AKP ភ្នំពេញ ថ្ងៃទី១៨ ខែកក្កដា ឆ្នាំ២០២៥ -- លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាមបានថ្លែងថា ជារៀងរាល់ថ្ងៃយើងមានតម្រូវការឈាមច្រើនសម្រាប់ជួយសង្គ្រោះអាយុជីវិតអ្នកជំងឺដែលត្រូវការនូវការចាក់បញ្ចូលឈាម ជាពិសេស ជនរងគ្រោះដោយសារគ្រោះថ្នាក់ចរាចរណ៍ និងអ្នកជំងឺដែលត្រូវការវះកាត់ ដែលពួកគាត់ត្រូវបានបាត់បង់ឈាមពីក្នុងខ្លួនហើយត្រូវការនូវការចាក់បញ្ចូលឈាមជាចាំបាច់ ពោលគឺរៀងរាល់៥នាទីម្តង យើងត្រូវការឈាមចំនួន១ប្លោក។ ការថ្លែងឱ្យដឹងពីប្រធានមជ្ឈមណ្ឌលជាតិផ្តល់ឈាមយ៉ាងដូច្នេះ ក្នុងឱកាសដែលថ្នាក់ដឹកនាំ និងបុគ្គលិក នៃធនាគារហត្ថាប្រមាណជិត២០០នាក់ធ្វើការបរិច្ចាគឈាមដោយស្ម័គ្រចិត្តជូនមជ្ឈមណ្ឌលជាតិ នាព្រឹកថ្ងៃទី១៨ ខែកក្កដា ឆ្នាំ២០២៥នេះ។

លោកវេជ្ជបណ្ឌិត សុខ ប៉ូ បានគូសបញ្ជាក់ថា បើយើងនិយាយពីតម្រូវការឈាមនៅក្នុងប្រទេសកម្ពុជា គឺ រាជធានីភ្នំពេញមានតម្រូវការច្រើនជាងគេ ដែលមជ្ឈមណ្ឌលជាតិផ្តល់ឈាមគឺជាអ្នកទទួលខុសត្រូវនៅ ក្នុងការផ្គត់ផ្គង់ឈាមប្រមាណជា៧៥ភាគរយនៃការផ្គត់ផ្គង់នៅទូទាំងប្រទេស។ ដូច្នេះហើយលោកបានអំពាវនាវឱ្យមានការចូលរួមបរិច្ចាគឈាមពីពលរដ្ឋកម្ពុជាឱ្យបានច្រើនកុះករ ដោយការបរិច្ចាគឈាមអាច ធ្វើឡើងសម្រាប់មនុស្សដែលមានវ័យចាប់ពី១៨ ដល់៦០ឆ្នាំ ដើម្បីឱ្យមជ្ឈមណ្ឌលជាតិផ្តល់ឈាមមានឈាមស្តុកគ្រប់គ្រាន់សម្រាប់ការសង្គ្រោះជីវិតអ្នកជំងឺ ដែលរួមមាន ជនរងគ្រោះដោយសារគ្រោះថ្នាក់ចរាចរណ៍ និងអ្នកជំងឺដែលព្យាបាលដោយការវះកាត់មានអ្នកវះកាត់បេះដូង និងអ្នកជំងឺមហារីកជាដើម។ 

