AKP បន្ទាយមានជ័យ ថ្ងៃទី២៨ ខែកក្កដា ឆ្នាំ២០២៥--

ឯកឧត្ដម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ នាព្រឹកថ្ងៃទី២៨ ខែកក្កដា ឆ្នាំ២០២៥ បានបន្តចុះសួរសុខទុក្ខ និងនាំយកអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ជូនដល់បងប្អូនជនភៀសសឹក ដែលបានជម្លៀសខ្លួនចេញពីតំបន់ព្រំដែន ដើម្បីគេចចេញពីសង្គ្រាមឈ្លានពានយ៉ាងគឃ្លើនពីទាហានថៃ។ បងប្អូនជនភៀសសឹកទាំងនេះកំពុងស្នាក់នៅទីកន្លែងមានសុវត្ថិភាព ក្នុងស្រុកព្រះនេត្រព្រះ ខេត្តបន្ទាយមានជ័យ។

យោងតាមប្រសាសន៍របស់ឯកឧត្តម អ៊ុ រាត្រី អភិបាលខេត្តបន្ទាយមានជ័យ គិតត្រឹមថ្ងៃទី២៨ ខែកក្កដា ឆ្នាំ២០២៥ ប្រជាពលរដ្ឋរស់នៅតាមព្រំដែនប្រមាណ៧,៨០០គ្រួសារ ស្មើនឹង២៤,៩០០នាក់ បានភៀសខ្លួនពីលំនៅឋានទៅកាន់ទីកន្លែងសុវត្ថិភាព ដែលអាជ្ញាធរបានរៀបចំជាច្រើនកន្លែង។ ការភៀសខ្លួននេះកើតឡើងក្រោយពីមានការឈ្លានពានយ៉ាងគឃ្លើនពីសំណាក់កងទ័ពថៃ ចាប់តាំងពីថ្ងៃទី២៤ ខែកក្កដា រហូតមកដល់ថ្ងៃទី២៨ ខែកក្កដា ឆ្នាំ២០២៥។ 

ក្នុងពិធីចែកអំណោយនេះ ឯកឧត្ដម ឌិត ទីណា បានសម្តែងក្តីបារម្ភយ៉ាងខ្លាំងចំពោះស្ថានភាពរបស់ប្រជាពលរដ្ឋដែលរងគ្រោះដោយសារសង្គ្រាម និងបានមានប្រសាសន៍ថា "ខ្ញុំពិតជាមានការសោកស្តាយយ៉ាងខ្លាំង ដែលបងប្អូនប្រជាពលរដ្ឋយើងត្រូវជួបប្រទះនូវស្ថានភាពលំបាកបែបនេះ ដោយសារតែការឈ្លានពានយ៉ាងគឃ្លើនពីសំណាក់កងទ័ពថៃ។ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត តែងតែយកចិត្តទុកដាក់ខ្ពស់ចំពោះសុខទុក្ខរបស់ប្រជាពលរដ្ឋទាំងអស់ ជាពិសេសបងប្អូនដែលកំពុងជួបការលំបាក។ អំណោយដែលយើងបាននាំយកមកជូននៅថ្ងៃនេះ គឺពុំមែនត្រឹមតែជាសម្ភារប៉ុណ្ណោះទេ តែជាការបង្ហាញពីក្តីស្រឡាញ់ ការយកចិត្តទុកដាក់ និងការគាំទ្រពីថ្នាក់ដឹកនាំរាជរដ្ឋាភិបាល ចំពោះបងប្អូនជនរួមជាតិគ្រប់រូប។ យើងនឹងបន្តខិតខំប្រឹងប្រែងធ្វើអ្វីៗគ្រប់យ៉ាង ដើម្បីធានាសុវត្ថិភាព និងភាពសុខសាន្តរបស់បងប្អូន។"

