AKP ភ្នំពេញ ថ្ងៃទី០១ ខែសីហា ឆ្នាំ២០២៥-- នៅសណ្ឋាគារសាងរីឡាភ្នំពេញ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានអញ្ជើញជាអធិបតីក្នុងពិធីបិទវេទិកាមេគង្គឆ្នាំ២០២៥ ក្រោមប្រធានបទ "ការពង្រឹងសេដ្ឋកិច្ចប្រកបដោយភាពធន់និងបរិយាបន្ន នៅក្នុងមហាអនុតំបន់ទន្លេមេគង្គ តាមរយៈសេដ្ឋកិច្ចថ្មី" កាលពីថ្ងៃទី៣១ ខែកក្កដា ឆ្នាំ២០២៥។

ឯកឧត្តម ប៊ិន ត្រឈៃ បានមានប្រសាសន៍ថា ក្នុងនាមរាជរដ្ឋាភិបាលកម្ពុជា យើងមានមោទនភាពក្រៃលែងក្នុងការធ្វើជាម្ចាស់ផ្ទះ សម្រាប់ការរៀបចំវេទិកាមេគង្គឆ្នាំ២០២៥។ វេទិកាមេគង្គឆ្នាំ២០២៥ គឺជាវេទិកាដើម្បីបន្តបង្រួបបង្រួមអ្នកដឹកនាំ អ្នកធ្វើឱ្យមានការផ្លាស់ប្តូរ និងអ្នកច្នៃប្រតិដ្ឋដែលមានចក្ខុវិស័យឆ្ពោះទៅមុខបំផុតក្នុងតំបន់ នៅក្រោមដំបូលតែមួយ។ ឯកឧត្តមរដ្ឋមន្ត្រី បានគូសបញ្ជាក់បន្ថែមថា យើងកំពុងស្ថិតនៅដំណាក់កាលសំខាន់មួយ ក្នុងដំណើរនៃការអភិវឌ្ឍតំបន់របស់យើង។ ល្បឿននៃការផ្លាស់ប្តូរ ការប្រែប្រួលអាកាសធាតុ ផលជះនៃបច្ចេកវិទ្យា និងបម្រែបម្រួលប្រជាសាស្ត្រ កំពុងបង្កើនល្បឿន ហើយចាំបាច់ណាស់គន្លងនៃការអភិវឌ្ឍរបស់យើងឥលូវនេះត្រូវតែលើសពីមុន និងប្រកបដោយភាពធន់ រួមទាំងមានការត្រៀមខ្លួនរួចជាស្រេចសម្រាប់ពេលអនាគត។ នេះជាមូលហេតុដែលវេទិកាមេគង្គឆ្នាំ២០២៥ បានលើកយកប្រធានបទ "ការពង្រឹងសេដ្ឋកិច្ចប្រកបដោយភាពធន់និងបរិយាបន្ន នៅក្នុងមហាអនុតំបន់ទន្លេមេគង្គ តាមរយៈសេដ្ឋកិច្ចថ្មី" ក្នុងឆ្នាំនេះ គឺមានសារៈសំខាន់ និងទាន់ពេលវេលា។

ឯកឧត្តមរដ្ឋមន្ត្រីមានប្រសាសន៍បន្តថា គំរូនៃការអភិវឌ្ឍបែបប្រពៃណី ត្រូវបានយល់ស្របយ៉ាងទូលំទូលាយថា “លែងគ្រប់គ្រាន់ហើយ” ជំនួសមកវិញយើងត្រូវទទួលយកម៉ាស៊ីនជំរុញដំណើរអភិវឌ្ឍន៍ថ្មីៗ ដូចជា សេដ្ឋកិច្ចបៃតង សេដ្ឋកិច្ចថែទាំ និងសេដ្ឋកិច្ចច្នៃប្រតិដ្ឋ ដែលនេះមិនមែនគ្រាន់តែជានិន្នាការដែលត្រូវឆ្លងកាត់ទេ ប៉ុន្តែជាផ្លូវយុទ្ធសាស្ត្រសម្រាប់ការផ្លាស់ប្តូរក្នុងតំបន់។ សម្រាប់កម្ពុជា គោលការណ៍ទាំងនេះបានបង្កប់យ៉ាងរឹងមាំ នៅក្នុងចក្ខុវិស័យអភិវឌ្ឍន៍ជាតិរបស់យើង។ រាជរដ្ឋាភិបាលកម្ពុជាបានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ដែលផ្តោតលើការធ្វើពិពិធកម្មសេដ្ឋកិច្ច ការអភិវឌ្ឍមូលធនមនុស្ស ចីរភាពបរិស្ថាន និងឌីជីថលូបនីយកម្ម។

ឯកឧត្តមរដ្ឋមន្ត្រីបានបន្ថែមថា  ទាំងនេះមិនមែនជាគោលបំណងដាច់ពីគ្នាទេ វាជាសសរស្តម្ភដែលមានអន្តរកម្មទៅវិញទៅមក និងផ្សារភ្ជាប់យ៉ាងជិតស្និទ្ធជាមួយនឹងគំនិតប្រធានបទ ដែលបានចែករំលែកក្នុងអំឡុងពេលវេទិកានេះ។ កម្ពុជា ជឿថាការវិនិយោគលើមនុស្ស ការការពារធនធានធម្មជាតិ និងការជំរុញការបង្កើតថ្មី មិនមែនជាជម្រើសទេ ប៉ុន្តែ គឺជាអ្វីដែលមិនអាចខ្វះបាន និងត្រូវបានចែករំលែកក្នុងតំបន់មេគង្គ៕

ដោយ៖ ពេជ្រ សំអឿន(ប្រភព៖ ក្រសួងផែនការ)