AKP ព្រះសីហនុ ថ្ងៃទី៣០ ខែកក្កដា ឆ្នាំ២០២៥-- លោក សរ កក្កដា អភិបាលនៃគណ:អភិបាលក្រុងព្រះសីហនុ បានដឹកនាំគណៈប្រតិភូសាលាក្រុងព្រះសីហនុ បន្តសួរសុខទុក្ខ និងនាំយកអំណោយមនុស្សធម៌ប្រគល់ជូនវីរកងទ័ព វរសេនាតូចទី២ កាំជ្រួចការពារអាកាសរយ:កម្ពស់ខ្លី ប្រចាំក្រុងសំរោង ខេត្តឧត្តរមានជ័យ និងនាំយកអំណោយចែកជូនប្រជាពលរដ្ឋភៀសសឹកដែលកំពុងស្នាក់នៅជាក្រុមកន្លែងសុវត្ថិភាព និងនៅទីទួលសុវត្ថិភាព ស្ថិតនៅភូមិបាត់ថ្កៅ ឃុំចុងកាលលើ ស្រុកចុងកាល ខេត្តឧត្តរមានជ័យ ថ្ងៃទី៣០ ខែកក្កដា ឆ្នាំ២០២៥។

ក្នុងឱកាសនោះ លោក សរ កក្កដា បានមានប្រសាសន៍សំណេះសំណាលជាមួយវីរកងទ័ពនៃបញ្ជាការដ្ឋានកងពលតូចទី២ កាំជ្រួចការពារអាកាសរយ:ចម្ងាយខ្លី ប្រចាំក្រុងសំរោង ដោយគូសបញ្ជាក់ថា អំណោយទាំងអស់នេះគឺជាការចូលរួមរបស់បងប្អូនសប្បុរសជនក្នុងក្រុងព្រះសីហនុ ដើម្បីឱ្យសាលាក្រុងយកមកចែកជូនដល់វីរកងទ័ពរបស់យើងដែលកំពុងឈរជើងការពារបូរណភាពទឹកដីនៅតាមបន្ទាត់ព្រំដែនកម្ពុជា-ថៃ។ អំណោយដែលបាននាំយកមកនាពេលនេះមានជាច្រើនប្រភេទផ្សេងៗគ្នា ហើយជាពិសេសនោះ គឺម្ហូបអាហារស្ងួតដែលពួកគាត់បានខិតខំវិចខ្ចប់ផ្ញើមកឱ្យដល់ដៃវីរកងទ័ពរបស់យើងដែលនៅតាមសមភូមិជួបការខ្លះខាត នៅពេលដែលទទួលកាតព្វកិច្ចឈរជើងការពារទឹកដី កម្ពុជាមានសិទ្ធិ និងកាតព្វកិច្ចការពារបូរណភាពទឹកដីរបស់ខ្លួនមិនឱ្យសត្រូវមកឈ្លានពានបាននោះទេ។

ទន្ទឹមនោះ លោកអភិបាលក្រុងព្រះសីហនុក៏បានបន្តដំណើរធ្វើការសំណេះសំណាលជាមួយប្រជាពលរដ្ឋភៀសសឹកដែលរស់នៅក្នុងទីបញ្ជាការស្រាលស្ថិតនៅវត្តបាត់តាកូវ ភូមិបាត់ថ្កៅ ឃុំចុងកាលលើ ស្រុកចុងកាល ខេត្តឧត្តរមានជ័យ សូមឱ្យពួកគាត់ត្រូវចេះថែរក្សាសុខភាព ត្រូវហូបស្អាត ផឹកស្អាត និងត្រូវមានអនាម័យ ដើម្បីគ្រួសារ និងកូនចៅរបស់យើងចៀសផុតពីជំងឺផ្សេងៗ មុននឹងបានវិលត្រឡប់ទៅកាន់ភូមិឋានវិញ ហើយរដ្ឋបាលក្រុងព្រះសីហនុនឹងខិតខំកៀរគរអំណោយមនុស្សធម៌បន្តទៀត ដើម្បីបន្តយកមកចែកជូនដល់វីរកងទ័ព ក៏ដូចជាប្រជាពលរដ្ឋភៀសសឹករបស់យើងតាមអ្វីដែលយើងធ្វើទៅបាន ដើម្បីរួមគ្នាការពារប្រទេសជាតិ មាតុភូមិរបស់យើង។

ជាការឆ្លើយតបលោក ឧត្តមសេនីយ៍ឯក យិន ជំនិត ក៏បានថ្លែងអំណគុណគណ:ប្រតិភូក្រុងព្រះសីហនុនៃខេត្តព្រះសីហនុ ដែលបាននាំយកអំណោយជាគ្រឿងឧបភោគ បរិភោគ និងសម្ភារប្រើប្រាស់ជាច្រើនមុខជូនដល់កងទ័ពវរសេនាតូចទី២ កាំជ្រួចការពារអាកាសរយ:កម្ពស់ខ្លី ប្រចាំក្រុងសំរោង ខេត្តឧត្តរមានជ័យ សរបញ្ជាក់ឱ្យឃើញពីការយកចិត្តទុកដាក់ពីបងប្អូនប្រជាពលរដ្ឋកម្ពុជានៅសមភូមិក្រោយ ដែលតែងតែគិតគូរអំពីសុខទុក្ខកងទ័ពនៅសមភូមិមុខដែលកំពុងមានភារកិច្ចការពារទឹកដីនៅតាមព្រំដែនទិសខេត្តឧត្តរមានជ័យ ក៏ដូចជាទិសផ្សេងៗទៀតនៅតាមខ្សែបន្ទាត់កម្ពុជា-ថៃ ដោយមិនអនុញ្ញាតឱ្យពួកឈ្លានពានថៃចូលមកកាន់កាប់ និងគ្រប់គ្រងទឹកដីនៅតាមខ្សែបន្ទាត់ព្រំដែនបាននោះទេ ហើយវីរកងទ័ពរបស់យើងបេ្តជ្ញាបូជាសាច់ស្រស់ ឈាមស្រស់ការពារក្នុងបុព្វហេតុជាតិរបស់ខ្លួនដោយមិនមានរាថយនោះឡើយ និងក៏សូមជូនពរឱ្យគណៈប្រតិភូក្រុងព្រះសីហនុ ក៏ដូចជាប្រជាជនក្រុងព្រះសីហនុ ទទួលបានសេចក្តីសុខ រីកចម្រើនក្នុងក្រុមគ្រួសារ។

សូមបញ្ជាក់ថា កាលពីម្សិលមិញគណៈប្រតិភូរដ្ឋបាលក្រុងព្រះសីហនុដឹកនាំដោយលោក សរ កក្កដា អភិបាលក្រុងព្រះសីហនុ ក៏បាននាំយកអំណោយចែកជូនវីរកងទ័ពប្រចាំទិសខេត្តព្រះវិហារ៖ ១. បញ្ជាការដ្ឋានអង្គរក្សប្រចាំការទិសប្រាសាទព្រះវិហារ (95) តាមរយៈភស្តុភារហិរញ្ញវត្ថុ ២. អង្គភាពអាវុធគាំទ្រទី១ BM21 ទិសប្រាសាទព្រះវិហារ ៣. រដ្ឋបាលខេត្តព្រះវិហារ ដើម្បីបន្តចែកជូនវីរកងទ័ពឈរជើងនៅតាមខ្សែបន្ទាត់ជួរមុខ និងជនភៀសសឹកក្នុងខេត្តព្រះវិហារ៕

ដោយ ងូ សុមុនី