AKP ភ្នំពេញ ថ្ងៃទី១៦ ខែកក្កដា ឆ្នាំ២០២៥ -- ដោយមានការអនុញ្ញាតដ៏ខ្ពង់ខ្ពស់ពីថ្នាក់ដឹកនាំ លោក ឡុក សីលា ប្រធាននាយកដ្ឋានរដ្ឋបាល ផែនការ និងសហប្រតិបត្តិការនៃរអាជ្ញាធរទន្លេសាប នៅថ្ងៃទី១៥ ខែកក្កដា ឆ្នាំ២០២៥ បានចូលរួមកិច្ចប្រជុំពិភាក្សាលើគម្រោងហេដ្ឋារចនាសម្ពន័្ធទេសចរណ៍សម្រាប់កំណើនប្រកបដោយបរិយាបន្ន និងភាពធន់ នៅសាលប្រជុំទីស្នាក់ការធនាគារអភិវឌ្ឍន៍អាស៊ី (ADB Meeting Room) ដោយមានការចូលរួមពីថ្នាក់ដឹកនាំ និងមន្ត្រីបច្ចេកទេសនៃធនាគារអភិវឌ្ឍន៍អាស៊ី(ADB) តំណាងក្រសួងទេសចរណ៍ ក្រសួងសេដ្ឋកិច្ច និងហិរញវត្ថុ ក្រសួងសាធារណការ និងដឹកជញ្ជូន និងអាជ្ញាធរទន្លេសាប។

កិច្ចប្រជុំនេះមានគោលបំណងពិភាក្សាលើលក្ខណៈរួមរបស់គម្រោងត្រូវអនុវត្តឱ្យមានប្រសិទ្ធភាព ដែលនឹងគិតគូរពីការតភ្ជាប់ហេដ្ឋារចនាសម្ព័ន្ធនៅតាមតំបន់សំខាន់ៗមួយចំនួននៃខេត្តចំនួនពីរ គឺខេត្តបាត់ដំបង និងខេត្តសៀមរាប ដើម្បីលើកកម្ពស់ទេសចរណ៍ធម្មជាតិ ជាមួយនឹងការទ្រទ្រង់ជីវភាពរស់នៅរបស់សហគមន៍ក្នុងតំបន់បឹងទន្លេសាបក្នុងខេត្ត សនិទានកម្មគម្រោង វិសាលភាពគម្រោង ផែនការហិញ្ញវត្ថុ ការរៀបចំការអនុវត្តគម្រោង ដំណើការកម្មវិធីគម្រោង និងផែនការរៀបចំគម្រោង។

សូមបញ្ជាក់ថា បន្ទាប់កិច្ចប្រជុំនេះបញ្ចប់ គណៈប្រតិភូអន្តរក្រសួង និងធនាគារអភិវឌ្ឍន៍អាស៊ី ADB នឹងបន្តចុះទស្សនកិច្ចសិក្សាផ្ទាល់នៅទីតាំងជាក់ស្តែងនាខេត្តបាត់ដំបង និងខេត្តសៀមរាប ចាប់ពីថ្ងៃទី១៦ រហូតដល់ថ្ងៃទី ១៨ ខែកក្កដា ឆ្នាំ ២០២៥៕

ដោយ ណយ នឿន (ប្រភព៖ អាជ្ញាធរទន្លេសាប)