AKP ភ្នំពេញ ថ្ងៃទី០១ ខែសីហា ឆ្នាំ២០២៥--អ្នកនាំពាក្យក្រសួងការពារជាតិកម្ពុជាបានគូសបញ្ជាក់ថា យោធាថៃបានបញ្ជាក់ប្រាប់កម្ពុជាថា កងកម្លាំងទាហានកម្ពុជាចំនួន២០រូបដែលថៃចាប់ខ្លួន កំពុងស្ថិតក្នុងការគ្រប់គ្រងរបស់ថៃនិងមានសុវត្ថិភាពល្អ។ 

ថ្លែងក្នុងសន្នីសីទសារព័ត៌មាន នាព្រឹកថ្ងៃទី០១ ខែសីហា ឆ្នាំ២០២៥ លោកជំទាវឧត្តមសេនីយ៍ឯក  ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិកម្ពុជាបានលើកឡើងឱ្យដឹងដឹងយ៉ាង ដូច្នេះថា៖ «កងកម្លាំងយើងចំនួន២០រូបដែលដែលកំពុងស្ថិតនៅក្រោមការគ្រប់គ្រងរបស់ថៃ ចាប់ពីថ្ងៃទី២៩ ខែកក្កដា ឆ្នាំ២០២៥មក។ ជាមូួយគ្នានេះ យោធាថៃក៏បានបញ្ជាក់ថាពួកគេមានសុវត្ថិភាព ហើយរាជរដ្ឋាភិបាលកម្ពុជាកំពុងតែបន្តធ្វើការចរចា ហើយកំពុងជំរុញឱ្យភាគីថៃបញ្ជូនកងកម្លាំងរបស់យើងឱ្យបានឆាប់រហ័សស្របតាមច្បាប់មនុស្សធម៌អន្តរជាតិ»។ លោកជំទាវ អ្នកនាំពាក្យក៏បានអះអាងថា កម្ពុជាក៏បានស្នើឱ្យម៉ាឡេស៊ី  ដែលជាប្រធានអាស៊ានឱ្យជួយអន្តរាគមន៍ ឱ្យភាគីថៃឆាប់ប្រគល់ទាហានកម្ពុជាឱ្យមកយើងវិញផង។ 

លោកជំទាវឧត្តមសេនីយ៍ឯក បានគូសបញ្ជាក់បន្ថែមថា៖ «ក្រសួងការពារជាតិ និងកងយោធលខេមរភូមិន្ទ នឹងមិនទុកសមាជិករបស់ខ្លួនណាម្នាក់ចោល នោះទេ ក្នុងកាលៈទេសៈណាក៏ដោយ»៕

ដោយ៖ ប៊ុនរិទ្ធ