AKP ព្រះវិហារ ថ្ងៃទី៣១ ខែកក្កដា ឆ្នាំ២០២៥-- ឯកឧត្ដម ហ៊ុន សុរិទ្ធី អភិបាលរងរាជធានីភ្នំពេញ តំណាងឱ្យឯកឧត្ដម ឃួង ស្រេង អភិបាលរាជធានីភ្នំពេញ នៅថ្ងៃទី៣១ ខែកក្កដា ឆ្នាំ២០២៥ បាននាំយកអំណោយជាគ្រឿងឧបភោគបរិភោគ និងសម្ភារប្រើប្រាស់ចាំបាច់ជាច្រើនមុខរបស់រដ្ឋបាលរាជធានីភ្នំពេញ ទៅប្រគល់ជូនរដ្ឋបាលខេត្តព្រះវិហារ និងវីរកងទ័ពជួរមុខ វរនគរបាលការពារព្រំដែនគោកលេខ៧៩៣ ទិសព្រះវិហារ ដែលកំពុងឈរជើងដ៏អង់អាចក្លាហាន ការពារបូរណភាពទឹកដីពីការឈ្លានពានរបស់ខ្មាំងសត្រូវ។

អំណោយមានធុងហ្គាសធំចំនូន៧០ធុង ប្រគល់ជូនរដ្ឋបាលខេត្តព្រះវិហារ តាមរយៈឯកឧត្ដម គឹម ចាន់បញ្ញា អភិបាលរងខេត្ត តំណាងឯកឧត្ដម គីម រិទ្ធី អភិបាលខេត្តព្រះវិហារ ប្រគល់ជូនដល់វរនគរបាលការពារព្រំដែនគោកលេខ៧៩៣ ខេត្តព្រះវិហារ ទទួលដោយលោក វរសេនីយ៍ឯក ឃួន ប៊ុនធឿន មេបញ្ជាការវរនគរបាលការពារព្រំដែនលេខ ៧៩៣ ជូនកងពលតូចអន្តរាគមន៍លេខ៩ តាមរយៈលោកវរសេនីយ៍ឯក អួង សុវណ្ណា មេបញ្ជាការរង កងពលតូចអន្តរាគមន័លេខ៩។

ឯកឧត្ដម ហ៊ុន សុរិទ្ធី តំណាងឯកឧត្ដម ឃួង ស្រេង បានសម្តែងសមានចិត្តអាណិតអាសូរជាពន់ពេកចំពោះទុក្ខវេទនារបស់បងប្អូនប្រជាពលរដ្ឋ ដែលបានចាកចោលផ្ទះសម្បែង ស្រែចម្ការ រត់ភៀសខ្លួន គេចចេញពីតំបន់សមរភូមិប្រយុទ្ធ មករស់នៅលើតំបន់សុវត្ថិភាពនាពេលនេះ។ ឯកឧត្ដមក៏បានថ្លែងអំណរគុណយ៉ាងជ្រាលជ្រៅបំផុតចំពោះនគរបាលការពារព្រំដែនលេខ៧៩៣ដែលមានទឹកចិត្តដ៏អង់អាចក្លាហានរបស់បងប្អូនវីរកងទ័ពជួរមុខដែលបានពុះពារលះបង់សាច់ស្រស់ឈាមស្រស់ ដើម្បីបុព្វហេតុការពារជាតិ មាតុភូមិពីការឈ្លានពានរបស់ខ្មាំងសត្រូវ។

ឯកឧត្ដមក៏បាននាំទៅនូវការផ្ដាំផ្ញើសាកសួរសុខទុក្ខពីសំណាក់ឃួង ស្រេង ជូនពរដល់បងប្អូនវីរកងទ័ពជួរមុខ និងកងនគរបាលដែលកំពុងឈរជើងនៅជួរមុខទាំងអស់ សូមសុខសប្បាយ សុខភាពល្អ និងទទួលបានជ័យជម្នះលើខ្មាំងសត្រូវ។  អំណោយជាគ្រឿងឧបភោគ បរិភោគ និងសម្ភារប្រើប្រាស់ជាច្រើននេះ ដែលរដ្ឋបាលរាជធានីភ្នំពេញ នាំយកមកផ្ដល់ជូនខាងលើ គឺបានពីសប្បុរសជននានា និងប្រជាពលរដ្ឋ នៅក្នុងរាជធានីភ្នំពេញដែលបានចែករំលែកធនធាន ជាមួយរដ្ឋបាលរាជធានីភ្នំពេញ ចូលរួមក្នុងការផ្សារភ្ជាប់ រវាងសមរភូមិក្រោយ និងសមរភូមិមុខឧបត្ថម្ភដល់វីរកងទ័ពជួរមុខ និងក្រុមគ្រួសារប្រជាពលរដ្ឋ ដែលកំពុងជម្លៀស ចេញ ពីផ្ទះសម្បែងមកស្នាក់នៅទីកន្លែងសុវត្ថិភាព។

លោកវរសេនីយ៍ឯក អួង សុវណ្ណា មេបញ្ជាការរង កងពលតូចអន្តរាគមន៍លេខ៩ តំណាងថ្នាក់ដឹកនាំខេត្តព្រះវិហារ និងតំណាងឱ្យវីរកងទ័ពនៅជួរមុខទិសព្រះវិហារទាំអស់ ក៏បានថ្លែងនូវការអរគុណយ៉ាងជ្រាលជ្រៅបំផុត ជូនចំពោះឯកឧត្ដម ឃួង ស្រេង ដែលតែងបានចាត់តំណាងនាំយកអំណោយពីរដ្ឋបាលរាជធានីភ្នំពេញ មកផ្តល់ជូនប្រជាពលរដ្ឋភៀសសឹក និងជូនដល់បងប្អូនវីរកងទ័ពដែលកំពុងឈរជើងការពារបូរណភាពទឹកដីដែលនេះ សបញ្ជាក់ឱ្យឃើញថាសមរភូមិក្រោយ និងសមរភូមិមុខគឺរួមចិត្តតែមួយ ហើយបងប្អូនវីរកងទ័ពទាំងអស់ ប្តេជ្ញាការពារអធិបតេយ្យភាពជាតិរបស់យើង មិនឱ្យខ្មាំងចូលឈ្លានពានជាដាច់ខាត៕

ដោយ សួស សំរិត