ឯកឧត្ដមបានបន្តសង្កត់ធ្ងន់ថា រាជរដ្ឋាភិបាលកំពុងតាមដានយ៉ាងយកចិត្តទុកដាក់នូវស្ថានការណ៍នៅតាមព្រំដែន និងបានត្រៀមលក្ខណៈគ្រប់គ្រាន់ ដើម្បីឆ្លើយតបទៅនឹងគ្រប់សភាពការណ៍ទាំងអស់។ ឯកឧត្ដមក៏បានអំពាវនាវដល់បងប្អូនប្រជាពលរដ្ឋឱ្យរក្សាភាពស្ងប់ស្ងាត់ និងជឿជាក់លើការដឹកនាំរបស់រាជរដ្ឋាភិបាលក្នុងការដោះស្រាយបញ្ហានេះ។

ចំណែកឯបងប្អូនជនភៀសសឹកវិញបានសម្តែងនូវអារម្មណ៍ភ័យខ្លាច និងព្រួយបារម្ភយ៉ាងខ្លាំងចំពោះអនាគត។ លោកស្រី សុខុម ផល្លី អាយុ៤៥ឆ្នាំ ដែលបានភៀសខ្លួនពីភូមិព្រំដែនមួយក្នុងស្រុកបន្ទាយអំពិល ខេត្តឧត្តរមានជ័យ បានរៀបរាប់ទាំងទឹកភ្នែកថា "ពួកខ្ញុំមិននឹកស្មានថា រឿងបែបនេះនឹងកើតឡើងនោះទេ។ ខ្ញុំភ័យខ្លាចណាស់ ពេលលឺសំឡេងកាំភ្លើងធំបាញ់ផ្ទុះឡើង។ ពួកយើងរត់ចេញទាំងយប់ មិនបានយកអីតាមខ្លួនបានច្រើននោះទេ។ ពេលនេះ ខ្ញុំមិនដឹងថា ពេលណាទើបបានត្រឡប់ទៅផ្ទះវិញ ហើយស្ថានភាពនៅទីនោះនឹងទៅជាយ៉ាងណានោះទេ។" ទោះបីជាមានការភ័យខ្លាចក្តី ប្រជាពលរដ្ឋទាំងអស់បានសម្តែងការដឹងគុណយ៉ាងជ្រាលជ្រៅ ចំពោះការយកចិត្តទុកដាក់របស់សម្ដេចធិបតី ហ៊ុន ម៉ាណែត លោកជំទាវបណ្ឌិត ពេជ ចន្ទមុន្នី និងរាជរដ្ឋាភិបាល ដែលបានបញ្ជូនក្រុមការងារចុះមកជួយដល់ពួកគាត់ទាន់ពេលវេលា។

សូមបញ្ជាក់ថា  វត្តមានរបស់ឯកឧត្ដម ឌិត ទីណា នៅពេលនេះគឺដើម្បីបង្ហាញពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការការពារអធិបតេយ្យភាពជាតិ និងសុវត្ថិភាពរបស់ប្រជាពលរដ្ឋគ្រប់រូប។ អំណោយដែលបានចែកជូននៅថ្ងៃនេះ រួមមានស្បៀងអាហារ ភេសជ្ជៈ សម្ភារប្រើប្រាស់ប្រចាំថ្ងៃ និងថ្នាំសង្កូវមួយចំនួន ដែលជាការរួមចំណែកជួយសម្រាលបន្ទុកដ៏ធ្ងន់ធ្ងររបស់បងប្អូនជនភៀសសឹកក្នុងដំណាក់កាលដ៏លំបាកនេះ។ រាជរដ្ឋាភិបាលនឹងបន្តតាមដានស្ថានការណ៍ និងចាត់វិធានការចាំបាច់នានា ដើម្បីធានាបាននូវសន្តិសុខ និងសណ្តាប់ធ្នាប់នៅតាមបណ្តោយព្រំដែន ក៏ដូចជាធានាបាននូវការត្រឡប់ទៅលំនៅឋានវិញរបស់បងប្អូនជនភៀសសឹកប្រកបដោយសុវត្ថិភាព នៅពេលដែលស្ថានការណ៍មានភាពល្អប្រសើរឡើងវិញ៕

ដោយ ឈុន សារ៉ាត