លោកថា ទោះជាយ៉ាងក៏ដោយចុះសម្រាប់ពេលបច្ចុប្បន្ននេះការបរិច្ចាគឈាមដោយស្ម័គ្រចិត្តគឺ កាន់តែឆ្លើយតបបានយ៉ាងប្រសើរហើយចំពោះតម្រូវការតែទោះជាយ៉ាងនេះក៏ដោយប្រធានមជ្ឈមណ្ឌលជាតិរូបនេះនៅតែអំពាវនាវឱ្យមានការចូលរួម ក្នុងការផ្តល់ឈាមឱ្យបានច្រើនពីសំណាក់បងប្អូនប្រជាពលរដ្ឋ ជាពិសេសគឺក្រុមយុវវ័យ ដោយលោកវេជ្ជបណ្ឌិតបានគូសបញ្ជាក់ថា តាមនិយាមអន្តរជាតិ វាទាល់តែមានអត្រា១ភាគរយនៃប្រជាពលរដ្ឋសរុបរបស់ប្រទេសមួយក្នុង១ឆ្នាំ បានធ្វើការបរិច្ចាគឈាម នោះទើបអាចនិយាយបានថាអត្រានៃការផ្តល់ឈាមនៅក្នុងប្រទេសនោះមានលក្ខណៈល្អប្រសើរ ហើយបើយើងនិយាយពីប្រទេសកម្ពុជាដែលមានប្រជាជនប្រមាណ១៧លាននាក់វិញ គឺមានន័យថា ត្រូវមាន អ្នកបរិច្ចាគឈាមនៅក្នុង១ឆ្នាំប្រមាណ១៧ម៉ឺននាក់ ឬច្រើនជាងនេះបន្តិច នោះទើបយើងអាចមានឈាម ស្តុកទុកដើម្បីឆ្លើយតបទៅនឹងតម្រូវការបានល្អប្រសើរ។

ក្នុងឱកាសនេះ លោក មិន សុផា ប្រធាននាយកប្រតិបត្តិធនាគារហត្ថាក្នុងនាមថ្នាក់ដឹកនាំ និងបុគ្គលិក ប្រមាណជិត២០០នាក់ បានសម្តែងនូវក្តីរីករាយដែលបានធ្វើទានក្នុងការសង្គ្រោះអាយុជីវិតជនរងគ្រោះ និងអ្នកជំងឺតាមរយៈការបរិច្ចាគឈាមដោយស្ម័គ្រចិត្តជូនមជ្ឈមណ្ឌលជាតិផ្តល់ឈាមនាពេលនេះ ស្រប តាមគោលការណ៍របស់ធនាគារដែលតែងតែចូលរួមនៅក្នុងកិច្ចការសង្គម រួមមាន ការចូលរួមក្នុងវិស័យ អប់រំ សុខាភិបាល និងវិស័យផ្សេងៗទៀត ខណៈដែលការផ្តល់ឈាមនាពេលនេះក៏ជាចំណែកមួយនៃ ការចូលរួមរបស់ធនាគារហត្ថានៅក្នុងកិច្ចការសង្គមផងដែរ។ 

លោកថា នេះគឺជាការចូលរួមដោយស្ម័គ្រចិត្ត និងដោយក្តីសោមនស្សរីករាយពីសំណាក់ថ្នាក់ដឹកនាំ និងបុគ្គលិក នៃធនាគារហត្ថា ក្នុងការបំពេញនូវតម្រូវការឈាមរបស់មជ្ឈមណ្ឌលជាតិផ្តល់ឈាម ដែលតាមការបញ្ជាក់របស់ប្រធានមជ្ឈមណ្ឌលជាតិផ្តល់ឈាមថា រៀងរាល់៥នាទីម្តងយើងត្រូវការឈាមចំនួន១ប្លោក ដើម្បីជួយសង្គ្រោះជីវិតអ្នកជំងឺ ជា ពិសេសគឺជនរងគ្រោះដោយសារគ្រោះថ្នាក់ចរាចរណ៍។

លោក មិន សុផា បានឱ្យដឹងថា នេះគឺជាលើកទី៣ហើយដែលថ្នាក់ដឹកនាំ និងបុគ្គលិក នៃធនាគារហត្ថាបានចូលរួមក្នុងការបរិច្ចាគឈាមជូនមជ្ឈមណ្ឌលជាតិផ្តល់ឈាម ហើយលោកជឿជាក់ថានឹងមានជាបន្តបន្ទាប់ទៀតនាពេលខាងមុខ៕

ដោយ៖ ចាន់ សុភឿន