AKP សៀមរាប ថ្ងៃទី២៨ ខែកក្កដា ឆ្នាំ២០២៥-- ប្រជាជនភៀសសឹកដែលជម្លៀសមកស្នាក់នៅទីតាំងសុវត្ថិភាពក្នុងខេត្តសៀមរាប គិតត្រឹមថ្ងៃទី២៧ ខែកក្កដា ឆ្នាំ២០២៥ មានចំនួន ១៤ ៨១២គ្រួសារ ស្មើនឹងចំនួន ៥០ ៦៣០នាក់ ខណៈពេលនេះ បងប្អូនកំពុងតែត្រូវការអាហារហូបចុក ដោយមើលឃើញបែបនេះ ព្រះតេជគុណ ថង ចន្ថា ចៅអធិការវត្តសំរោង ស្រុកសូទ្រនិគម និងព្រះចៅអធិការមួយចំនួននៅក្នុងក្រុងសៀមរាប ដឹកនាំដោយព្រះបវរវិជ្ជា ទេព ភឿន ព្រះវិន័យធរគណខេត្តសៀមរាប កាលពីរសៀលថ្ងៃទី២៧ ខែកក្កដា ឆ្នាំ២០២៥ បាននិមន្តចុះសួរសុខទុក្ខ និងនាំយកគ្រឿងឧបភោគបរិភោគ ដោយមានអង្ករចំនួនជិត២តោន បន្លែបង្ការ ទៅជូនដល់ប្រជាពលរដ្ឋភៀសសឹក។

ព្រះបវរវិជ្ជា ទេព ភឿន មានសង្ឃដីកាណែនាំឱ្យបងប្អូនប្រជាពលរដ្ឋ ដែលភៀសសឹកទាំងអស់សូមថែរក្សាសុខភាពអោយបានល្អត្រូវរស់នៅប្រកបដោយអនាម័យ។ ចំពោះស្បៀងអាហារនេះ ទោះបីតែតិចតួចតែអាចជួយសម្រាលទុកលំបាក់របស់ជាតិញោមបានមួយរយៈដែរ ហើយត្រូវជឿជាក់លើរដ្ឋាភិបាល ដោយព្រះអង្គលើកឡើងថា កម្ពុជាមានមូលដ្ឋានច្បាប់រឹងមាំ ដើម្បីតតាំងជាមួយថៃនៅតុលាការយុត្តិធម៌អន្តរជាតិ ហើយឯកសារច្បាប់អន្តរជាតិទាំងអស់សុទ្ធតែបានបញ្ជាក់ថា ថៃកំពុងរំលោភបំពានលើអធិបតេយ្យភាពកម្ពុជា មិនថានៅប្រាសាទតាក្របី ប្រាសាទតាមាន់តូច ប្រាសាទតាមាន់ធំ និងតំបន់មុំបីនោះទេ។ ខណៈដែលថៃមានត្រឹមតែផែនទីដែលគូសដោយឯកតោភាគីប៉ុណ្ណោះ។ កម្ពុជាអត់ធ្មត់ សង្កត់ចិត្តសម្បើមណាស់ចំពោះមុខការបំពាន និងការញុះញង់របស់ថៃ តែភាពអត់ធ្មត់របស់កម្ពុជាមានកម្រិត។ ជានិច្ចកាល កម្ពុជាតែងប្រកាន់ជំហរចង់ដោះស្រាយតាមផ្លូវចរចា និងការទូត តែផ្ទុយទៅវិញសង្គ្រាមបានផ្ទុះឡើងនៅពេលនេះ គឺភាគីថៃជាអ្នកផ្ដើមមុន៕

ដោយ ឃុត សៅ