AKP ភ្នំពេញ ថ្ងៃទី១៦ ខែកក្ដដា ឆ្នាំ២០២៥--

ឯកឧត្ដម ហេង រតនា ប្រតិភូរាជរដ្ឋាភិបាលទទួលបន្ទុកអគ្គនាយកស៊ីម៉ាក់ បានបញ្ជាក់ថាសកម្មភាពមន្រ្តីជំនាញ ធ្វើការបោសសម្អាតគ្រាប់មីននិងសំណល់យុទ្ធភណ្ឌសល់ពីសង្គ្រាម គ្រាប់យុទ្ធភណ្ឌមិនទាន់ផ្ទុះខ្លះកាន់តែចាស់កាន់តែមានហានិភ័យខ្ពស់ មុនពេលវាបាត់បង់លទ្ធភាពបង្កផ្ទុះហេតុនេះ ដេីម្បីបញ្ចៀសគ្រោះថ្នាក់ កុំប៉ះពាល់លេីកដាក់ គ្រាប់មីន និងគ្រាប់សំណល់យុទ្ធភណ្ឌសល់ពីសង្គ្រាមគ្រប់ប្រភេទ  ឯកឧត្ដមបានបញ្ជាក់បែបនេះ កាលពីថ្ងៃពុធទី១៦ ខែកក្ដដា ឆ្នាំ២០២៥ តាមរយៈបណ្ដាញទំនាក់ទំនងសង្គមរបស់ឯកឧត្ដមផ្ទាល់ ។

ឯកឧត្ដមបានបញ្ជាក់ថា កាលពីម្សិលមិញក្រុមការងារ កម្លាំងជំនាញ ស៊ីម៉ាក់យើង(CMAC) បានរកឃើញអាវុធប្រយុទ្ធ កប់ក្នុងដីសល់ពីសង្រា្គម មានចំនួន៥២ដើម និងវិទ្យុទាក់ទងចំនួន ៣គ្រឿង តែយើងមិនអាចលើកដាក់ ដឹកជញ្ជូនផ្លាស់ទីកន្លែងបានទេ ស្ថិតនៅក្នុងភូមិទូកពីរ ឃុំគគីធំ ស្រុកបារាយណ៍ ខេត្តកំពង់ធំ រួចក្រុមជំនាញយើងបានសម្រេចធ្វើការកំទេចនៅនឹងកន្លែងតែម្ដង ដើម្បីប្រែក្លាយជាតំបន់អភិវឌ្ឍន៍ដំណាំកសិកម្មរបស់បងប្អូនប្រជាកសិករប្រកបដោយសុវត្ថិភាព និងសុខសាន្ដ ។

ឯកឧត្ដម ហេង រតនា បានអរគុណសន្តិភាព ដែលបានធ្វេីឱ្យអាវុធកប់ទុកត្រៀមប្រយុទ្ធរវាងខ្មែរនិងខ្មែរត្រូវបានបញ្ចប់ទាំងស្រុងហេីយអាវុធទាំងនេះ គ្មានសមរភូមិបម្រេីការរហូតបាត់បង់សមត្ថភាពប្រយុទ្ធ និងក្លាយជាសាកសពអាវុធប្រើ ការលែងកើតតែម្តង ៕

ដោយ៖ សួស សំរិត