AKP ព្រះវិហារ ថ្ងៃទី៣០ ខែកក្កដា ឆ្នាំ២០២៥ -- រដ្ឋបាលរាជធានីភ្នំពេញបាននាំយកអំណោយ សប្បុរសជនជាសម្ភារប្រើប្រាស់ជាង១០០មុខមកប្រគល់ជូនវីរកងទ័ពជួរមុខទិសខេត្ដព្រះវិហារ ដឹកនាំដោយឯកឧត្ដម សុខ ពេញវុធ អភិបាលរងរាជធានីភ្នំពេញ តំណាងឱ្យឯកឧត្ដម ឃួង សេង អភិបាលរាជធានីភ្នំពេញ នាថ្ងៃទី៣០ ខែកក្កដា ឆ្នាំ២០២៥។

គ្រឿងឧបភោគ បរិភោគ និងសម្ភារប្រើប្រាស់ជាង១០០មុខដែលរដ្ឋបាលរាជធានីនាំយកមកប្រគល់ជូនឯកឧត្ដម ឃី សុខា អភិបាលរងខេត្ត តំណាងឯកឧត្ដម គីម រិទ្ធី អភិបាលខេត្តព្រះវិហារ សម្រាប់ចែកជូនបន្តដល់ប្រជាពលរដ្ឋ ដែលបានជម្លៀសចេញពីផ្ទះសម្បែងមករស់នៅកន្លែងសុវត្ថិភាព។ ដោយឡែកចំពោះវីរកងទ័ពជួរមុខទិសព្រះវិហារដែលកំពុងឈរជើងដ៏អង់អាចក្លាហានការពារអធិបតេយ្យភាពជាតិខ្មែរ រួមមានបញ្ជាការដ្ឋានអង្គរក្ស តាមរយៈលោកឧត្តមសេនីយ៍ឯក សួន ពិរុណ មេបញ្ជាការរងបញ្ជាការដ្ឋានអង្គរក្ស តំណាងលោក នាយឧត្តមសេនីយ ហ៊ីង ប៊ុនហៀង អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការ បញ្ជាការដ្ឋានអង្គរក្ស កងពលតូចអន្តរាគមន៍លេខ៩ តាមរយៈលោកវរសេនីយ៍ឯក អួង សុវណ្ណា មេបញ្ជាការរងកងពលតូចអន្តរាគមន័លេខ៩ កងពលតូចអន្តរាគមន៍លេខ៨តាមរយៈលោកឧត្តមសេនីយ៍ត្រី  ចាន់ សុខុន មេបញ្ជាការកងពលតូចអន្តរាគមន៍លេខ៨ ព្រមទាំងប្រគល់ជូនកងពលតូចអន្តរាគមន៍លេខ៧ផងដែរ។

ចំពោះវីរកងទ័ពនៅជួរមុខ ឯកឧត្ដម សុខ ពេញវុធ បានពាំនាំនូវការផ្ដាំផ្ញើសាកសួរសុខទុក្ខដោយក្តីនឹករលឹកពីសំណាក់ ឯកឧត្ដម ឃួង ស្រេង ជូនដល់វីរកងទ័ពយើងទាំងអស់ ព្រមទាំងបានថ្លែងអំណរគុណយ៉ាងជ្រាលជ្រៅបំផុត ចំពោះទឹកចិត្តដ៏អង់អាចក្លាហានរបស់បងប្អូនវីរកងទ័ព ដែលបានពុះពារលះបង់សាច់ស្រស់ឈាមស្រស់ ដើម្បីបុព្វហេតុការពារជាតិមាតុភូមិ។ ឯកឧត្តមក៏បានជូនពរដល់បងប្អូនវីរកងទ័ពដែលកំពុងឈរជើងនៅជួរមុខទាំងអស់ សូមសុខសប្បាយ សុខភាពល្អ និងទទួលបានជ័យជម្នះលើខ្មាំងសត្រូវ។

ឯកឧត្ដម សុខ ពេញវុធ បានបញ្ជាក់ថា អំណោយជាគ្រឿងឧបភោគ បរិភោគ និងសម្ភារប្រើប្រាស់ជាង១០០មុខ ដែលរដ្ឋបាលរាជធានីភ្នំពេញនាំយកមកនេះ គឺទទួលបានពីសប្បុរសជន និងប្រជាពលរដ្ឋ នៅក្នុងរាជធានីភ្នំពេញ ដែលបានចែករំលែកធនធានតាមលទ្ធលភាពរៀងៗខ្លួន ទោះបីតិចក្តីច្រើនក្តី បាននាំយកមកចូលរួមជាមួយរដ្ឋបាលរាជធានីភ្នំពេញ ដើម្បីឧបត្ថម្ភដល់វីរកងទ័ពជួរមុខ និងក្រុមគ្រួសារប្រជាពលរដ្ឋ ដែលកំពុងជម្លៀសចេញពីផ្ទះសម្បែងមកស្នាក់នៅទីកន្លែងសុវត្ថិភាព។ នេះពិតជាបានបង្ហាញឱ្យឃើញពីសាមគ្គីភាពជាធ្លុងមួយ ខ្មែរស្រឡាញ់ខ្មែរ និងក្នុងស្មារតី ខ្មែរជួយខ្មែរ។

ក្នុងឱកាសនោះ ឯកឧត្ដម ឃី សុខា អភិបាលរងខេត្តព្រះវិហារ តំណាងថ្នាក់ដឹកនាំខេត្ត និងតំណាងឱ្យវីរកងទ័ពនៅជួរមុខទិសព្រះវិហារទាំងអស់ បានអរគុណចំពោះឯកឧត្ដម ឃួង ស្រេង អភិបាលរាជធានីភ្នំពេញ ដែលតែងបានចាត់តំណាងនាំយកអំណោយពីរាជធានីភ្នំពេញ មកផ្តល់ជូនប្រជាពលរដ្ឋភៀសសឹក និងជូនដល់បងប្អូនវីរកងទ័ពដែលកំពុងឈរជើងការពារបូរណភាពទឹកដី ដែលនេះបញ្ជាក់ឃើញថាសមរភូមិក្រោយ និងសមរភូមិមុខគឺរួមចិត្តតែមួយ ហើយបងប្អូនវីរកងទ័ពទាំងអស់ ប្តេជ្ញាការពារអធិបតេយ្យភាពជាតិរបស់យើង៕

ដោយ សួស សំរិត