាល)