AKP ភ្នំពេញ ថ្ងៃទី១៦ ខែកក្កដា ឆ្នាំ២០២៥ -- ក្រសួងអប់រំ យុវជន និងកីឡាបានជូនដំណឹងស្តីពីការប្រឡងវាស់ស្ទង់សមត្ថភាពគណិតវិទ្យាអន្តរជាតិ ស្តង់ដាប្រទេសជប៉ុន SUKEN TEST 2025 សម្រាប់សិស្សថ្នាក់ទី៤ ដល់ថ្នាក់ទី១២ និងកម្រិតសាកលវិទ្យាល័យ ដែលការប្រឡងនេះធ្វើឡើងក្រោមកិច្ចសហការរវាងវិទ្យាស្ថានវិញ្ញាបនបត្រគណិតវិទ្យានៃប្រទេសជប៉ុន និងសហគមន៍អ្នកគណិតវិទ្យាកម្ពុជា និងក្រសួងអប់រំ យុវជន និងកីឡា ដែលនឹងប្រព្រឹត្តទៅនៅថ្ងៃអាទិត្យទី២៨ ខែកញ្ញា ឆ្នាំ២០២៥ វេលាម៉ោង៨ និង០០នាទីព្រឹក នៅវិទ្យាស្ថានជាតិអប់រំ។ ការប្រឡងនេះរៀបចំឡើងក្នុងគោលបំណងចូលរួមពង្រឹងសមត្ថភាពសិស្ស ព្រមទាំងពង្រឹងប្រសិទ្ធភាព នៃការរៀន ការបង្រៀន ការសិក្សាស្រាវជ្រាវ និងលើកកម្ពស់គុណភាពអប់រំគណិតវិទ្យានៅកម្ពុជា។

សម្រាប់សិស្ស និស្សិតដែលមានចំណាប់អារម្មណ៍ សូមមកចុះឈ្មោះចូលរួមប្រឡងនៅអគារ «I» មជ្ឈមណ្ឌលស្រាវជ្រាវគរុកោសល្យជំនាន់ថ្មី នៃវិទ្យាស្ថានជាតិអប់រំ ឬតាមរយៈតំណភ្ជាប់ https://forms.gle/7UXAWwqA4YZsqA4JA ឬតាម QR Code ខាងក្រោមចាប់ពីពេលផ្សាយដំណឹងនេះរហូតដល់ថ្ងៃទី១៥ ខែកញ្ញា ឆ្នាំ២០២៥ វេលាម៉ោង៥ និង០០នាទីល្ងាចជាកំណត់។ សម្រាប់ព័ត៌មានលម្អិតសូមទាក់ទង និងសាកសួរដោយផ្ទាល់នៅមជ្ឈមណ្ឌលស្រាវជ្រាវគរុកោសល្យជំនាន់ថ្មី ឬអាចទាក់ទងតាមរយៈតេឡេក្រាម៖ 096 943 9944/077 468 989/011 697 0389។ ចំពោះរង្វាន់ដែលត្រូវទទួលបាន រួមមាន វិញ្ញាបនបត្របញ្ជាក់លទ្ធផលនៃការប្រឡងចេញដោយវិទ្យាស្ថានវិញ្ញាបនបត្រគណិតវិទ្យានៃប្រទេសជប៉ុន មេដាយមាស មេដាយប្រាក់ និងមេដាយសំរឹទ្ធ សម្រាប់គ្រប់កម្រិតថ្នាក់ចំពោះអ្នកដែលទទួលបានពិន្ទុតាមការកំណត់។ ចុះឈ្មោះឥឡូវនេះនឹងផ្តល់ជូនកម្រងវិញ្ញាសារតេស្ត SUKEN ដែលធ្លាប់ចេញកន្លងមកដោយឥតគិតថ្លៃ៕

ដោយ៖ ចាន់ សុភឿន (ប្រភព៖ ក្រសួងអប់រំ)