AKP ភ្នំពេញ ថ្ងៃទី១៦ ខែកក្កដា ឆ្នាំ២០២៥--

ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា នាព្រឹកថ្ងៃទី១៦ ខែកក្កដា ឆ្នាំ២០២៥ បានអនុញ្ញាតឱ្យឯកឧត្តម H.E .Phongsaysack INTHATH អនុរដ្ឋមន្ត្រីក្រសួងការងារ និងសុខុមាលភាពសង្គមនៃសាធារណរដ្ឋប្រជាធិបតេយ្យប្រជាមានិតឡាវ និងគណៈប្រតិភូ ចូលជួបសម្តេងការគួរសម និងពិភាក្សាការងារ នៅវិមានរដ្ឋសភា។

កិច្ចពិភាក្សានេះ មានការអញ្ជើញចូលរួម ឯកឧត្តម លោកជំទាវ សមាជិក សមាជិកាក្រុមមិត្តភាពសភាកម្ពុជា ឡាវ និងសមាជិក សមាជិការគណៈកម្មការទី៨ នៃរដ្ឋសភា។

ឯកឧត្តម H.E .Phongsaysack INTHATH អនុរដ្ឋមន្ត្រីក្រសួងការងារ និងសុខុមាលភាពសង្គមឡាវ បានមានប្រសាសន៍ថា ឯកឧត្តម និងសមាជិកគណៈប្រតិភូបានអញ្ជើញមកបំពេញទស្សនកិច្ចជាផ្លូវការ និងមិត្តភាពនៅកម្ពុជានាពេលនេះ គឺមានគោលបំណងដើម្បីពិភាក្សាការងារ និងចែករំលែកបទពិសោធន៍ ដែលទាក់ទងនឹងការគ្រប់គ្រងប្រព័ន្ធគាំពារសង្គម រវាងសាធារណៈរដ្ឋប្រជាធិបតេយ្យប្រជាមានិតឡាវ និងព្រះរាជាណាចក្រកម្ពុជា។

ក្នុងនាម សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា ឯកឧត្តមកិត្តិសេដ្ឋាបណ្ឌិត ជាម យៀប បានសម្ដែងការស្វាគមន៍ និងវាយតម្លៃខ្ពស់ជូនគណៈប្រតិភូឡាវ  និងអបអរសាទរចំពោះវត្តមានគណៈប្រតិភូឡាវ  ដែលបានមកធ្វើទស្សនៈកិច្ចសិក្សាស្វែងយល់ជាមួយរដ្ឋសភានៃព្រះរាជាណាចក្រកម្ពុជា។  ឯកឧត្តមកិត្តិសេដ្ឋាបណ្ឌិតបានថ្លែងអំណរគុណដល់អង្គការអុកស្វាមកម្ពុជា និងអង្គការអុកស្វាមឡាវ ដែលបានជួយសម្របសម្រួលឱ្យកើតមាននូវទស្សនៈកិច្ចសិក្សានេះឡើង។ 

ឯកឧត្តមបានបន្ថែមថា ជាការពិត កម្ពុជា និងឡាវ គឺជាអ្នកជិតខាងដ៏ល្អ មិត្តជិតស្និទ្ធ បងប្អូនប្រុស-ស្រី និងជាដៃគូយុទ្ធសាស្ត្រ ដោយផ្អែកលើការគោរពគ្នា និងជឿទុកចិត្តគ្នា។ ប្រទេសទាំងពីរតែងតែគាំទ្រគ្នាទៅវិញទៅមក នៅគ្រប់កាលៈទេសៈ។

ឯកឧត្តមអនុប្រធានទី១រដ្ឋសភា ក៏បានជម្រាបជូនគណៈប្រតិភូឡាវ អំពីលទ្ធផលជោគជ័យនៃការរៀបចំសមាជរដ្ឋសភា និងព្រឹទ្ធសភា នៃព្រះរាជាណាចក្រកម្ពុជាកាលពីថ្ងៃទី២ និងទី៣ ខែមិថុនាឆ្នាំ២០២៥ កន្លងទៅថ្មីៗនេះ ក្រោមការដឹកនាំសមាជដោយផ្ទាល់ពី សម្តេចអគ្គមហាសេនាបតីតេជោ ហ៊ុន សែន  ប្រធានសមាជ និងជាប្រធានព្រឹទ្ធសភា ដោយបានប្រជុំពិភាក្សាយ៉ាងផុលផុសលើប្រធានបទសំខាន់ៗចំនួន៣រួមមាន៖ ប្រធានបទស្តីពីប្រព័ន្ធគាំពារសង្គម ប្រធានបទស្តីពីសេដ្ឋកិច្ចក្រៅប្រព័ន្ធ និងប្រធានបទស្តីពីវិស័យកសិកម្ម។ 

ឯកឧត្តមកិត្តិសេដ្ឋាបណ្ឌិត ជាម យៀប បានជម្រាបជូនភ្ញៀវយ៉ាក្បោះក្បាយអំពីតួនាទីនិងភារកិច្ចរបស់រដ្ឋសភា និងថារដ្ឋសភានីតិកាលទី៧ មានរយៈពេល៥ឆ្នាំ គឺចាប់ពីឆ្នាំ២០២៣ ដល់ឆ្នាំ២០២៨ ។ ក្នុងអាណត្តិនេះ រដ្ឋសភាគឺដឹកនាំដោយសម្តេចមហារដ្ឋសភាធិការធិបតី ឃួន សុដារី ជាប្រធានរដ្ឋសភា ដែលជាស្រ្តីដំបូង ក្នុងប្រវត្តិសាស្រ្តកម្ពុជា បានទទួលនូវដំណែងដ៏ឧត្តុង្គឧត្តមនេះ៕

ដោយ៖ ប៊ុនរិទ្ធ